ރޭ އޮތް ފީފާ ވޯލްޑްކަޕް ފުޓުބޯޅަ މުބާރާތުގެ ފައިނަލް މެޗަށް ފަހު ހިނގި ހަމަނުޖެހުންތަކާއި ޗެމްޕިއަން ޓީމަށް ޓްރޮފީ ދިން މަންޒަރު ދިވެހިންނަށް ފެންނަ ގޮތެއް ނުވި އެވެ. 

ފައިނަލްގައި 90 މިނެޓު ކުޅެގެން ދެ ޓީމަށް ލަނޑެއް ނުޖެހެ އެވެ. ރޭގެ މެޗުގައި އާޖެންޓީނާގެ މައްޗަށް ސްޕެއިން 1-0 ން ކުރި ހޯދީ އިތުރު 30 މިނެޓުގެ ކުޅުމުގެ ތެރެއިން ދެ ވަނަ ހާފް ނިމެން އުޅެނިކޮށެވެ.

Advertisement

މި މެޗު ނިމިގެން ކުޅުންތެރިން އުފާފާޅު ކުރަން ފެށިތަނާ ރާއްޖެއަށް ވޯލްޑްކަޕްގެ މަންޒަރުތައް ގެނެސްދޭ މީޑިއާނެޓުގެ ހިދުމަތް މެދުކެނޑުނެވެ. އަލުން ހިދުމަތް ދިނީ ގާތްގަނޑަކަށް ފަތިހު ހަތަރެއް ޖަހަނިކޮށެވެ.

މީޑިއާ ނެޓަށް ދިމާވި މައްސަލަ އާއި ގުޅިގެން ގިނަ ބަޔަކު ސޯޝަލް މީޑިއާގައި ފާޑުކިޔާފައިވެ އެވެ. ފާޑު ކީ މީހުން ވަނީ ހިދުމަތް ދޭ ގޮތާއި މެދު ސުވާޅު އުފައްދާފައި އެވެ.

އެގޮތުން ސަރުކާރާއި ގުޅިގެން ހިލޭ ވޯލްޑްކަޕް ބެލޭނެ ކަމަށް ބުނުމަށް ފަހު ވޯލްޑް ކަޕް ހުޅުވުމުގެ ރަސްމިއްޔާތުވެސް ހިލޭ ބަލަން ފެށުނީ އެ ރަސްމިއްޔާތު ނިމެން 30 މިނެޓަށް ވީފަހުން ކަމަށް ބުނެފައިވެ އެވެ.

ހިތްހަމަ ނުޖެހުނު ބައެއް މީހުން ވަނީ އާޖެންޓިނާ ބަލިވުމުން ސިގްނަލް ކަނޑާލީ ކަމަށްވެސް ބުނެފައި އެވެ.

ގިނަ ބަޔަކު ސޯޝަލް މީޑިއާގައި ފާޑުކިޔަމުން ދަނިކޮށް ހިދުމަތް މެދުކެނޑުނުތާ ވިއްސަކަށް މިނެޓު ފަހުން މީޑިއާނެޓުން ސޯޝަލް މީޑާގައި ބުނީ އެ އޮފީހުން ކަރަންޓު ކެނޑުނީ ކަމަށާއި ވީހާވެސް އަވަހަކަށް ހިދުމަތް އަލުން ދިނުމަށް މަސައްކަތް ކުރަމުންދާ ކަމަށެވެ.

އަދި ނުފެނި ގެއްލުނު ބައި އަލުން ބެލޭނެ ގޮތް ހަމަޖައްސައިދޭނެ ކަމަށެވެ. ނަމަވެސް މިއަދު ހެނދުނު 10 ޖެހުމާއި ހަމައަށްވެސް ރޭ ކަރަންޓު ކެނޑިގެން އާންމުންނަށް ނުފެނުނު ޓްރޮފީ ދޭ ރަސްމިއްޔާތުގެ ބައި ބެލޭ ގޮތެއް ނުހަދަ އެވެ.