ހުޅުމާލޭ ދެވަނަ ފިޔަވަހީގެ ކަރަންޓު ވިއުގައަށް ގެންނަންޖެހޭ ޓެކްނިކަލް ބަދަލުތައް ގެނައުމުގެ މަސައްކަތް މާދަމާ ފެށުމަށް ތައްޔާރުވެފައިވާ ކަމަށް ބުނެފި އެވެ.

ސްޓެލްކޯއިން ބުނީ އެ މުއްދަތުގައި ބައެއް ސަރަހައްދުތަކުން ކަރަންޓުގެ ޚިދުމަތް ކުޑަ ވަގުތުކޮޅަކަށް މެދުކެނޑިދާނެ ކަމަށެވެ. މި މަސައްކަތް ކުރާތީ ދޭތެރެއަކުން ކަރަންޓު ކެނޑޭނީ މިމަހުގެ 31 ގެ ނިޔަލަށެވެ.

Advertisement

ދެވަނަ ފިޔަވަހީގެ ކަރަންޓުގެ ވިއުގަ ބެލެހެއްޓުން ރަސްމީކޮށް ސްޓެލްކޯއާ މިހާރު ހަވާލުކޮށްފައިވާ ކަމަށް އެ ކުންފުނިން ހާމަކޮށްފައިވެއެވެ. ކުރިން އެ ވިއުގަ ބެލެހެއްޓީ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިންނެވެ.

ސްޓެލްކޯއިން ބުނީ ރައްޔިތުންނަށް އިތުބާރުހުރި ދެމެހެއްޓެނިވި ޚިދުމަތެއް ފޯރުކޮށްދިނުމަށްޓަކައި ޚިދުމަތުގެ ފެންވަރު މަތިކުރުމުގެ މުހިންމު މަސައްކަތްތަކެއް ކުރަން ރާވާފައިވާ ކަމަށެވެ.

އެ ކުންފުނިން ވަނީ ކަސްޓަމަރުންނަށް ކުރިމަތިވެދާނެ ދަތިތަކަށް މަޢާފަށް އެދި މިއީ ދިގު މުއްދަތުގައި ޚިދުމަތުގެ ފެންވަރު ރަނގަޅު ކުރުމަށް ކުރެވޭ މަސައްކަތެއް ކަމަށް ބުނެ ކަސްޓަމަރުންގެ އެއްބާރުލުމަށް ޝުކުރު އަދާކޮށްފައެވެ.