ޔޫކުރެއިނުގެ ދެކުނުގެ ބަނދަރު އޮޑެސާއިން ފުރައިގެން ދަތުރުކުރި މުދާ އުފުލާ ބޯޓެއް ކަމަށްވާ އެމްވީ ގޯލްޑެން ލިއޯ އަށް ރަޝިއާއިން ދިން ކްރޫޒް މިސައިލް ހަމަލާގައި ހަތަރު އިންޑިއާ ރައްޔިތުން މަރުވެ އިތުރު މީހެއްގެ ހާލު ސީރިއަސް ވެފައިވާ ކަމަށް އިންޑިއާގެ ޚާރިޖީ ވުޒާރާއިން ބުނެފިއެވެ.

މި ހާދިސާގައި ގީނީ ބިސައޫގެ ދިދައިގެ ދަށުން ދަތުރުކުރި މި ބޯޓަށް ރަޝިއާއިން ތިން ކްރޫޒް މިސައިލުން ހަމަލާ ދީފައިވާ ކަމަށް ޔޫކުރެއިނުގެ ކަނޑުގެ ސިފައިން ބުނެފައިވެއެވެ. ބޯޓުގައި 17 ފަޅުވެރިން ތިބި އިރު އެ ތެރެއިން ފަސް މީހުންނަކީ އިންޑިއާ ރައްޔިތުންނެވެ. ފަޅުވެރިންގެ ތެރޭގައި ދެން ހިމެނެނީ ސީރިއާ ރައްޔިތުންނެވެ. ރޮއިޓާސް ނޫސް އެޖެންސީން ހަވާލާދީފައިވާ އެލްއެސްއީޖީގެ ޑެޓާ ދައްކާ ގޮތުން މި ބޯޓުގެ ވެރިފަރާތަކީ އިންޑިއާގެ މުމްބާއީގައި ހިންގާ އޯޝަން ގްރޭސް ޝިޕިން ލިމިޓެޑެވެ.

Advertisement

ހަމަލާއަށް ފަހު ކުރިއަށް ގެންދިޔަ ސާޗް އެންޑް ރެސްކިއު އޮޕަރޭޝަންގައި 17 ފަޅުވެރިންގެ ތެރެއިން އަށް މީހެއް ސަލާމަތް ކުރެވުނު ކަމަށާއި ނުވަ މީހެއް މަރުވެފައިވާ ކަމަށް ޔޫކުރެއިނުގެ ސީޕޯޓްސް އޮތޯރިޓީން ބުނެފައިވެއެވެ. މަރުވި މީހުންގެ ތެރޭގައި ފަޅުވެރިންނާއި އެއް ކަނޑުގެ ޕައިލެޓް ހިމެނެއެވެ.

އިންޑިއާގެ ޚާރިޖީ ވުޒާރާއިން ނެރުނު ބަޔާނުގައި ބުނީ "ލިބިފައިވާ މަޢުލޫމާތަށް ބަލާއިރު ހަތަރު އިންޑިއާ ރައްޔިތުން ވަނީ ހިތާމަވެރި ގޮތަކަށް ފުރާނަ ގެއްލިފައެވެ. އެކެއްގެ ހާލު ސީރިއަސްވެ ހޮސްޕިޓަލުގައި ދަނީ ފަރުވާ ދެމުންނެވެ. ޔޫކުރެއިނުގައި ހުންނަ އަޅުގަނޑުމެންގެ މިޝަނުން ހާލަތު ގާތުން ބަލައި ހާދިސާގެ އަސަރު ކޮށްފައިވާ ފަރާތްތަކަށް ވީ އެންމެ ބޮޑު އެހީތެރިކަމެއް ފޯރުކޮށްދިނުމަށް މަސައްކަތް ކުރަމުންނެވެ" ކަމަށެވެ.

އެ ވުޒާރާއިން ވަނީ މި ހަމަލާ ކުށްވެރިކޮށް "ވިޔަފާރި ބޯޓުފަހަރަށް ހަމަލާ ދީ ކުށެއް ނެތް ޢާންމު ފަޅުވެރިންގެ ފުރާނައަށް ނުރައްކާ ކުރުމާއި ކަނޑުމަގުން ދަތުރުފަތުރާއި ވިޔަފާރީގެ މިނިވަންކަމަށް ހުރަސް އެޅުމަކީ ނުހަނު ނުބައި ޢަމަލެއް ކަމަށާއި އެފަދަ ކަންކަމުން ދުރުހެލިވާން ޖެހޭ" ކަމަށް ބުނެފައެވެ.

މީގެ އިތުރުން ހޯމަ ދުވަހު ވަކިން ދެވުނު ހަމަލާއެއްގައި އޮޑެސާ ސިޓީ އަށް ވެސް ރަޝިއާއިން ހަމަލާ ދީ ތިން މީހެއް މަރުވެ ތިން މީހެއް ޒަޚަމް ވެފައިވާ ކަމަށް އެ ސިޓީގެ އަސްކަރީ އިދާރާގެ ވެރިޔާ ސެރްހީ ލީސާކް ބުނެފައިވެއެވެ. އެ ހަމަލާގައި ބައެއް ވަސީލަތްތަކަށް ގެއްލުން ލިބުނު ކަމަށް ވެސް އޭނާ ބުނެފައިވެއެވެ. ޔޫކުރެއިނުގެ އެންމެ ބޮޑު ކަނޑުގެ ބަނދަރު ކަމަށްވާ އޮޑެސާ ވެފައި ވަނީ ޔޫކުރެއިން ހަނގުރާމައިގައި ރަޝިއާގެ ހަމަލާތައް ތަކުރާރުކޮށް އަމާޒުވާ ސަރަހައްދަކަށެވެ.