ވެރިކަން ކުރާ ޕީއެންސީން މިމަހު ބޭއްވި އެ ޕާޓީގެ އެތެރޭގެ އިންތިހާބުގައި ހިންގި ހަމަނުޖެހުންތަކެއްގައި ކާމިލް ދީދީ ޕްރީ ސްކޫލް (ކޭޕީއެސް) އަށް ދިން ގެއްލުންތަކުގެ ޒިންމާ އެ ޕާޓީން ނަގައިފި އެވެ.

އެ ޕާޓީގެ އެކި ދާއިރާތަކުގެ އިންތިހާބު އޮތީ މިމަހުގެ 11 ވަނަ ދުވަހު އެވެ. އެ ސްކޫލްގައި ހުރި ވޯޓު ފޮށިތައް ގުނުމުގައި ދިމާވި މައްސަލަ އަކާއި ހިތްހަމަ ނުޖެހިގެން ޕާޓީގެ މެމްބަރުން ހިންގި ހަމަނުޖެހުމުގައި ކޭޕީއެސްގެ ހޯލްގައި ހުރި ގޮނޑިތައް އުކުމުން ހަލާކުވެ، މޭޒުތައް ހަލާކުކޮށްފައިވެ އެވެ.

Advertisement

މި ހަމަނުޖެހުންތަކާއި ގުޅިގެން އެޑިއުކޭޝަން މިނިސްޓަރު ޑރ. އިސްމާއިލް ޝަފީއު މީޑިއާގައި ވިދާޅުވީ ތަކެއްޗަށް ގެއްލުން ދިނުމުގެ ޒިންމާ އެ ޕާޓީން އަމިއްލައަށް ނަގާފައިވާ ކަމަށެވެ. އަދި ގެއްލުން ލިބުނު ތަކެތީގެ ބަދަލު ދޭނެކަން އެޑިއުކޭޝަން މިނިސްޓްރީއަށް އަންގާފައިވާ ކަމަށެވެ.

ކާމިލް ދީދީ ޕްރީ ސްކޫލުގައި ހުޅުމާލޭ އުތުރު ދާއިރާގެ ވޯޓު ފޮއްޓެއް ގުނަމުން ދަނިކޮށް ކެންޑިޑޭޓުންގެ މަންދޫބުންގެ މެދުގައި ދެބަސްވެ ހިނގި ހަމަނުޖެހުމުގެ ވީޑިއޯ ސޯޝަލް މީޑިއާގައި އާންމުވި އެވެ. އެ ވީޑިއޯއިން އެކަކު އަނެކަކާ ދިމާއަށް އެ ތަނުގައި ހުރި ގޮނޑިތައް އުކާ މަންޒަރާއި އިންޒާރުދޭ އަޑު އިވެއެވެ.

މި މައްސަލައިގަ ފުލުހުން ވަނީ ތިން މީހަކު ހައްޔަރުކޮށް މުއްދަތު ޖަހާފައި އެވެ.