އިންޑިއާގެ މާކެޓަށް އަމާޒުކޮށް ރާއްޖެ އިޝްތިހާރުކުރުމުގެ ގޮތުން އެ ގައުމުގެ މަޝްހޫރު ރެޕް ފަންނާނު ބާދުޝާ ވިޒިޓް މޯލްޑިވްސްގެ ކަލްޗުރަލް އެމްބެސެޑަރެއްގެ ގޮތުގައި ރާއްޖެ އައިސް މަސައްކަތް ކޮށްފި އެވެ.

މި ދަތުރުގައި އޭނާ ރާއްޖޭގައި ހަތަރު ދުވަސް ހޭދަ ކުރި އެވެ. ވިޒިޓް މޯލްޑިވްސް އިން މިއަދު ހާމަކުރި ގޮތުގައި އިންޑިއަން އައިޑަލްގެ ޖަޖެއްގެ ގޮތުގައި ވެސް ފާހަގަކުރެވޭ ބާދުޝާ މި ދަތުރުގައި މަޑުކޮށްފައި ވަނީ ހއ. އަތޮޅުގައި ހިންގާ ހައިޑްއަވޭ ބީޗް ރިސޯޓް އެންޑް ސްޕާގައެވެ.

Advertisement

އެ ރިސޯޓުގައި ހޭދަކުރި ދުވަސްތަކުގައި ރާއްޖޭގެ މެހުމާންދާރީ ތަޖުރިބާކުރުމުގެ އިތުރުން ވޯޓާ އެޑްވެންޗާ ހަރަކާތްތަކާއި ލަގްޒަރީ ޔޮޓް ދަތުރުތަކާއި ދިވެހި ސަގާފީ ކަންކަން ވެސް އޭނާ ތަޖުރިބާކޮށްފައިވެއެވެ.

މި ކެމްޕޭނުގެ މައިގަނޑު ބޭނުމަކީ ރާއްޖެއަކީ ހަމައެކަނި މުއްސަނދި ފަތުރުވެރިންނަށް ޚާއްޞަ ތަނެއް ނޫންކަމާއި އާއިލީ ދަތުރުތަކާއި ރޮމޭންޓިކް ދަތުރުތަކާއި އެޑްވެންޗާ ބޭނުންވާ ފަރާތްތަކަށް ވެސް ފުރިހަމަ މަންޒިލެއްކަން އިންޑިއާގެ ފަތުރުވެރިންނަށް ދައްކައިދިނުން ކަމަށް އެ ކޯޕަރޭޝަނުން ބުނެފައިވެއެވެ. ދެކުނު އޭޝިއާގައި ބާދުޝާގެ ލަވަތަކާއި ވީޑިއޯތަކަށް ބިލިއަނުން ސްޓްރީމް ލިބިފައިވާއިރު މިއުޒިކުގެ އިތުރުން ފެޝަނާއި ލައިފްސްޓައިލް ދާއިރާގައި ވެސް އޭނާގެ ނުފޫޒު ބޮޑުކަމުން ޒުވާން ޖީލުގެ ފަތުރުވެރިންނާ ހަމައަށް ރާއްޖެ ގެންގޮސްދިނުމަށް އޭނާއަކީ އެންމެ އެކަށީގެންވާ ބައިވެރިޔާ ކަމަށް ވިޒިޓް މޯލްޑިވްސް އިން ފާހަގަކޮށްފައިވެއެވެ.

މި ދަތުރުގައި ބާދުޝާ އުފެއްދި ކޮންޓެންޓްތައް ކުރިއަށް އޮތް ހަފުތާތަކުގައި އޭނާގެ ސޯޝަލް މީޑިއާ ޕްލެޓްފޯމްތައް މެދުވެރިކޮށް ޢާންމުކުރާނެ ކަމަށް ވިޒިޓް މޯލްޑިވްސް އިން ބުނެފައިވެއެވެ. އެގޮތުން އިންސްޓަގްރާމް ރީލްސްތަކާއި ޕޯސްޓްތަކާއި ޔޫޓިއުބް ވްލޮގްތައް ހިމެނޭ ކަމަށް އެ ކޯޕަރޭޝަނުން ބުނެފައިވެއެވެ.

ވިޒިޓް މޯލްޑިވްސްގެ ސީއީއޯ އިބްރާހީމް ޝިއުރީ ވިދާޅުވީ އިންޑިއާއަކީ ހަމައެކަނި ފަތުރުވެރިން ފޮނުވާ ޤައުމެއް ނޫން ކަމަށާއި ރާއްޖޭގެ ފަތުރުވެރިކަމުގެ މުސްތަޤުބަލަށް ނުހަނު މުހިންމު މާކެޓެއް ކަމަށެވެ

ވޯލްޑް ޓްރެވަލް އެންޑް ޓޫރިޒަމް ކައުންސިލުގެ ތަފާސް ހިސާބުތައް ދައްކާ ގޮތުން އިންޑިއާގެ ފަތުރުވެރިން ބޭރު ޤައުމުތަކުގައި ކުރާ ހޭދަ މިދިޔަ އަހަރު 34.6 ބިލިއަން ޑޮލަރުގައި ހުރިއިރު 2036 ވަނަ އަހަރާ ހަމައަށް އެ ޢަދަދު 71.8 ބިލިއަން ޑޮލަރަށް އުފުލޭނެ ކަމަށް އަންދާޒާ ކުރެވެއެވެ. މިދިޔަ އާދީއްތަ ދުވަހުގެ ނިޔަލަށް އިންޑިއާއިން ރާއްޖެއަށް 68,933 ފަތުރުވެރިން ޒިޔާރަތްކޮށްފައިވާއިރު އެއީ މި އަހަރު ރާއްޖެ އައި ޖުމްލަ ފަތުރުވެރިންގެ ހަ އިންސައްތައެވެ.