ޖަޕާނުގެ ބޮޑުވަޒީރު ސަނައެ ޓަކައިޗީގެ ކެބިނެޓާ މެދު ރައްޔިތުންގެ ހިތްހަމަނުޖެހުން ބޮޑުވެ ތާއީދު ނެތް ކަމަށް ބުނާ ނިސްބަތް ތާއީދުގެ ނިސްބަތް ފަހަނައަޅައި ގޮސް އިސްތިއުފާ ދެއްވާ ހިސާބަށް ގޮސްފި އެވެ.

ރިޕޯޓުތައް ބުނާގޮތުގައި މިދިޔަ ހޮނިހިރު އަދި އާދީއްތަ ދުވަހު ހެދި ޤައުމީ ސާވޭއިން ދައްކާ ގޮތުގައި ކެބިނެޓަށް ތާއީދުކުރާ ނިސްބަތް ޖޫން މަހާ އަޅައިބަލާއިރު 10 ޕޮއިންޓު ދަށަށް ގޮސް 41 އިންސައްތައަށް ވަނީ ވެއްޓިފައި އެވެ. ތާއީދު ނެތް ކަމަށް ބުނި މީހުންގެ ނިސްބަތް ނުވަ ޕޮއިންޓު އިތުރުވެ 44 އިންސައްތައަށް އެރީ 35 އިންސައްތައިން ކަމަށް ރިޕޯޓުތައް ބުނެއެވެ.

Advertisement

ޖޫން 20 އިން 21 އަށް ހެދި ސާވޭގައި ތާއީދުގެ ނިސްބަތް ހުރީ 51 އިންސައްތައިގައެވެ.

މިދިޔަ އޮކްޓޫބަރުގައި ޓަކައިޗީ މަޤާމާ ހަވާލުވެވަޑައިގެންނެވި ފަހުން މިފަދަ ދިރާސާތައް ކުރާ މައިނިޗީ ޝިމްބުންގެ ސާވޭގައި ތާއީދު 50 އިންސައްތައިން ދަށަށް ދިޔަ މިއީ ފުރަތަމަ ފަހަރެވެ.

ހަމަ އެހެންމެ ފާއިތުވި ހަފުތާގައި ޖަޕާނުގެ ބޮޑު މީޑިއާ ދެ ސާވޭއެއްގައި ކެބިނެޓުގެ ތާއީދު 50 އިންސައްތައިން ދަށަށް ގޮސްފައިވެއެވެ. މީގެ ތެރެއިން ޖީޖީ ޕްރެސް އިން މިދިޔަ ބުރާސްފަތި ދުވަހު ނެރުނު ވަކި ސާވޭއެއްގައި ކެބިނެޓުގެ ތާއީދު ހުރީ 49 އިންސައްތައިގައި ކަމަށާއި ކުރީ މަހާ އަޅައިބަލާއިރު 5.3 ޕޮއިންޓުގެ ދަށްވުމެއް ފާހަގަވި ކަމަށް ރިޕޯޓުކޮށްފައިވެއެވެ.

ޓަކައިޗީ މަޤާމާ ހަވާލުވެވަޑައިގެންނެވި ފަހުން ކެބިނެޓުގެ ތާއީދުގެ ނިސްބަތް ދަށަށް ދާ މިއީ ދެވަނަ ފަހަރެވެ. އެކަމަކު ހިތްހަމަނުޖެހުމުގެ ނިސްބަތް ތާއީދުގެ ނިސްބަތް ފަހަނައަޅައި ދިޔަ މިއީ ފުރަތަމަ ފަހަރަށެވެ.

ރިޕޯޓުތައް ބުނާގޮތުގައި މިފަދަ ސާވޭތަކުގެ ނަތީޖާ މިގޮތަށް ދައްކާ ނަމަ ޓަކައިޗީ އިސްތިއުފާދެއްވަން މަޖުބޫރު ވާނެ އެވެ.

ޓަކައިޗީ ބޮޑުވަޒީރު ކަމާއި ހަވާލުވެވަޑައިގެންނެވީ މިދިޔަ އަހަރުގެ އޮކްޓޯބަރު 21 ވަނަ ދުވަހު އެވެ. އޭނާ އަކީ ޖާޕާނުގެ ފުރަތަމަ އަންހެން ބޮޑުވަޒީރެވެ.