ރައްޔިތުން ކުރަމުންދާ މުޒާހަރަތައް ހުއްޓަ ނުލައި ވަރުގަދަ ކުރަމުންދާތީ ގޮތް ހުސްވެ، ޔޫކްރެއިނުގެ އަސްކަރިއްޔާގެ ވެރިޔާ އޮލެކްސާންޑަރު ސީރްސްކީ މަގާމުން ވަކިކޮށްފި އެވެ.

އޭނާ މަގާމުން ވަކިކޮށް އާ އަސްކަރީ ވެރިއަކު އައްޔަން ކުރިކަން ޔޫކްރެއިންގެ ރައީސް ވޮލޮޑިމީރް ޒެލެންސްކީ ހާމަ ކުރެއްވީ ގައުމީ ޓީވީ މެދުވެރިކުރައްވާ ދެއްވި ބަޔާނެއްގައި އެވެ. ޒެލެންސްކީ ވަނީ އޭނާ މަގާމުން ވަކިކޮށް އާ ވެރިޔަކު އައްޔަން ކުރިކަންވެސް އިއުލާޏު ކުރައްވާފައި އެވެ.

Advertisement

އަލަށް އަސްކަރީ ވެރިއެއްގެ ގޮތުގައި އައްޔަން ކުރެއްވީ މީކައިލޯ ޑްރަޕަޓީ ނަމަކަށް ކިޔާ 43 އަހަރުގެ ޖެނެރަލެކެވެ. ޑްރަޕަޓީ އަކީ ހަނގުރާމައިގެ ތަޖުރިބާ ލިބިފައިވާ ރައްޔިތުންގެ މެދުގައި މަޤުބޫލު ކޮމާންޑަރެކެވެ. ސެނާގެ ކޮމާންޑް ހިންގުމުގެ އޮނިގަނޑު އެކުލަވައިލުމުގެ މަސައްކަތް ޑްރަޕަޓީ ބެލެހެއްޓެވުމަށް ޒެލެންސްކީ ވަނީ ނިންމަވައިފައެވެ.

މި ނިންމެވުން އައީ މިދިޔަ ހަފުތާގައި މަޤުބޫލު ދިފާޢީ ވަޒީރު މީކައިލޯ ފެޑޮރޮވް ވަކިކުރެއްވުމާ ގުޅިގެން ކީވް އާއި ޔޫކްރެއިނުގެ އެކި ސިޓީތަކުގައި އެތައް ހާސް ރައްޔިތުންނެއް މަގުމައްޗަށް ނުކުތް ދަނޑިވަޅެއްގައެވެ. 2022 ވަނަ އަހަރު ރަޝިއާގެ ފުލް ސްކޭލް ހަމަލާ ފެށުނު ފަހުން ޔޫކްރެއިނަށް ކުރިމަތިވި އެންމެ ބޮޑު ސިޔާސީ އެއް ހަލަބޮލިކަމަށް މި ކަންކަން ވެގެންދިޔައެވެ.

ފެޑޮރޮވް އާއި ސީރްސްކީ އާ ދެމެދު ޖެހިގެން އުޅުނީ ކޮންކޮން ކަމެއްކަމާ ގުޅޭ އަޑުތައް ފެތުރެން ފެށުނީ ފެޑޮރޮވް ވަކިކުރި ހިސާބުން ކަމަށް ވާއިރު ފަހުން އެ ކޯޅުން ޔަގީންވެސް ކޮށްދެވުނެވެ.

ފެޑޮރޮވް މަގާމުން ދުރުކުރެއްވީ ޖެނުއަރީ މަހު ދިފާޢީ ވަޒީރުކަމާ ހަވާލުވެވަޑައިގެންނެވި ފަހުންނެވެ. ޢުމުރުން 35 އަހަރުގެ ފެޑޮރޮވް ވަނީ ޑޭޓާ ބޭނުންކޮށްގެން އަސްކަރިއްޔާގެ ކުރީ ސަފުގެ ހަރަކާތްތައް ވަޒަންކުރައްވައި ބައްޓަން ކުރެއްވުމުގެ އިތުރުން ކޮރަޕްޝަނާ ދެކޮޅަށް ހަރުދަނާ މަސައްކަތްތަކެއް ކުރައްވައިފައެވެ.

ޒެލެންސްކީ ސޯޝަލް މީޑިއާގައި ޝާއިޢުކުރެއްވި ވީޑިއޯއެއްގައި ސީރްސްކީ 2022 ގައި ރަޝިއާގެ ހަމަލާގެ ފެށުމުގައި ކީވް ދިފާޢުކުރެއްވުމުގައި ކުރެއްވި މަސައްކަތް ފާހަގަކުރެއްވިއެވެ. ހަމައެއާ އެކު ފެޑޮރޮވް އާ ބައްދަލުކުރައްވައި ސަރުކާރުގެ "ޝަރަފުވެރި މަގާމެއް" ހުށަހެޅުއްވި ނަމަވެސް އެ ހުށަހެޅުން ޤަބޫލުކުރެއްވިތޯ ވިދާޅެއް ނުވެއެވެ.

ފެޑޮރޮވް އަށް ފަހު ވަގުތީ ދިފާޢީ ވަޒީރުކަމަށް އައްޔަން ކުރި ޔެވްހެނީ ޚުމާރާ އަދިވެސް އެ މަގާމުގައި ދެމިހުންނެވި އިރު އޭނާ އާއި ޑްރަޕަޓީ ގުޅިވަޑައިގެން ސެނާގެ ކޯރ ސިސްޓަމް އިޞްލާޙުކުރެއްވުމާއި ހަތިޔާރު ސަޕްލައި ކުރުމާއި ޑްރޯން ބޭނުންކުރުން ހިމެނޭ ގޮތަށް އާ ދިފާޢީ ސްޓްރެޓެޖީއެއް އެކުލަވައިލެއްވުމަށް ޒެލެންސްކީ ވަނީ އެދިވަޑައިގެންފައެވެ.