އިންޑިއާގެ ތިމާވެށީގެ އެކްޓިވިސްޓް އަދި އުފެއްދުންތެރިކަމާއި އިންޖިނިއަރިންގެ ދާއިރާގައި މަޝްހޫރު ސޯނަމް ވަންޗުކް ކުރަމުންދާ ބަނޑުހައި ހޫނު ކަމުގެ ހަޅުތާލަށް ތާއީދުކޮށް އެ ގައުމުގެ މަޝްހޫރު މީހުން ތެދުވަން ފަށައިފި އެވެ.

އިންޑިއާގައި އޮންލައިންކޮށް ފެށި ސިޔާސީ ހަރަކާތެއް ކަމަށްވާ "ކޮކްރޯޗް ޖަންތާ ޕާޓީ" (ސީޖޭޕީ) ން ވެރިރަށް ނިއުދިއްލީގެ މަގުމަތީގައި ކުރިޔަށް ގެންދާ ސިޔާސީ އެއްވުމެއްގައި ވަންޗުކް ބައިވެރިވީ މިދިޔަ މަހުގެ 28 ވަނަ ދުވަހުއެވެ.

އެ ހަރަކާތުން މުޒާހަރާ ފެށީ މިދިޔަ މެއި މަހު އެ ގައުމުގައި ބާއްވަން ހަމަޖެއްސި ޑޮކްޓަރުކަން ކިޔެވުމަށް ފަހު ހަދާ މުހިންމު އިމްތިހާނެއްގެ ޕޭޕަރު ލީކު ވުމުން އެ އިމްތިހާން އެޑިއުކޭޝަން މިނިސްޓަރީން ކެންސަލް ކުރުމުންނެވެ. އެމީހުންގެ ޑިމާންޑަކީ ޕޭޕަރު ލީކުވުމުގެ ޒިންމާ އެޑިއުކޭޝަން މިނިސްޓަރު ނަގައި އޭނާ އިސްތިއުފާ ދިނުމެވެ.

ވަންޗުކް މި ހަރަކާތާއި ގުޅުމަށް ފަހު ބުނީ އޭނާ ދެން ކާއެއްޗެއް ކާނީ އިންޑިއާގެ އެޑިއުކޭޝަން މިނިސްޓަރު ދަރްމެންދްރަ ޕްރަދާން އިސްތިއުފާދެއްވުމުން ކަމަށެވެ. އޭގެ ފަހުން އިއްޔެއަށް 19 ދުވަސް ވީ އެވެ.

ރިޕޯޓުތައް ބުނާގޮތުގައި ވަންޗުކަށް ތާއީދުކޮށް އިންޑިއާގެ މަޝްހޫރު މީހުން ވަނީ ވާހަކަ ދައްކަން ފަށާފައި އެވެ. އަދި ސަރުކާރުން ގޮތް ދޫކޮށް މަޝްވަރާގެ މޭޒަށް ދިއުމަށް ގޮވާލާފައިވެ އެވެ.

އިންޑިއާގެ އިދިކޮޅު އެންމެ ބޮޑު ޕާޓީ ކޮންގްރެސްގެ ލީޑަރު ރާހުލް ގާންދީ ވަނީ ސީޖޭޕީގައި އިސްކޮށް ހަރަކާތްތެރިވާ މީހުންނާއި ބައްދަލު ކުރައްވާ ވަންޗުކްގެ ހަޅުތާލު ހުއްޓާލުމަށް ބާރު އެޅުމަށް އެދިވަޑައިގެންފަ އެވެ. އޭނާ ވިދާޅުވީ ހަޅުތާލުގެ ސަބަބުން ވަންޗުކް ބަލިވެ މަރާ ހަނގުރާމަ ކުރަން ޖެހިއްޖެ ނަމަ މުޅި ގައުމު އެކަމާއި ހިތާމަ ކުރަން ޖެހޭނެ ކަމަށެވެ.

އަދި އެމީހުންގެ ޑިމާންޑު ކަމަށްވާ އެޑިއުކޭޝަން މިނިސްޓަރުގެ އިސްތިއުފާއަށް އިދިކޮޅު ޕާޓީގެ ހައިސިއްޔަތުން ކޮންގްރެސްއިން ގޮވާލާ އެ މަސައްކަތް ހުއްޓުމެއް ނެތި ކުރާނެ ކަމަށެވެ.

ބޮލީވުޑްގެ ތަރި އަދި އިންޑިއާގައި ހުންނަ މިފަދަ މައްސަލަތަކާއި ގުޅޭގޮތުން މުހިންމު ވާހަކަތަކެއް ދައްކާ ސޮނާކްޝީ ސިންހަ ބުނީ ވަންޗުކް ކުރަމުންދާ ސުވާލާއި ޑިމާންޑަކީ އިންޑިއާގެ ދަރިވަރުންގެ މުސްތަގުބަލަށްޓަކައި ކުރަމުންދާ ހަނގުރާމައެއް ކަމަށެވެ. ސޮނާކްޝީ ބުނީ އިންޑިއާ ސަރުކާރުގެ ނިންމުމުގެ ސަބަބުން އެތައް ހާސް ކުދިންގެ ދިރިއުޅުން ގެއްލި މުސްތަގުބަލާއި މެދު ސުވާލު އުފެދިފައިވާ ކަމަށެވެ.

މީގެ އިތުރުން މަޝްހޫރު މީހުން ކަމަށްވާ ޕްރަކާޝް ރާޖް ޗިންމައި، ސްރީޕާދާ އޮމީ، ވައިދިޔާ ޒީނަތު، ނަސީރުއްދީން ޝާހް، ޝަބާނާ އަޒްމީ ފަދަ ފަންނާނުންވެސް މި ކަމުގައި ބައިވެރިވެ، ވަންޗުކަށް ތާއީދުކޮށްފައިވެ އެވެ. އޭގެ ތެރެއިން ބައެއް ފަރާތްތަކުން ވަނީ ވަންޗުކާއި ބައިވެތިވުމުގެ ގޮތުން އެއް ދުވަހު ނުކައި ހުރެފައި އެވެ. އަދި ވަންޗޫކްގެ ސިއްހީ ހާލަތު ދަށަށް ދާތީ އިހްތިޖާޖު ހުއްޓާލުމަށް އިލްތިމާސްކޮށްފައި އެވެ.

ރިޕޯޓުތައް ބުނާގޮތުގައި ވަންޗުކްގެ ހަޑިގަނޑުން އަށް ކިލޯ ލުއިވެ، ވަރުދެރަވެ، އެކަނި ހިނގާބިނގާވެ އުޅުމަށް މިހާރު އުނދަގުލެވެ. އޭނާ ހަމައެކަނި ބޮނީ ލޮނު ފެނެވެ. 

އޭނާގެ ސިއްހީ ހާލަތު ބަލަމުންދާ ޑޮކްޓަރުން ބުނެފައިވަނީ ވަންޗުކް ސިއްހީ ހާލަތު ދަށަށް ދާ ކަމަށާއި އެކަމަކު އަދިވެސް ނުކައި ހުރެވޭނެ ކަމަށެވެ.

ރިޕޯޓުތައް ބުނާގޮތުގައި ވަންޗުކްގެ ހަޅުތާލުގެ މައްސަލަ ގައުމީ ބޮޑު މައްސަލައަކަށް ވެފައިވީ ނަމަވެސް ސަރުކާރުން އަދިވެސް މި މައްސަލައިގަ ވާހަކަ ނުދައްކާ ކަމަށެވެ. އަދި އޭޑިއުކޭޝަން މިނިސްޓަރުވެސް ވާހަކަ ދައްކަވާފައި ނުވާ ކަމަށް ބުނެ އެވެ.