އިންޑިއާގެ އަމިއްލަ ކުންފުންޏެއްގެ ފުރަތަމަ ރޮކެޓު ޖައްވައް އުދުއްސާލަން ތައްޔާރުވެއްޖެ އެވެ.

"ވިކްރަމް-1" ނަމުން ނަން ދީފައިވާ ރޮކެޓު އުފެއްްދީ އިންޑިއާގެ ބެންގަލޫރަށް ނިސްބަތްވާ ސްކައިރޫޓް އެއަރޯސްޕޭސް ކުންފުނިންނެވެ. ރިޕޯޓުތައް ބުނާގޮތުގައި ވިކްރަމް-1 ފުރުވާލަން ހަމަޖެހިފައިވަނީ މިމަހުގެ 11 ވަނަ ދުވަހު އެވެ.

Advertisement

އެ ރޮކެޓު ފޮނުވާލަނީ އަންދަރް ޕްރަދޭޝްގެ ސްރީހަރިކޯޓާގައި ހުންނަ ސަތީޝް ދަވަން ސްޕޭސް ސެންޓަރުން އެ ދުވަހުގެ ހެނދުނު އިންޑިއާ ގަޑިން 11:30 އެވެ. މިއީ ވިކްރަމް-1 ގެ ޓެސްޓު ދަތުރެވެ.

އެ ކުންފުނިން ބުނީ ރޮކެޓު ފޮނުވާލަން ވާންޖެހޭ ފަހުގެ ތައްޔާރީތައް ވެނިމިފައިވާ ކަމަށެވެ. ރިޕޯޓުތައް ބުނާގޮތުގައި މި ރޮކެޓުގެ ދަތުރަށް އިންޑިއާގެ ކަމާބެހޭ ފަރާތްތަކުން ވަނީ ވަޔާއި ކަނޑުގެ ސަރަހައްދުތަކަށް ނުރައްކާތެރި ޒޯންތައް ރަސްމީކޮށް ކަނޑައަޅާފައެވެ.

ސްކައިރޫޓު ކުންފުނިން ބުނީ މި ރޮކެޓު ކާމިޔާބު ކަމާއި އެކު އުދުއްސާލެވިއްޖެ ނަމަ އިންޑިއާގެ އަމިއްލަ ކުންފުނިތަކުން ޖައްވީ ދިރާސާތައް ކުރުމާއި ރޮކެޓު އުފެއްދުމަށް ފަށައިގެންފައިވާ މަސައްކަތަށް ބޮޑު ކުރިއެރުމެއް ލިބިގެންދާނެ ކަމަށެވެ.

އިންޑިއާ ސަރުކާރުން ދަނީ އަމިއްލަ ކުންފުނިތައް މި ދާއިރާއަށް ވަނުމަށް މާލީ އެހީތެރިކަން ފޯރުކޮށްދީ ކުރިއެރުވުމަށް ގިނަ މަސައްކަތްތަކެއް ކުރަމުންނެވެ.