އިސްތިއުމާރީ އިޒްރޭލުގެ ހަނގުރާމައިގައި ޣައްޒާގެ ތަޢުލީމީ ނިޒާމު އެއްކޮށް ހަލާކުވެފައި ވަނިކޮށް ޣައްޒާ ސިޓީގައި ލަކުޑި ބޭނުންކޮށްގެން ބިނާކުރި ސްކޫލެއްގައި ގާތްގަނޑަކަށް 850 ދަރިވަރުންނަށް ކިޔަވައިދޭން ފަށައިފިއެވެ.

މި ސްކޫލް ބިނާ ކުރީ ތުރުކީ އާއި ސީރިއާގެ ފައިސާގެ އެހީގައި އެވެ. ވެފާގް ހިއުމެނިޓޭރިއަން ފައުންޑޭޝަނުން އެޅި މި ސްކޫލަށް ކިޔަނީ "ފްރެންޑްސް އޮފް ޕެލެސްޓައިން ސްކޫލް" އެވެ.

ދެ މަސް ދުވަހުގެ ތެރޭގައި 400 އަކަ މީޓަރުގެ ބިމެއްގައި ހެދި މި ސްކޫލުގައި ހަ ކްލާސްރޫމް ހިމެނެއެވެ. ކޮންމެ ކްލާސްރޫމެއްގައި ގާތްގަނޑަކަށް 35 ދަރިވަރުންނަށް ޖާގަ ލިބޭ ގޮތަށް ތިން ޝިފްޓުގެ ނިޒާމެއް ހިންގައިގެން ޖުމްލަ 850 ދަރިވަރުން ކިޔަވަމުން ގެންދާ ކަމަށް ވެފާގް ފައުންޑޭޝަނުގެ މީޑިއާ ޑައިރެކްޓަރު މުޞްޠަފާ އަލް-މަލާޙީ ވިދާޅުވި އެވެ.

ތިން އަހަރެއްހާ ދުވަހު ކިޔެވުމާ ދުރުގައި ތިބެން ޖެހުނު ގާޒާގެ ކުދިންނަށް މި ސްކޫލުން ލިބުނީ އާ ފެށުމެކެވެ. މި ސްކޫލުގައި ތައުލީމު ހާސިލް ކުރަން ފަށާފައިވާ ކުދިން ބުނެފައިވާ ގޮތުގައި އެކުދިން ތިބީ ޑެސްކާއި ގޮނޑީގައި އިށީނދެގެން ކިޔެވުން ހަނދާން ނެތިފައި އެވެ.

މި ސްކޫލް ބިނާ ކުރުމުގައި ވެފާގް ފައުންޑޭޝަކަށް ބޮޑެތި ހުރަސްތަކާއި ކުރިމަތިވި ކަމަށް އެ ޖަމިއްޔާ އާއި ހަވާލާދީ ރިޕޯޓުތައް ބުނެ އެވެ. އެގޮތުން ލަކުޑި ހޯދުން ދަތިވުމާއި ކަރަންޓު ކެނޑޭލެއް ގިނަ ކަމުން މަސައްކަތް ލަސްވި އިރު މަސައްކަތް ނިމުމުން ކިޔަވައިދޭން ބޭނުންވާ ސާމާނު ހޯދުމުގައިވެސް ދަތިތަކާއި ކުރިމަތިވި ކަމަށް ބުންޏެވެ.

ކިޔަވައި ދިނުމަށް ބޭނުންވާ ސާމާނު ލިބުމުގައި ދަތިވީ ގާޒާގައި ތަކެތީގެ އަގު ބޮޑު ކަމުންނެވެ. އެ ޖަމާއަތުން ބުނީ މިހާރު ގާޒާގައި ވައިޓް ބޯޑު މާކަރެއްގެ އަގަކީ 10 އެމެރިކާ ޑޮލަރެވެ.

ފަލަޞްޠީނުގެ ތަޢުލީމާ ބެހޭ ވުޒާރާއިން ރާވަނީ މި ސްކޫލުގެ ދަރިވަރުންގެ ޢަދަދު ގާތްގަނޑަކަށް 2200 އަށް އިތުރުކޮށް ހަމަ ލަކުޑީގެ މޮޑެލް ބޭނުންކޮށްގެން ޣައްޒާ ސިޓީގެ އައް-ނަޞްރު އަވަށުގައި އެހެން ސްކޫލެއް ޤާއިމުކުރުމަށް ކަމަށް އެ ޖަމިއްޔާއިން ބުންޏެވެ.

ގާޒާ ސަރުކާރުގެ މީޑިއާ އޮފީހުން ބުނެފައިވާ ގޮތުގައި ހަނގުރާމައިގެ ކުރިން އެ ސިޓީގައި ސަރުކާރާއި އަމިއްލަ ފަރާތްތަކުން ހިންގާ 796 ސްކޫލް ހުއްޓެވެ. އޭގެ ތެރެއިން 499 ސްކޫލާއި ޔުނިވާސިޓީ އަދި ތަޢުލީމީ މުއައްސަސާއަށް ބޮން އެޅި ނުވަތަ ގެއްލުން ލިބިފައިވެއެވެ.

118 ސްކޫލު އެއްކޮށް ހަލާކުވެފައިވާ އިރު 382 ސްކޫލަށް ބައެއް ގެއްލުން ލިބިފައިވެއެވެ. ބާކީ ހުރި ގިނަ ސްކޫލުތައް ވެސް ބޮޑެތި ގެއްލުން ލިބިފައިވުމުން ނުވަތަ ގެދޮރު ގެއްލިފައިވާ ޢާއިލާތަކުގެ ވަގުތީ ހިޔާތަކަށް ބަދަލުވެފައިވުމުން ކިޔަވައިދިނުން ހުއްޓިފައިވެއެވެ.

މި ސަބަބާ ހެދި 620000 އަށް ވުރެ ގިނަ ދަރިވަރުން ތަޢުލީމުން މަޙުރޫމުވެފައިވާ ކަމަށާއި އިސްތިއުމާރީ އިޒްރޭލުގެ ލަޝްކަރުން 20000 އަށް ވުރެ ގިނަ ދަރިވަރުން ޝަހީދުކޮށްލާފައިވާ ކަމަށް ވެސް އެ އޮފީހުން ބުނެފައިވެއެވެ.

ގާތްގަނޑަކަށް ތިން އަހަރު ވެގެންދިޔަ މި ހަނގުރާމައިގައި ގާޒާގެ ތަޢުލީމީ ނިޒާމު ވަނީ ބިމާ ހަމަކޮށްލާފައި އެވެ.