އިންޑިއާގައި ބަނޑުހައި ހޫނު ކަމުގެ ހަޅުތާލު ކުރަމުންދިޔަ ތިމާވެށީގެ އެކްޓިވިސްޓް އަދި އުފެއްދުންތެރިކަމާއި އިންޖިނިއަރިންގެ ދާއިރާގައި މަޝްހޫރު ސޯނަމް ވަންޗުކް ގަދަކަމުން ހޮސްޕިޓަލަށް ގެންގޮސްފި އެވެ.

އިންޑިއާގައި އޮންލައިންކޮށް ފެށި ސިޔާސީ ހަރަކާތެއް ކަމަށްވާ "ކޮކްރޯޗް ޖަންތާ ޕާޓީ" (ސީޖޭޕީ) ން ވެރިރަށް ނިއުދިއްލީގެ މަގުމަތީގައި ކުރިޔަށް ގެންދާ ސިޔާސީ އެއްވުމެއްގައި ވަންޗުކް ބައިވެރިވެ ހަޅުތާލު ފެށީ އެޑިއުކޭޝަން މިނިސްޓަރު ދަރްމެންދްރަ ޕްރަދާންގެ އިސްތިއުފާއަށް އަށް ގޮވާލާއެވެ. އޭނާ ނުކައި ހުންނަތާ މިއަދަށް 21 ދުވަސް ވީއެވެ.

Advertisement

މިއަދު ހެނދުނު ކުއްލިއަކަށް ފުލުހުން ވަނީ އާންމު ހެދުމުގައި ދިއްލީގައި މުޒާހަރާ ކުރާ ސަރަހައްދަށް ގޮސް ގަދަކަމުން ވަންޗުކް ނަގައިގަނެގެން ހޮސްޕިޓަލަށް ގެންގޮސްފައި އެވެ.

އޭގެ ފަހުން ދިއްލީ ފުލުހުން ނެރުނު ބަޔާނެއްގައި ބުނީ މުޒާހަރާގެ ބައިވެރިންނާއި އެއްވެސް ހަމަނުޖެހުމެއް ނުހިނގާ ކަމަށެވެ. އަދި އެ ދެނީ ވީހާވެސް އަވަހަކަށް އެ ސަރަހައްދު ހުސްކުރުމަށް ކަމަށް ބުންޏެވެ.

ބަޔާނުގައި ބުނީ ފުލުހުން އަމަލު ކުރީ ހައި ކޯޓުގެ އަމުރަކަށް ކަމަށާއި ކޯޓުން އަމުރު ކުރީ ވަންޗުކްގެ ހަޅުތާލާއި ގުޅިގެން ސިއްހީ ހާލަތު ދަށަށް ދާތީ ވީހާވެސް އަވަހަކަށް އޭނާއަށް ސިއްހީ ފަރުވާ ދޭން ފަށަން ކަމަށެވެ. އެ އަމުރު މިހާރު ތަންފީޒުކޮށް ވަންޗުކަށް ސިއްހީ ފަރުވާ ފޯރުކޮށްދޭން ފަށާފައިވާ ކަމަށް ބުންޏެވެ.

އޭނާ ގެންދިޔައީ ދިއްލީ ސަފްދާރްޖަންގް ހޮސްޕިޓަލަށެވެ. ވަންޗުކްގެ އަންހެނުން ގިތަންޖަލީ ޖޭ އަންގްމޯ ބުނީ ހޮސްޕިޓަލުގައި އެޑްމިޓް ކުރިޔަސް އެއްވެސް ސިއްހީ ފަރުވާއެއް އަންހެނުންގެ ހުއްދަ ނެތި ފަށައިގެން ނުވާނެ ކަމަށެވެ. އަދި އެ ހުއްދަ އޭނާ ނުދޭނެ ކަމަށް ބުންޏެވެ.

ގިތަންޖަލީ ބުނީ ވަންޗުކްގެ ހާލަތު އޭނާ އާއި ޑޮކްޓަރުންގެ ޓީމަކުން ކައިރިން ބަލަމުން ދަނިކޮށް ފުލުހުން ބާރުގެ ބޭނުންކޮށްގެން އޭނާ ހޮސްޕިޓަލަށް ގެންދިއުން ގަބޫލު ނުކުރާ ކަމަށެވެ.

ރިޕޯޓުތައް ބުނާގޮތުގައި ވަންޗުކް ހޮސްޕިޓަލަށް ގެންދަން ފުލުހުން ހިންގީ ފާޑެއްގެ ޑްރާމާއެވެ. ފުލުހުން ކުއްލިއަކަށް އެތަނަށް ގޮސް ވަންޗުކް އޮތް ސްޓޭޖަށް އަރައި ބޮޑު ހުދު ފޮތިގަނޑެއް ދަމައި އޭނާ އާއި ވާހަކަ ދައްކާ ތަނާއި ވަންޗުކް އެތަނުން ނަގާތަން ނޫސްވެރިންނާއި މުޒާހަރާގެ ބައިވެރިންނަށް ނުފެންނާނެ ގޮތް ހެދިކަމަށް ބުނެފައިވެ އެވެ.