"ކިންގް އޮފް ދަ ނޯތު" ގެ ނަމުން މަޝްހޫރު އެންޑީ ބާނަމް އިނގިރޭސިވިލާތުގެ ބޮޑުވަޒީރުކަމުގެ މަގާމާ ރަސްމީކޮށް ހަވާލުވެއްޖެއެވެ.

އުމުރުން 56 އަހަރުގެ ބާނަމް އެ މަގާމަށް އައީ ކުރީގެ ބޮޑުވަޒީރު ކެއާ ސްޓާމާ ޖެހިޖެހިގެން ދިމާވި އިންތިޚާބީ ނާކާމިޔާބީތަކާއި ސިޔާސީ ސްކެންޑަލްތަކާ ގުޅިގެން މިދިޔަ މަހު މަގާމުން އިސްތިއުފާ ދޭން ރުހުމުންނެވެ.

Advertisement

ބާނަމް ލީޑަރުކަމާ ހަވާލުވީ ވާދަކުރާނެ އެހެން ކެންޑިޑޭޓަކު ނެތިއެވެ. މިއީ ހަތަރު އަހަރު ތެރޭ އިނގިރޭސި ބޮޑުވަޒީރު ކަމާއި ހަވާޅުވި ފަސްވަނަ ބޭފުޅާ އެވެ.

ބާނަމް މަގާމާއި ހަވާލުވެވަޑައިގެން ދެއްވި ފުރަތަމަ ތަގުރީރުގައި ކުރީގެ ބޮޑުވަޒީރުން ބޭނުންކުރައްވާ ލެކްޓަން ދޫކުރައްވައި މިނިވަންކޮށް ހުންނަވައިގެން ވާހަކަ ދެއްކެވީ ގެންގުޅުއްވަން ބޭނުންފުޅުވާ ލުއި ސްޓައިލާ އެއްގޮތަށެވެ. އޭނާ ވިދާޅުވީ މިފަހަރުގެ ވެރިކަން ވެގެންދާނީ މިދޔަ 40 އަހަރު ތެރޭގައި އެންމެ ބޮޑު ބަދަލެއް ގެންނާނެ ވެރިކަމަށް ކަމަށެވެ.

އެގޮތުން ދިރިއުޅުމުގެ ޚަރަދުގެ ކަންކަމަށް ލުޔެއް ދެއްވާނެ ކަމަށާއި ފުރަތަމަ އެންގެވުމަކީ މަގުމަތީ ނިދުން ހުއްޓުވުން ކަމަށް ވެސް ވިދާޅުވިއެވެ. އަދި 1980 ވަނަ އަހަރުން ފެށިގެން އެ ގައުމުގައި އަށަގަނެފައިވާ ބާރުތައް މައި ސަރުކާރަށް ޖަމާކޮށް އިގުތިސާދީ ބާރު ޕްރައިވެޓައިޒް ކުރުމުގެ ސިޔާސަތުތައް ބަދަލުކުރައްވާނެ ކަމަށް ވައުދުވެވަޑައިގެންނެވިއެވެ.

ބާނަމް ބޮޑުވަޒީރުކަމާ ހަވާލުވެވަޑައިގެންނެވީ ދިރިއުޅުމުގެ ޚަރަދު ބޮޑުވުމާއި ނެޝަނަލް ހެލްތު ސާވިސް (އެންއެޗްއެސް) ހީނަރުވުމާއި ހިޖުރައާ ބެހޭ ބަހުސާއި ނައިޖެލް ފަރާޖް ގެ ހާޑް-ރައިޓް ރިފޯމް ޔޫކޭ ޕާޓީގެ ގޮންޖެހުމާ ކުރިމަތިލައްވަން ޖެހިވަޑައިގެންފައިވާ ދަނޑިވަޅެއްގައެވެ.

ފާއިތުވި ދިހަ އަހަރެއްހާ ދުވަހުގެ ތެރޭ ހަތް ބޮޑުވަޒީރުން ބަދަލުވި އިނގިރޭސިވިލާތުގެ ސިޔާސީ ހަލަބޮލިކަމާއި އިގުތިސާދީ ހީނަރުކަމަށް ނިމުމެއް ގެނެވޭނެތޯ މިހާރު ސުވާލު އުފެދެނީ ބާނަމް އާ މެދުގައެވެ.