މާލޭގައި ހިންގި ވައްކަމާއި ފޭރުމުގެ މައްސަލަތަކުން ގެއްލުނު 98 ޕަސެންޓު ފައިސާ އަނބުރާ ހޯދައިފި އެވެ.

ފުލުހުން ބުނީ މާލެ ސަރަހައްދުން ވައްކަމާއި ފޭރުމުގެ ހާދިސާތަކުގައި ގެއްލިގެން ރިޕޯޓުކުރީ 838,434 ރުފިޔާ ކަމަށެވެ. އޭގެ ތެރެއިން 826,730 ރުފިޔާ ފުލުހުންގެ މަސައްކަތުން އަނބުރާ ހޯދިފައިވާ ކަމަށެވެ.

Advertisement

އެއީ މި މަހުގެ ފަސް ވަނަ ދުވަހުން ފެށިގެން 11 ވަނަ ދުވަހާ ހަމައަށް ރިޕޯޓު ކުރި މައްސަލަތަކުގައި ހިމެނޭ ފައިސާ އެވެ.

ފުލުހުން އާންމުކުރި ތަފާސްހިސާބުތައް ދައްކާ ގޮތުން އެންމެ ބޮޑު ޢަދަދެއް ގެއްލިގެން ހުށަހެޅީ މާފަންނު ޕޮލިސް ސްޓޭޝަނަށެވެ. އެ ސްޓޭޝަނަށް އެކަނިވެސް 407,553 ރުފިޔާގެ މައްސަލަ ހުށަހެޅިއިރު ގަލޮޅު ޕޮލިސް ސްޓޭޝަނަށް 203,968 ރުފިޔާ އަދި ހެންވޭރު ޕޮލިސް ސްޓޭޝަނަށް 200,578 ރުފިޔާގެ މައްސަލަ ހުށަހެޅުނެވެ. އެ މުއްދަތުގައި ވެލާނާ އިންޓަނޭޝަނަލް އެއާޕޯޓާއި ޓޫރިސްޓު ޕޮލިހަށް 26,335 ރުފިޔާ ގެއްލިގެން ރިޕޯޓުކޮށްފައިވެއެވެ.

ފައިސާ ރިކަވާ ކުރުމުގެ ނަތީޖާއަށް ބަލާއިރު އެއާޕޯޓުން ގެއްލުނު ޢަދަދު މުޅިން ހޯދައިފައިވެއެވެ. މާފަންނު ޕޮލިހުން 396,888 ރުފިޔާ އަދި ގަލޮޅު ޕޮލިހުން 225,215 ރުފިޔާ ހޯދާފައިވާއިރު ހެންވޭރު ޕޮލިހުން ވަނީ 175,250 ރުފިޔާ އަނބުރާ ހޯދައިފައެވެ. މީގެ އިތުރުން ކުރިން ވިލިމާލެ ޕޮލިސް ސްޓޭޝަނަށް ހުށަހެޅި މައްސަލައެއްގައި ގެއްލުނު ފައިސާގެ ތެރެއިން 3,042 ރުފިޔާ ވެސް އެ ހަފުތާގައި ވަނީ އަނބުރާ ހޯދައިފައެވެ.

ފުލުހުން ބުނީ މި ނަތީޖާއިން ހާމަވަނީ ގެއްލުނު ފައިސާ ވެރިފަރާތާ ހަވާލުކުރުމަށް ފުލުހުންގެ އޮފިސަރުން ވަރުބަލިކަމެއް ނެތި ކުރާ ބުރަ މަސައްކަތް ކަމަށެވެ. ފައިސާ ރިކަވާ ކުރުމަކީ ޓީމެއްގެ ގޮތުގައި ކުރެވޭ މަސައްކަތެއް ކަމަށާއި އެއީ މުޖުތަމަޢަށް ކުރެވޭ ޚިދުމަތެއް ކަމަށް ފުލުހުން ފާހަގަކޮށްފައިވެއެވެ.

ރައްޔިތުންގެ ފަރާތުން ލިބިފައިވާ އިތުބާރު ދެމެހެއްޓުމުގައި ދެމިތިބޭނެ ކަމަށް ފުލުހުން ބުނެފައިވާއިރު މި ހަފުތާގެ ތެރޭގައި ހޯދި ފައިސާގެ ނިސްބަތުން ބެލިޔަސް ރިކަވަރީ ރޭޓް 98 އިންސައްތައަށް ވަނީ އަރައިފައެވެ.