ކޮމިޝަނާ ޖެނެރަލް އޮފް ޓެކްސޭޝަން ގެ މަގާމަށް ގދ. ގައްދޫ ކޯޒީރައުންޑް، ފާތިމަތު އަމީޒާ އައްޔަން ކުރައްވައިފި އެވެ.

ރައީސް އޮފީހުން މައުލޫމާތު ދޭގޮތުގައި އަމީޒާ އެ މަގާމަށް ރައީސުލްޖުމްހޫރިއްޔާ އައްޔަން ކުރެއްވީ މިދިޔަ ބުރާސްފަތި ދުވަހު އެވެ. މިއީ މޯލްޑިވްސް އިންލެންޑް ރެވެނިއު އޮތޯރިޓީ (މީރާ) ގެ އެންމެ އިސްވެރިއަކަށް އަންހެނަކު އައްޔަން ކުރި ފުރަތަމަ ފަހަރެވެ.

Advertisement

އެ ކަމަނާއަކީ މީރާގައި 16 އަހަރަށްވުރެ ގިނަ ދުވަހު ޚިދުމަތްކުރައްވާފައިވާ ކަނބަލެވެވެ. އަމީޒާ އެ މަގާމަށް އައްޔަން ކުރެއްވި އިރު ހުންނެވީ އެ މުއައްސަސާގެ ޑެޕިއުޓީ ކޮމިޝަނަރ ޖެނެރަލްގެ މަޤާމުގައި އެވެ.

ޓެކުހާ ގުޅޭ ސިޔާސަތުތައް އިޞްލާޙުކުރެއްވުމާއި މީރާގެ ހިންގުން ހަރުދަނާކުރެއްވުމާއި ދައުލަތުގެ އާމްދަނީ އިތުރުކުރެއްވުމުގެ މަސައްކަތްތަކުގައި ފާޠިމަތު އަމީޒާ ވަނީ ފާހަގަކޮށްލެވޭ ދައުރެއް އަދާކުރައްވައިފައެވެ.

ޚާއްޞަކޮށް އެ އޮތޯރިޓީގެ އެންފޯސްމަންޓް ޑިވިޜަންގެ އިސްވެރިއެއްގެ ގޮތުގައި ހުންނަވައިގެން ޑޭޓާ އެނަލިޓިކްސް އަދި ހެއްކަށް ބިނާކުރައްވާ އުސޫލުތައް މެދުވެރިކޮށް ނުލިބި ހުރި ޓެކުހާއި ޓެކްސް ނޫން އާމްދަނީ ހޯދުމުގެ މަސައްކަތް ފުޅާކުރައްވައިފައިވެއެވެ.

ފާޠިމަތު އަމީޒާ ވަނީ މެލޭޝިއާގެ އިންޓަނޭޝަނަލް އިސްލާމިކް ޔުނިވަރސިޓީއިން އެކައުންޓިންގގެ ދާއިރާއިން މާސްޓާޒް ޑިގްރީ ޙާޞިލުކުރައްވައި އޮކްސްފޯޑް ބްރޫކްސް ޔުނިވަރސިޓީއިން އެޕްލައިޑް އެކައުންޓިންގގެ ރޮނގުން ފުރަތަމަ ޑިގްރީ ޙާޞިލުކުރައްވައިފައެވެ.