އިންޑިއާގެ ތަޢުލީމީ ނިޒާމުގެ މައްސަލަތަކާ ދެކޮޅަށް 20 ދުވަހަށް ވުރެ ގިނަ ދުވަހު ބަނޑުހައިހޫނުކަމުގެ ހަޅުތާލުގައި ހުރި ޙައްޤުތަކަށް ވަކާލާތުކުރާ ސޯނަމް ވަންޗުކް ތިން ޝަރުތެއް ފުރިހަމަވެގެން ނޫނީ ހަޅުތާލު ހުއްޓައިނުލާނެ ކަމަށް ބުނެފިއެވެ.

ނިއު ދިއްލީގެ ސަފްދަރްޖަންގް ހޮސްޕިޓަލުގައި "ޣައިރު ޤާނޫނީ ގޮތުން ބަންދުކޮށްފައި" ހުރި ކަމަށް ސިފަކޮށް ވަންޗުކް އަތުން ލިޔެ ޢާންމުކުރި ސިޓީގައި ފުރަތަމަ ޝަރުތެއްގެ ގޮތުގައި ހުށަހެޅީ ތަޢުލީމީ ނިޒާމުގައި ހުރި "ނާކާމިޔާބީ"ތަކުގެ ޒިންމާ ސަރުކާރުން ނެގުމެވެ. ޚާއްޞަކޮށް ނީޓް (އެންއީއީޓީ) އިމްތިޙާނުގެ ސުވާލު ކަރުދާސް ލީކުވި މައްސަލައިގައެވެ.

ދެވަނަ ޝަރުތަކީ ސުވާލު ކަރުދާސް ލީކުވި މައްސަލަ ޕާލިމެންޓުގައި ނެގޭނެ ކަމުގެ ޔަގީންކަން ސިޔާސީ ލީޑަރުން ދިނުމެވެ. ތިންވަނަ ޝަރުތެއްގެ ގޮތުގައި ވަންޗުކް އެދުނީ ޞިއްޙީ ޙާލަތު ހުރި ގޮތުން ޕާލިމެންޓާ ދިމާއަށް ބާއްވާ ހިނގާލުމުގައި ބައިވެރިނުވެވިއްޖެ ނަމަ އިސް ސިޔާސީ ލީޑަރުން ހޮސްޕިޓަލަށް ޒިޔާރަތްކޮށް އެ ދެ ޝަރުތުގެ ޔަގީންކަން ދިނުމެވެ.

ވަންޗުކް ސިޓީ ނިންމާލީ "ޣައިރު ޤާނޫނީ ބަންދުގައި" ހުރެ ދަތުރުފަތުރުކުރުމާއި ވާހަކަ ދެއްކުމާއި މުވާޞަލާތީ ހުރިހާ މިނިވަންކަމެއް ހިފެހެއްޓިފައިވާ ކަމަށް ބުނަމުންނެވެ. 

ދިއްލީގެ މުޒާހަރާ ކުރަމުންދިޔަ ސަރަހައްދުން ފުލުހުން ވަނީ ވަންޗުކް ގަދަކަމުން ހޮސްޕިޓަލަށް ގެންގޮސް އެޑްމިޓްކޮށްގެން ފަރުވާދޭން ފަށާފައި އެވެ. 21 ދުވަސް ފަހުން ހޮސްޕިޓަލަށް ގެންދިޔަ ނަމަވެސް އޭނާ އަދިވެސް ކާއެއްޗެއް ނުކާއިރު ހޮސްޕިޓަލުން އަދި އެޑްމިޓްކޮށްފައި އޮތް ތަނުން ނުކުތުމަށް ހައި ކޯޓުގެ އަމުރު ނެތް ކަމަށް ބުނެ ފުލުހުން ދަނީ ވަންޗުކް ހޮސްޕިޓަލުގައި ހިފަހައްޓަމުންނެވެ.

ތަޢުލީމީ ދާއިރާގައި ހަރަކާތްތެރިވާ ވަންޗުކް ވަނީ ޖޫން 28 ގައި ނިއު ދެއްލީގެ ޖަންތަރް މަންތަރުގައި ކޮކްރޯޗް ޖަންތާ ޕާޓީ (ސީޖޭޕީ) އިން ބޭއްވި އެއްވުމާ ގުޅިފައެވެ. ނީޓް ސުވާލު ކަރުދާސް ލީކުވި މައްސަލައިގައި ތަޢުލީމީ ވަޒީރު ދަރްމެންދްރާ ޕްރަދާން އިސްތިއުފާ ދިނުމަށް ގޮވައިލައި އެ ހިސާބުން ބަނޑުހައިހޫނުކަމުގެ ހަޅުތާލު ފެށީއެވެ.

ޑޮކްޓަރުން ވަންޗުކްގެ ޙާލު "ކުއްލި ނުރައްކަލެއް"ގެ ގޮތުގައި ސިފަކޮށް ގުނަވަންތައް ފެއިލްވެދާނެ ކަމުގެ ބިރު އޮތް ކަމަށް ބުނުމުން ވަންޗުކްގެ ފުރާނަ ސަލާމަތްކުރަން ކުރެވެން ހުރި ހުރިހާ ކަމެއް ކުރުމަށް ދެއްލީ ހައި ކޯޓުން ސަރުކާރަށް އެންގިއެވެ. އޭގެ އެއް ދުވަސް ފަހުން ފުލުހުން ވަންޗުކް ސަފްދަރްޖަންގް ހޮސްޕިޓަލަށް ބަދަލުކުރިއެވެ.

ވަންޗުކްގެ އަންހެނުން ގީތާންޖަލީ އަންގްމޯ ވަނީ އާދީއްތަ ދުވަހު ދިއްލީ ހައި ކޯޓަށް ގޮސް ވަންޗުކް ޕްރައިވެޓް ހޮސްޕިޓަލަކަށް ބަދަލުކޮށްދިނުމަށް އެދިފައެވެ. ނަމަވެސް ކޯޓުން ވަގުތީ ލުޔެއް ނުދިނެވެ.

ޖަސްޓިސް މިނީ ޕުޝްކަރްނާ ވިދާޅުވީ ވަންޗުކް އަމިއްލައަށް ހޮސްޕިޓަލަށް ނުދިޔައީތީ ސަރުކާރުން އޭނާ ސަރުކާރު ހޮސްޕިޓަލެއް ކަމަށްވާ ސަފްދަރްޖަންގަށް ބަދަލުކުރުމަކީ ސަރުކާރުގެ "ޙައްޤެއް" ކަމަށެވެ. "ހޮސްޕިޓަލުގެ ޑޮކްޓަރުން ގާތުން ބަލަމުން ގެންދާތީ އަދި ވަންޗުކްގެ ރުހުމާ އެކު އަނގައިން ބޭސް ދީފައިވާތީ ގަދަކަމުން ކަމެއް ކުރެވޭ ކަމަށް ނުވަތަ އޭނާގެ އިޚްތިޔާރަށް ހުރަސް އެޅޭ ކަމަށް ނުބެލެވެއެވެ. މި ވަގުތު ވަގުތީ އަމުރެއް ނެރެންޖެހޭ ކަމަކަށް ނުފެނެއެވެ" ކަމަށް ފަނޑިޔާރު ވިދާޅުވިއެވެ.

ސީނިއާ ވަކީލް ވިވެކް ޓަންކާ އެންޑީޓީވީއަށް ބުނީ މި އަމުރާ ދެކޮޅަށް ދެ ފަނޑިޔާރުންގެ ބެންޗެއްގައި އިސްތިއުނާފުކޮށް އަވަސް އަޑުއެހުމެއް ހޯދުމަށް އަންގްމޯ މަސައްކަތް ކުރާނެ ކަމަށެވެ.