ދަރިވަރުން އިސްވެ ހިންގާ "ކޮކްރޯޗް" މުޒާހަރާތައް ފުޅާވަމުންދާ ދަނޑިވަޅެއްގައި އިންޑިއާގެ އިދިކޮޅު ލީޑަރު ރާހުލް ގާންދީ ފުލުހުން ހައްޔަރު ކޮށްފި އެވެ.

އޭނާ ހައްޔަރު ކުރީ އިންޑިއާގެ ބޮޑުވަޒީރު ނަރެންދުރަ މޯދީގެ ގެކޮޅު ކައިރީގައި ކުރި އިހުތިޖާޖެއްގެ ތެރެއިންނެވެ. ރާހުލްގެ އިތުރުން ކޮއްކޮ ޕްރިޔަންކާ ގާންދީ އާއި އިދިކޮޅު އެހެން ލީޑަރުންތަކެއްވެސް ހައްޔަރު ކުރި އެވެ.

Advertisement

އިންޑިއާގެ މީޑިއާ ތަކުން ފެތުރި ވީޑިއޯތަކުން ފެންނަ ގޮތުގައި ގާންދީ ބިންމަތީގައި އޮއްވައި ފުލުހުން އޭނާ ދަމައިގެން ގެންދިޔައިރު މުޒާހަރާގެ ބައިވެރިން އޭނާ ހިމާޔަތްކުރަން މަސައްކަތްކުރިއެވެ. ސޯޝަލް މީޑިއާގައި ފަހުން ކުރި ޕޯސްޓެއްގައި ހައްޔަރުކުރުމުގެ ތެރޭގައި ގާންދީއަށް އަނިޔާވި ކަމުގެ ސާފު ހެކިތައް ފާހަގަކޮށްފައިވެއެވެ.

ހައްޔަރު ކުރުމުގެ ކުރިން ރާހުލް ސޯޝަލް މީޑިއާގައި ކުރި ޕޯސްޓެއްގައި ބުނެފައިވަނީ އިންޑިއާގެ ޒުވާނުންގެ މުސްތަޤުބަލު ހަލާކުކޮށްލީތީ މޯދީ އިސްތިއުފާ ދެއްވަން ޖެހޭ ކަމަށެވެ. އަދި މަޖިލީހުގައި އެކަމަށް ބަހުސް ކުރަން ބޭނުން ނުވާކަމަށާއި އޭގެން އެނގެނީ ސަރުކާރު ޖަވާބުފާރީ ވާން ބޭނުން ނުވާ ކަންކަމަށެވެ.

އިންޑިއާ ސަރުކާރާއި ދެކޮޅަށް އަދި ހާއްސަކޮށް ޔޫނިއަން އެޑިއުކޭޝަން މިނިސްޓަރު ދަރްމެންދްރަ ޕްރަދާންގެ އިސްތިއުފާއަށް ގޮވާލާ ފެށި މުޒާހަރާތައް ހޫނުވެފައިވާއިރު މިހާތަނަށް 180 އަށްވުރެ ގިނަ މީހުންނަށް އަނިޔާވެފައިވެ އެވެ. އޭގެ ތެރޭގައި ގިނައީ ފުލުހުންނެވެ.

އިންޑިއާގެ ޒުވާނުންގެ މެދުގައި އުފެއްދި "ކޮކްރޯޗް ޖަންތާ ޕާޓީ" އިސްކޮށް ހިންގާ ދަރިވަރުން ބުނެފައިވާ ގޮތުގައި ތައުލީމީ ވަޒީރު އިސްތިއުފާ ނުދެނީސް މުޒާހަރާ ހުއްޓާ ނުލާނެ އެވެ. އެމީހުންނަށް މިކަމުގައި އެންމެ ބޮޑު ހިތްވަރެއް ލިބުނީ މަޝްހޫރު އުފެއްދުންތެރިޔާ އަދި ތިމާވެށީގެ އެކްޓީވިސް ސޯނަމް ވަންގްޗުކް އެމީހުންނާއި ގުޅި، ފެށި ބަނޑުހައި ހޫނުކަމުގެ ހަޅުތާލާއި ގުޅިގެންނެވެ.

މި މުޒާހަރާއަކީ ޑޮކްޓަރުކަން ކިޔަވާ ކުދިން ވަޒީފާގެ މައިދާނަށް ނުކުތުމަށް ހަދާ ގައުމީ ޓެސްޓު ޕޭޕަރު ލީކުވުމުން އެ އިމްތިހާނު އެޑިއުކޭޝަން މިނިސްޓްރީން ކެންސަލް ކުރި މައްސަލައިގަ ފެށި މުޒާހަރާތަކެކެވެ. މި މައްސަލައިގަ ޒުވާނުން ޑީމަންޑު ކުރަމުން ދަނީ އެޑިއުކޭޝަން މިނިސްޓަރު ޕްރަދާން ޕޭޕަރު ލީކުވުމުގެ ޒިންމާ ނަގައި އިސްތިއުފާ ދިނުމަށެވެ.

ދަރިވަރުންގެ ފެންވަރުން ފެށުނު މި މުޒާހަރާ މިހާރު ވަނީ ޕްރޮފެޝަނަލުންނާއި ޢާއިލާތައް ވެސް ހިމެނޭ ގޮތަށް ފުޅާވެ ފާއިތުވި އަހަރުތަކުގައި މޯދީ ސަރުކާރަށް ކުރިމަތިވި އެންމެ ބޮޑު ޢާންމު ގޮންޖެހުމަކަށް ވެފައެވެ.