ހުޅުމާލޭ ފޭސް އެކެއްގައި ހުންނަ އަޒީޒާ މިސްކިތަށް ގެއްލުން ދިން މީހާ އެނގިފައިވާ ކަމަށް ފުލުހުން ބުނެފި އެވެ.

އެ މިސްކިތަށް ގެއްލުން ދިނީ އިއްޔެ ރޭ މެންދަމު 3:30 ހާއިރު އެވެ. ފުލުހުން ބުނީ އެ މައްސަލަ ފުލުހުންނަށް އިއްޔެ ހުށަހަޅާފައިވާ ކަމަށެވެ.

Advertisement

ފުލުހުންގެ މީޑިއާ އޮފިޝަލް މިއަދު "ދުވަސް" އަށް ވިދާޅުވީ މި މައްސަލައިގަ ތުހުމަތު ކުރެވޭ މީހާ ދެނެގަނެވިފައިވާ ކަމަށެވެ. ނަމަވެސް ފުލުހުންގެ ބެލުމުގެ ދަށަށް އެމީހާ ގެންދިޔަ ކަމެއް ނުވަތަ ނޫން ކަމެއް ހާމައެއް ނުކުރައްވަ އެވެ.

އޭނާ ވިދާޅުވީ މިސްކިތަށް ގެއްލުންދިން މީހާގެ ހާލަތަށް ރިއާޔަތްކޮށް، ކަމާބެހޭ އިދާރާތަކާ ގުޅިގެން އަޅަންޖެހޭ އެންމެހައި ފިޔަވަޅުތައް އެޅުމުގެ މަސައްކަތް ކުރަމުންދާ ކަމަށެވެ.

އަޒީޒާ މިސްކިތަށް ގެއްލުން ދީފައި -- ފޮޓޯ: ކިޔުންތެރިއެއް

އެމީހާ ވަނީ ބަރު އެއްޗެއް އެއްލައި މިސްކިތުގެ ބައެއް ދޮރުތަކުގެ ބިއްލޫރިތައް ތަޅާލާފައި އެވެ. އަދި މިސްކިތުގައި ރީތިކޮށް ތަރުތީބުކޮށް ބަހައްޓާފައި ހުރި މުސްހަފުތައް ނަގައި ބިންމައްޗަށް އުކާފައި ހުއްޓެވެ.

މިސްކިތުގައި ހުންނަ ތަކެތި ވަގަށް ގެންދިއުމަކީވެސް ދޭތެރެއަކުން ހިނގަމުން އަންނަ ކަމެއްކަން ފާހަގަކޮށްލެވެއެވެ. އަދި މި ފަދަ މައްސަލަތަކުގައި ހައްޔަރު ކުރާ ގިނަ މީހުން ވެފައިވަނީ ނަފްސާނީ މައްސަލައެއް ހުންނަ ނުވަތަ އެހީތެރިކަން ބޭނުންވާ މީހަކަށެވެ.