އީރާނުގެ ޗާބަހާރު ޝަހީދު ކަލަންތަރީ ބަނދަރުގައި ހުރި ސާވެއިލަންސް ޓަވަރެއް ބުރާސްފަތި ދުވަހު ސުންނާފަތިކޮށްލާފައިވާ ކަމަށް އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ހުކުރު ދުވަހު ބުނެފިއެވެ.

ސެންޓްކޮމް އިން ނެރުނު ބަޔާނަކާއި ހަވާލާދީ މީޑިއާ ރިޕޯޓުތައް ބުނާގޮތުގައި މި ޓަވަރަކީ އީރާނުގެ ގަލްފް އޮފް އޮމާން ސަރަޙައްދުގެ އައްސޭރިފަށުގައި 10 ވަރަކަށް އަހަރު ވަންދެން ބޭނުންކުރަމުން އައި ސާވެއިލަންސް ނެޓްވޯކްގެ ބައެއް ކަމަށެވެ. ހޮރްމުޒް ކަނޑުއޮޅިން ދަތުރުކުރާ ވިޔަފާރި އުޅަނދުތައް ދެނެގަނެ އެ އުޅަނދުތަކަށް ޙަމަލާދިނުމަށް އީރާނު އަސްކަރިއްޔާއިން މި ޓަވަރު ބޭނުންކުރަމުން ދިޔަ ކަމަށް ބުންޏެވެ.

Advertisement

ސެންޓްކޮމްއިން ބުނީ އެ ޓަވަރު ސުންނާފަތި ކޮށްލުމަށް ހިންގުނީ ކާމިޔާބު އޮޕަރޭޝަނެއް ކަމަށެވެ. އެމެރިކާއިން ގަބާލު ކުރާގޮތުގައި އެ ޓަވަރު ބޭނުންކޮށްގެން ހޮރްމުޒް ކަނޑުއޮޅިން ދަތުރުކުރާ ވިޔަފާރި އުޅަނދުތައް އިރާނުން ދެނެގަނެ އެވެ.

އެ ޓަވަރު ހަލާކު ކޮށްލުމުން ކަނޑުއޮޅި ހުރަސްކުރާ ބޯޓުތަކުގައި ތިބި ސިވިލް ފަޅުވެރިންނަށް ޙަމަލާދިނުމަށް ކޯޑިނޭޓްކުރުމުގެ ގާބިލްކަން ސީދާގޮތުން އީރާނަކަށް ނޯންނާނެ އެވެ.

މީގެ އިތުރުން މި ޙަމަލާގެ ސަބަބުން އީރާނާ ދެކޮޅަށް އެމެރިކާ ސިފައިން ކުރިއަށްގެންދާ ކަނޑުގެ ބްލޮކޭޑާ ޚިލާފުވާން މަސައްކަތްކުރާ އުޅަނދުތައް ފިޔަވައި ސަރަޙައްދީ ކަނޑުތަކުގައި ދަތުރުކުރާ ހުރިހާ އުޅަނދުތަކަށް ދަތުރުކުރުމުގެ މިނިވަންކަން ދެވުނީ ކަމަށް ބުންޏެވެ.

އިންޑިއާގެ އެހީތެރިކަމާއެކު އީރާނުން ހިންގަމުން އައި ޗާބަހާރު ބަނދަރަކީ ކުރިން ވެސް ތަކުރާރުކޮށް އެމެރިކާގެ ވައިގެ ޙަމަލާތަކުގެ ޢަމާޒަކަށްވެފައިވާ ބަނދަރެކެވެ. މީގެ ކުރިންވެސް ދެ ފަހަރު އެ ޓަވަރަށް އަމާޒުކޮށް ހަމާލާ ދީފައިވެ އެވެ.

މިފަހަރު އެ ޓަވަރަށް ބޮން އެޅިކަން އިރާންގެ ދައުލަތުގެ މީޑިއާއިން ހާމަ ކުރިނަމަވެސް ޓަވަރު ސުންނާފަތިވެ ބޭނުން ނުކުރެވޭވަރުވިކަން ހާޔަގީނެއް ނުކޮށްދެ އެވެ.