އަންހެނަކާ ދެމެދު ހިނގި މުޢާމަލާތްތަކެއްގެ މައްސަލައިގައި ސިންގަޕޫރުގެ އިސްލާމީ ކަންތައްތަކާ ބެހޭ ވުޒާރާގެ ވަޒީރުގެ މަސްއޫލިއްޔަތާ ވަގުތީ ގޮތުން ހަވާލުވެ ހުންނެވި ފައިސަލް އިބްރާހީމް މަގާމުން އިސްތިއުފާ ދެއްވައިފިއެވެ.

ސިންގަޕޫރުގެ ބޮޑުވަޒީރު ލޯރެންސް ވޮންގް ހޯމަ ދުވަހު ނެރުއްވި ބަޔާނެއްގައި ވިދާޅުވީ ފައިސަލް އާއި އެ އަންހެން މީހާއާ ދެމެދު ބޮޑަށް ވާހަކަ ދެކެވިފައި ވަނީ އޮންލައިން މެސެޖުތައް މެދުވެރިކޮށް ކަމަށެވެ. އޭގެ އިތުރުން ޢާންމު ހަރަކާތްތަކުގެ ހަވާސާގައި ވެސް ދެ ފަރާތް ބައްދަލުވެފައިވާ ކަމަށް ވިދާޅުވިއެވެ.

Advertisement

ދެ ފަރާތުން ވެސް އެކަކު އަނެކެއްގެ މައްޗަށް ފުރައްސާރައިގެ ތުހުމަތު ކޮށްފައިވާ ކަމަށާއި އެ މައްސަލަ ފުލުހުން ބަލަމުންދާ ކަމަށް ބޮޑުވަޒީރު ވިދާޅުވިއެވެ.

ވޮންގް ވިދާޅުވި ގޮތުގައި ޖިނާއީ ކުށެއް ދެ ފަރާތުގެ ކިބައިން ވެސް ފެނިފައެއް ނުވެއެވެ. އަދި ޖިނާއީ ފިޔަވަޅެއް ނާޅާނެއެވެ. ނަމަވެސް "ސިޔާސީ މަގާމެއް ފުރާ ބޭފުޅެއްގެ އަދި ޕާލަމެންޓް މެންބަރެއްގެ ސުލޫކީ މިންގަނޑާ އެސޯސިއޭޓް ޕްރޮފެސަރު ފައިސަލްގެ ޢަމަލުތައް އެއްގޮތްވޭތޯ ވަކި ސުވާލެއް އެބައޮތް" ކަމަށް ވިދާޅުވިއެވެ.

2006 ވަނަ އަހަރުން ފެށިގެން ޕާލަމެންޓް މެންބަރެއްގެ ގޮތުގައި ހުންނެވި ފައިސަލް 2025 ވަނަ އަހަރު މުސްލިމް ކަންތައްތަކާ ބެހޭ ވަޒީރުގެ މަސައްކަތާ ވަގުތީ ގޮތުން ހަވާލުވެވަޑައިގެންނެވިއެވެ. މިހާރު ވެރިކަންކުރާ ޕީޕަލްސް އެކްޝަން ޕާޓީ (ޕީއޭޕީ) ގެ މެންބަރުކަމުންނާއި ކެބިނެޓް މަގާމުން ވެސް އޭނާ ވަނީ އިސްތިއުފާ ދެއްވައިފައެވެ.

ބޮޑުވަޒީރުގެ އޮފީހުގެ ވެބްސައިޓުގައި ޝާއިޢުކުރި އިސްތިއުފާ ސިޓީގައި ފައިސަލް ވިދާޅުވީ "ދެ ފަރާތުގެ ދެމެދުގައި ޖިސްމާނީ ގުޅުމެއް ނެތް" ކަމަށާއި "މުޢާމަލާތްތައް އެ ހިސާބަށް ގެންދިއުމުގެ ނިޔަތެއް ވެސް ނެތް" ކަމަށެވެ. އެހެން ނަމަވެސް "ކަންކަން ކޮންޓްރޯލް ކުރުމުގައި ބައެއް ކަންކަން ފާހަގަނުކޮށް ދޫކޮށްލެވުނީ ވިސްނުންތެރިކަމެއް ނެތި" ކަމަށް ޤަބޫލުކުރައްވާ ކަމަށް ވިދާޅުވިއެވެ.

"ސާފު ހުދު" ނަޒާހާތްތެރިކަމުގެ ނަމޫނާއެއް ކަމަށް ދެކޭ ޕީއޭޕީ ފަހުގެ އަހަރުތަކުގައި ތަފާތު ސިޔާސީ ކެހެރެސް ތަކާ ކުރިމަތިލާން ޖެހިފައިވެއެވެ. 2023 ވަނަ އަހަރު އޭރުގެ ޓްރާންސްޕޯޓް މިނިސްޓަރު ސުބްރަމާނިއަމް އިސްވަރަން ރިޝްވަތުގެ ތުހުމަތުގައި ތަޙުޤީޤު ކުރެވި ޖެހިގެން އައި އަހަރު 380,000 ސިންގަޕޫރު ޑޮލަރު (294,000 އެމެރިކާ ޑޮލަރު) ގެ ހަދިޔާ ލިބިގަތް ކަމަށް ކުށް ޤަބޫލުކުރިއެވެ. ހަމަ 2023 ގައި އެންމެ ބޮޑު އިދިކޮޅު ޕާޓީގެ ދެ އިސް މެންބަރަކު ލޯބީގެ ގުޅުމެއް އޮންނަ ކަމަށް އެއްބަސްވެ މަގާމުން ވަކިވިއެވެ.

މި ކަންކަމާ ގުޅިގެން ކުރީގެ ބޮޑުވަޒީރު ލީ ޝެން ލޫންގް ވެސް ޕާޓީގެ ތަޞައްވުރަށް ގެއްލުން ލިބިފައިވާ ކަމަށް ވިދާޅުވެފައިވެއެވެ. ފައިސަލްގެ އިސްތިއުފާއާ ގުޅިގެން ބޮޑުވަޒީރު ވޮންގް ވިދާޅުވީ މި ޙާލަތުގައި ފައިސަލް ސިޔާސީ ދާއިރާ ދޫކޮށްލެއްވުމުން ހިތާމަކުރައްވާ ކަމަށެވެ.