ރަށު ކައުންސިލްތަކުން މާލޭގައި ދިރިއުޅޭ އެ ރަށެއްގެ ރައްޔިތުންނާ ބައްދަލުކުރުމަށް ބޭނުންވާ ޖާގަ ހިލޭ ހަމަޖައްސައި ދިނުމަށް މާލެ ސިޓީ ކައުންސިލުން މިއަދު ނިންމައިފިއެވެ.

މި ނިންމުން ފާސްކުރީ ސިޓީ ކައުންސިލުގެ ޖަލްސާގައި ބައިވެރިވެވަޑައިގެންނެވި ހުރިހާ ކައުންސިލަރުންގެ އިއްތިފާޤުންނެވެ. މި ހުށަހެޅުން ހުށަހެޅީ މޭޔަރު އާދަމް އާޒިމެވެ.

Advertisement

އޭނާ ވދިާޅުވީ މި ހުށަހެޅުއްވުން ގެންނެވީ މާލެ ސަރަހައްދުގައި ތަފާތު ދާއިރާތަކުގެ ގިނަ ރައްޔިތުން ދިރިއުޅޭއިރު އެ ފަރާތްތަކާ ބައްދަލުކުރާނެ ތަނެއް ހޯދުމުގައި ކައުންސިލްތަކަށް ދަތިތައް ކުރިމަތިވާ ކަމަށް ވިދާޅުވަމުންނެވެ.

ކައުންސިލުގެ ބެލުމުގެ ދަށުގައި ހުރި ހުސް ތަންތަން މި ބޭނުމަށް ދިނުމުގެ އިތުރުން ރިފްރެޝްމަންޓް ފަދަ ކަންކަން ހަމަޖައްސައި މެހެމާންދާރީ އަދާކުރުމަކީ ވެސް މި ނިންމުމުގެ ބައެއް ކަމަށް އާޒިމް ވިދާޅުވިއެވެ. އެ މަނިކުފާނު ވިދާޅުވި ގޮތުގައި ދެ ފަރާތުގެ ގުޅުން ބަދަހިކުރުމުގެ އިތުރުން މާލެއަކީ މެހެމާންދާރީގައި ނަމޫނާ ސިޓީއަކަށް ހެދުމަށް މިއީ ކުރެވޭނެ މަސައްކަތެކެވެ.

ސިޓީ ކައުންސިލުން ފާހަގަކުރި ގޮތުގައި މި ނިންމުމުގެ ސަބަބުން ރަށްރަށުގެ ކައުންސިލްތަކާއި މާލެ ސިޓީ ކައުންސިލާ ދެމެދު އޮންނަ ގުޅުން ވަރުގަދަވެ މާލޭގައި ދިރިއުޅޭ ރައްޔިތުންނާ މުޢާމަލާތުކުރުން ކައުންސިލްތަކަށް ފަސޭހަވެގެންދާނެއެވެ.

މިދިޔަ ހަފްތާގައި ސިޓީ ކައުންސިލުން ވަނީ އަލަތު ކައިވެނި ކުރާ މީހުންގެ ތެރެއިން މާލީ ތަނަވަސްކަން ނެތް މީހުންނަށް ކައިވެނީގެ ހަފްލާ ބާއްވަން ހިލޭ މާލެއިން ޖާގަ ހަމަޖައްސައިދޭންވެސް ފާސްކޮށްފައި އެވެ.