އާސަންދަ ކުންފުނީގެ ޚިދުމަތްތައް ފުޅާކުރުމުގެ ގޮތުން ރާއްޖޭގެ އަށް ސަރަޙައްދެއްގައި އަލަށް ކައުންޓަރު ހުޅުވައިފިއެވެ.

އިތުރު ކައުންޓަރުތަކެއް ހުޅުވީ ރައްޔިތުންނާ ގާތުން އާސަންދައިގެ ޚިދުމަތްތައް ފޯރުކޮށްދިނުމަށް ސަރުކާރުން ކުރަމުންދާ މަސައްކަތުގެ ދަށުންނެވެ. އާސަންދައިން ބުނީ މީގެ ފަހުން އެ ރަށްރަށުގައި އާސަންދަ ކުންފުނީގެ މުވައްޒަފުން މެދުވެރިކޮށް ޚިދުމަތްތައް ލިބިގެންދާނެ ކަމަށެވެ.

Advertisement

އަލަށް ކައުންޓަރު ހުޅުވުނު ރަށްތަކުގެ ތެރޭގައި ހިމެނެނީ ރ. އުނގޫފާރު ބ. އޭދަފުށި ޅ. ނައިފަރު އދ. މަހިބަދޫ ދ. ކުޑަހުވަދޫ ލ. ގަން ގދ. ތިނަދޫ އަދި ފުވައްމުލަކު ސިޓީއެވެ.

މީގެ ކުރިން އާސަންދައިގެ ކައުންޓަރުތައް ޤާއިމުކުރެވިފައި ހުރީ މާލެ ހުޅުމާލެ ފ. ނިލަންދޫ، އައްޑޫ ސިޓީ އަދި ހދ. ކުޅުދުއްފުށި ސިޓީގައި އެކަންޏެވެ.

ކުންފުނިން ބުނީ އަލަށް ހުޅުވުނު ކައުންޓަރުތަކުގެ ސަބަބުން ބޭސްފަރުވާގެ އެހީއަށް އެދުމުގައާއި ކުންފުންޏާ ގުޅުންހުރި އެހެނިހެން އިދާރީ ކަންކަމުގައި ރައްޔިތުންނަށް ފަސޭހަތަކެއް ލިބިގެންދާނެ ކަމަށެވެ. ޚާއްޞަކޮށް ރަށުން ބޭރަށް ނުގޮސް އާސަންދައިގެ ޚިދުމަތްތަކާ ގުޅޭ މަޢުލޫމާތާއި އެހީތެރިކަން ހޯދުމަށް މިކަމުގެ ސަބަބުން މަގުފަހިވެގެންދާނެ ކަމަށްވެސް ފާހަގަކޮށްފައިވެއެވެ.

ކުންފުނިން ބުނިގޮތުގައި މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ޞިއްޙީ ހުރިހާ ޚިދުމަތްތަކަކީ ރައްޔިތުންނަށް ވީހާވެސް ގާތުން ލުއިފަސޭހަކަމާއެކު ލިބޭނެ ޚިދުމަތްތަކަކަށް ހެދުމަށްޓަކައި ސީދާ ރައީސުލްޖުމްހޫރިއްޔާގެ އަމިއްލަފުޅު އިސްނެންގެވުމެއްގެ ދަށުން ކުރިއަށް ގެންދެވޭ މުހިންމު ފިޔަވަޅެކެވެ.

ބެކްގްރައުންޑަށް ބަލާއިރު މި މަޝްރޫޢުގެ ދަށުން ރާއްޖޭގެ ހުރިހާ އަތޮޅެއް ހިމެނޭހެން އަރބަން ސެންޓަރުތައް ޤާއިމުކޮށްފައިވާ ރަށްތަކުގައި އާސަންދައިގެ ކައުންޓަރުތަކެއް ތަރައްޤީކުރުމަށް ނިންމާފައިވާ ކަމަށް ކުންފުނިން ބުނެފައިވެއެވެ.