އަންނަ ދިރާސީ އަހަރު ސްކޫލްތަކުގައި ކިޔެވުމަށް ކުދިން ވެއްދުމުގެ ފުރުސަތު އެޑިއުކޭޝަން މިނިސްޓްރީން ހުޅުވާލައިފި އެވެ.

އެޑިއުކޭޝަން މިނިސްޓްރީން މިރޭ ބުނީ 2027 ވަނަ އަހަރުގެ ދިރާސީ އަހަރު ސްކޫލްތަކަށް ކުދިން ވެއްދުމުގެ ފުރުސަތު އޮންނާނީ މިއަދުން ފެށިގެން އަންނަ އޯގަސްޓު މަހުގެ 31 ގެ ނިޔަލަށް ކަމަށެވެ. ފޯމް ބަލައިގެންނާނީ މިނިސްޓްރީގެ ވެބްސައިޓު މެދުވެރިކޮށް އޮންލައިން ކޮށެވެ.

Advertisement

މިނިސްޓްރީން ބުނީ ރާޢްޖޭގެ ހުރިހާ ސަރުކާރު ސްކޫލްތަކަށް ކުދިން ވެއްދުމަށް ފޯމު ހުށަހަޅަން ޖެހޭނީ ވެބްސައިޓު މެދުވެރިކޮށް ކަމަށެވެ. މިއަދު ހުޅުވާލާފައިވަނީ އެލްކޭޖީ އަދި ގްރޭޑް އެކަކަށް ވައްދަން ބޭނުންވާ ދަރިވަރުން ފޯމު ހުށަހެޅުމަށެވެ.

މިނިސްޓްރީން އަމަލު ކުރާ އުސޫލަށް ބަދަލު ގެނެސް ދިރާސީ އަހަރުގެ މެދުތެރެއިން ކުރިޔަށް އޮންނަ އަހަރަށް ދަރިވަރުން ވެއްދުމުގެ ފުރުސަތު ހުޅުވާލަން ފެށީ 2024 ވަނަ އަހަރު އެވެ. އެއީ ދަރިވަރުންގެ ޔުނީފޯމާއި، ސްޓޭޝަނަރީޒް ހޯދުމަށް ބެލެނިވެރިންނަށް ލުއި ފަސޭހަ ކޮށްދިނުމުގެ ގޮތުންނެވެ.

މީގެ އިތުރުން ޚާއްޞަ ޙާލަތެއް ނެތި ދަރިވަރުން އެއް ސްކޫލުން އެހެން ސްކޫލަކަށް ބަދަލުކުރެވޭ ވަކި މުއްދަތެއް ކޮންމެ އަހަރެއްގެ އެކަޑަމިކް ކަލަންޑަރުގައި ހިމަނާ ގޮތަށް ވެސް އެ ވުޒާރާއިން ވަނީ ނިންމައިފައެވެ.

މި ބަދަލާއި އެކު ޓާމުގެ ކިޔެވުން ކުރިޔަށް ދަނިކޮށް އެއް ސްކޫލުން އަނެއް ސްކޫލަށް ބަދަލުވުމުގެ ފުރުސަތު ނުލިބޭނެ އެވެ. ސްކޫލް ބަދަލު ކުރާ ނަމަ ނުވަތަ އަލަށް ވައްދާނަމަ ސްކޫލަށް ކުދިން ވެއްދޭނީ ދިރާސީ އާ އަހަރަށް ނުވަތަ ދެ ވަނަ ޓާމަށެވެ.

ތަފާސް ހިސާބުތައް ދައްކާ ގޮތުން މި އަހަރު ސަރުކާރުގެ 218 ސްކޫލެއްގައި 77،000 އަށް ވުރެ ގިނަ ދަރިވަރުން ތަޢުލީމު ޙާޞިލުކުރެއެވެ.

މިއަހަރުގެ ދިރާސީ އަހަރުގެ ކިޔެވުން ނިމި ދަރިވަރުން ޗުއްޓީއަށް ދާނީ ޑިސެމްބަރު 17 ގައި އެވެ. 2027 ވަނަ އަހަރުގެ ދިރާސީ އަހަރު ފަށާނީ ޖެނުއަރީ 17 ގައި އެވެ.