ހުޅުމާލެ ފޭސް ދޭއްގެ ހިޔާ ޕާކު ހިމެނޭ ސަރަހައްދުގައި ރޭ ކުޑަކުދިންގެ ދެ ގުރޫޕެއްގެ ދެމެދުގައި ހިނގި މާރާމާރީއަކާ ގުޅިގެން އޭގެ ތެރެއިން އެއް ކުއްޖަކު ހައްޔަރުކޮށްފި އެވެ.

މި މައްސަލަ ފުލުހުންނަށް ރިޕޯޓު ކުރީ ރޭ 8:40 ހާއިރު އެވެ. މި މައްސަލައިގަ ހައްޔަރު ކުރީ 16 އަހަރުގެ ފިރިހެން ކުއްޖެކެވެ.

Advertisement

ފުލުހުން ބުނީ މި ހަމަނުޖެހުމުގައި ޢަމަލީ ގޮތުން ބައިވެރިވީ 16 އަހަރާއި 17 އަހަރާ ދެމެދުގެ ޢުމުރުފުރައިގެ ކުދިން ކަމަށެވެ. ފުލުހުން ބުނީ މި މާރާމާރީގައި އެއްވެސް ކުއްޖަކަށް ބޮޑު އަނިޔާއެއް ވެފައި ނުވާ ކަމަށެވެ.

މާރާމާރީ ހިންގަން މެދުވެރިވި ސަބަބު ފުލުހުން ހާމައެއް ނުކުރެ އެވެ.

މި މައްސަލަ ފުލުހުން ދަނީ ތަހުގީގު ކުރަމުންނެވެ.

ހިޔާ ސަރަހައްދުގައި މިހާރު ގިނަ އަދަދެއްގެ ކުޑަކުދިން ގްރޫޕު ހަދައިގެން އުޅޭކަން އެ ސަރަހައްދުގައި ދިރިއުޅޭ މީހުން ފާހަގަ ކުރެ އެވެ. އަދި އެ ކުދިން ހަޑިހުތުރު ބަހުން އެއްބަޔަކު އަނެއް ބަޔަކަށް މުއާމަލާތް ކުރުމާއި ރޭގަނޑުގެ ދަންވަރުގެ ވަގުތާއި ޖެހެންދެންވެސް ކުދިން ތިބޭކަން ފާހަގަ ކުރެ އެވެ.

މިދިޔަ ހަފްތާގައި ވިލިމާލޭގައި ވެސް ދެ ގްރޫޕެއްގެ މެދުގައި މާރާމާރީ ހިންގައިގެން ރިޕޯތު ކުރި އެވެ. އެ ހާދިސާގައި އަނިޔާވި ހަތަރު މީހަކަށް ހޮސްޕިޓަލުގައި ފަރުވާ ދީފައިވެ އެވެ.