އެމެރިކާއިން އީރާނާ ދެކޮޅަށް ކުރަމުންދާ ހަނގުރާމައިގެ ޚަރަދު 37.5 ބިލިއަން ޑޮލަރަށް އަރާފައިވާ ކަމަށް އެ ޤައުމުގެ ދިފާޢީ ވަޒީރު ޕީޓް ހެގްސެތް ސެނެޓުގެ ކޮމިޓީއެއްގައި ހާމަކޮށްފިއެވެ.

މެއި މަހު ޕެންޓެގަނުގެ އިސް އޮފިޝަލަކު ހާމަކުރި 29 ބިލިއަން ޑޮލަރުގެ އަންދާޒާއާ އަޅައިބަލާއިރު މިއީ ގާތްގަނޑަކަށް އަށް ބިލިއަން ޑޮލަރުގެ އިތުރުވުމެކެވެ. ހެގްސެތް މި ޢަދަދު ހާމަކުރީ އެމެރިކާގެ ސެނެޓުގެ އެޕްރޮޕްރިއޭޝަންސް ކޮމިޓީގައި ޕެންޓެގަނަށް 1.5 ޓްރިލިއަން ޑޮލަރުގެ ދިފާޢީ ބަޖެޓެއް ހޯދުމަށް ހުށަހެޅި ހުށަހެޅުމާ ގުޅޭ ގޮތުން ސުވާލުކުރެވުނު ވަގުތުގައެވެ.

Advertisement

އެ ބަޖެޓުގެ ތެރެއިން ގާތްގަނޑަކަށް 70 ބިލިއަން ޑޮލަރު ޚާއްޞަކޮށްފައިވަނީ އީރާނާ ދެކޮޅު ހަނގުރާމައަށެވެ.

ހެގްސެތް ކޮމިޓީގައި ބުނީ ޕެންޓެގަނަށް އިތުރު 87 ބިލިއަން ޑޮލަރުގެ ފައިސާ ކޮންގްރެސް އިން ފާސްކޮށްދިނުން މުހިންމު ކަމަށާއި އޭގެ ތެރެއިން 67 ބިލިއަން ޑޮލަރު ހޭދަކުރެވޭނީ މެދުއިރުމައްޗައިގެ އޮޕަރޭޝަންތަކަށް ކަމަށެވެ. މި ފައިސާ ނުލިބިއްޖެ ނަމަ ސިފައިންނަށް މުސާރަ ދިނުމާއި ހަތިޔާރު އަލުން ހޯދުމާއި ތަމްރީނުތައް ހިންގުމަށް ދަތިވާނެ ކަމަށް ހެގްސެތް ބުންޏެވެ.

އެ ބައްދަލުވުމުގައި ޑިމޮކްރެޓިކް ސެނެޓަރު ޑިކް ޑާބިން ސުވާލުކުރުމުން ހެގްސެތް މި ޢަދަދު ހާމަކުރި ނަމަވެސް ސީބީއެސް އާ ވާހަކަ ދެއްކި ދެ ޑިމޮކްރެޓިކް މަސްދަރަކާއި ތިންވަނަ ފަރާތަކުން ބުނީ ހަނގުރާމައިގެ ޙަޤީޤީ ޚަރަދު މާ ބޮޑުވާނެ ކަމަށް ޤަބޫލުކުރެވޭ ކަމަށެވެ. މި ތަޙްމީނުގައި ހަލާކުވި އެމެރިކާގެ މިލިޓަރީ މަރުކަޒުތައް އާރާސްތުކުރުން ފަދަ ޚަރަދުތައް ހިމެނިފައި ނުވާ ކަމަށް އެ ފަރާތްތައް ބުންޏެވެ.

ގިނަ ޑިމޮކްރެޓުން މި ބަޖެޓް ހުށަހެޅުމާ ދެކޮޅުވެފައިވާ އިރު ރިޕަބްލިކަން ޕާޓީގެ ތެރޭގައި ވެސް ހިތްހަމަނުޖެހުން އެބަ އޮތެވެ. ހައުސް އޮފް ރެޕްރެޒެންޓެޓިވްސް ބުރާސްފަތި ދުވަހު ޗުއްޓީ އަށް ދާ އިރު ކޮންގްރެސްގެ ދެ ގެ އެކީގައި އަލުން ބައްދަލުކުރާނީ ސެޕްޓެމްބަރު މަހުގައެވެ. ވޯޓު ހަމަކުރެވުނު ނަމަވެސް ޕެންޓެގަނަށް ފައިސާ ލިބެން ދެ މަހެއްހައި ދުވަސް ނަގާނެ ކަމަށް ބެލެވެއެވެ.

ފެބްރުއަރީ 28 ގައި ފެށުނު އީރާނާ ދެކޮޅު ހަނގުރާމައިގައި މިހާތަނަށް 18 މީހުން މަރުވެފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެފައިވެ އެވެ.

އޭގެ ތެރޭގައި ޕެންޓެގަނުން އަންގާރަ ދުވަހު ވަނީ ޢިރާޤުގައި ޢުމުރުން 30 އަހަރުގެ ސާޖެންޓް މައިކަލް އެމެނުއެލް ސްވިންޓަން މަރުވެފައިވާ ކަމަށާއި ޢުރުދުންގައި ޢުމުރުން 28 އަހަރުގެ ސާޖެންޓް އެންޖެލް ރެމްޕާސެޑް ހިމެނެ އެވެ.. އޭގެ ކުރީ ދުވަހު ޢުރުދުންގައި މަރުވި ދެ ސިފައިންގެ ގޮތުގައި ޢުމުރުން 19 އަހަރުގެ ޕްރައިވެޓް ފަސްޓް ކްލާސް އިޒަބެއްލާ ގޮންޒާލެސް އާއި ޢުމުރުން 25 އަހަރުގެ ފަސްޓް ލެފްޓެނެންޓް ޓައިލާ ފީހާން ހިމެނެއެވެ.