މޯލްޑިވްސް ހާފް މެރަތަން 2026 ގެ އެކްސްކްލޫސިވް ބޭންކިން ޕާޓްނަރަކަށް ބޭންކް އޮފް މޯލްޑިވްސް (ބީއެމްއެލް) ހަމަޖައްސައިފި އެވެ.

އައިރަނާސްއިން އިންތިޒާމް ކުރާ މި ދުވުމުގެ ޕާޓްނަރެއްގައި ގޮތުގައި ބީއެމްއެލްއިން ވަނީ އެ ޖަމިއްޔާ އާއި އެކު އެއްބަސްވުމުގައި ސޮއިކޮށްފައި އެވެ. ދުވުން ބޭއްވުމަށް ތާވަލު ކޮށްފައިވަނީ 14 އޮގަސްޓުގައި ހުޅުމާލޭ ސެންޓްރަލް ޕާކުގައި އެވެ.

Advertisement

މި ދުވުމުގައި 2000 އަށްވުރެ ގިނަ ދުވުންތެރިން ބައިވެރިވާނެ ކަމަށް ބެލެވެއެވެ.

ޖުމްލަ އަށް ކެޓަގަރީއަކަށް ބަހައިލައިގެން ކުރިއަށް ގެންދާ މި ހަރަކާތުގައި ހާފް މެރަތަނާއި 15 ކިލޯމީޓަރުގެ ދުވުމާއި 10 ކިލޯމީޓަރުގެ ދުވުމާއި ފަސް ކިލޯމީޓަރުގެ ފަން ރަނާއި ފަސް ކިލޯމީޓަރުގެ ވީލްޗެއާ ރޭހާއި ކިޑްސް މައިލް އަދި ފެމިލީ ރަން ހިމެނެއެވެ.

ދުވުމުގެ ހަރަކާތާ ގުޅުވައިގެން ހުޅުމާލޭ ރަނިން ޓްރެކުގައި ތިން ދުވަހުގެ އެކްސްޕޯއެއް ވެސް ބާއްވާ ގޮތަށް އައިރަނާސް އިން ވަނީ ރާވައިފައެވެ. އެ އެކްސްޕޯ ކުރިއަށް ދާނީ އޮގަސްޓް 11 ވަނަ ދުވަހުން 13 ވަނަ ދުވަހުގެ ނިޔަލަށެވެ.

މިއަހަރުގެ ދުވުމުގައި ބައިވެރިވުމަށް ރަޖިސްޓްރީ ކުރާ ފަރާތްތަކުގެ ފީން ލިބޭ ފައިސާގެ ބައެއް ޕްރޮޓެކްޓް ދަ ރީފް ކެމްޕޭންގެ ދަށުން މިއަހަރު ސޭވް ދަ ބީޗަށް ހަދިޔާ ކުރާ ގޮތަށް ވަނީ ހަމަޖެހިފައެވެ.