މިސްކިތްތަކަށް ލިބެމުންދާ ގެއްލުންތައް ނުހުއްޓުވައިފިނަމަ މުޖުތަމައު ހީވެސް ނުކުރާ ފަދަ ނުރައްކާތެރި ހާލަތަކަށް ވެއްޓިދާނެ ކަމުގެ އިންޒާރު މަންފާ ޖަމިއްޔާގެ ރައީސް އަލީ ރަމީޒް މިއަދު ދެއްވައިފިއެވެ.

އަލީ ރަމީޒު މިހެން ވިދާޅުވީ ހުޅުމާލޭ އަޒީޒާ މިސްކިތަށް ކައިރިކައިރީގައި ދެ ފަހަރެއްގެ މަތިން ހަމަލާ ދީ ގެއްލުން ދިން މައްސަލައާ ގުޅިގެން ސޯޝަލް މީޑިއާގައި ކުރެއްވި ޕޯސްޓެއްގައި އެވެ.

Advertisement

އޭނާ ވިދާޅުވީ މިފަދަ ޢަމަލުތައް ހުއްޓުވަން ފިޔަވަޅު އަޅަން ޖެހޭ ކަމަށެވެ. ދީނީ ހޭލުންތެރިކަން ފެތުރުމުގެ މަސައްކަތުގައި އިސް ދައުރެއް އަދާކުރައްވާ އަލީ ރަމީޒް އިތުރަށް ވިދާޅުވީ މި ހަމަލާތައް ނުހުއްޓުވައިފިނަމަ ކަންކަން ފާލުން ނައްޓައިގެން ގޮސްދާނެ ކަމަށެވެ.

ފުލުހުން ބުނެފައިވާ ގޮތުގައި އަޒީޒާ މިސްކިތަށް ގެއްލުން ދިނީ ދެ ފަހަރުވެސް އެކަކެވެ. ފުރަތަމަ ހަމަލާ ދީފައިވަނީ އާދިިއްތަ ދުވަހުގެ މެންދަމު ވަގުތެއްގައި ކަމަށް ވާއިރު ދެވަނަ ހަމަލާ ދީފައިވަނީ ރޭ މަޣުރިބު ނަމާދަށް ފަހުއެވެ.

އޭނާ ވަނީ މިސްކިތުގެ މައި ދޮރު ބަރު އެއްޗަކުން ޖަހާ ތަޅާލާފައެވެ. އަދި ފުރަތަމަ ގެއްލުން ދިން ރޭ މުސްހަފުތައްވެސް ބިންމައްޗަށް އުކާލާފައިވެ އެވެ.

މާލެ ސަރަހައްދުގެ މިސްކިތްތަކުގައި ބަހައްޓާފައި ހުންނަ ފަންކާ އާއި ސައުންޑް ސިސްޓަމް ފަދަ ތަކެތި ވަގަށް ގެންދިއުމާއި މިސްކިތްތަކަށް ގެއްލުން ދިނުމުގެ މައްސަލަތައް ފަހަކަށް އައިސް ވަނީ ޢާންމު ކަމަކަށް ވެފައެވެ.

އަދި މިފަދަ މައްސަލަތަކުގައި ހައްޔަރު ކުރެވޭ މީހުން ވަނީ ގިނަ ފަހަރު ސިއްހީ އިތުރު ފަރުވާ ބޭނުންވެފައިވާ މީހަކަށެވެ.