އަލަށް ކައިވެނި ކުރާ މީހުންނަށް ކައިވެނީގެ ހަފްލާ ބާއްވަން މާލެއިން ހިލޭ ޖާގަ ހަމަޖައްސައިދޭން ސިޓީ ކައުންސިލުން ނިންމައިފި އެވެ.

މިގޮތަށް ނިންމީ މާލޭ ސިޓީ ކައުންސިލުން މިއަދު ބޭއްވި ރަސްމީ ބައްދަލުވުމުގައި އެވެ. އެ ބައްދަލުވުމުގައި ނިންމާފައި ވަނީ މި ޚިދުމަތް ދިނުމުގައި ބަލާނެ މިންގަނޑުތަކާއި އުސޫލުތައް އެކުލަވާލައި ވީ އެންމެ އަވަހަކަށް އެ ތަފްސީލުތައް އާންމު ކުރުމަށެވެ.

Advertisement

ސިޓީ ކައުންސިލުން ބުނީ އެ މަރުހަލާ ނިންމުމަށް ފަހު އަލަތު ކައިވެނިކުރާ ފަރާތްތަކަށް ހިލޭ ހޯލް ނުވަތަ މައިޒާންތައް ދޫކުރުމުގެ ފުރުސަތު ވަރަށް އަވަހަށް ހުޅުވާލާނެ ކަމަށެވެ. އެ މަސައްކަތް ކުރާނީ އެ ކައުންސިލްގެ ބަޖެޓް އެންޑް ރިސޯސް މޮބިލައިޒޭޝަން ކޮމިޓީ އަދި ސޯޝަލް ސާރވިސަސް ޖެންޑަރ އެންޑް ކޮމިއުނިޓީ އެފެއާރސް ކޮމިޓީންނެވެ.

މާލޭ ސިޓީ ކައުންސިލްގެ ބެލުމުގެ ދަށުން ކައިވެނި ހަފްލާތަކާއި އެހެނިހެން ހަފްލާތައް ބާއްވަން ދޫކުރާ ތަންތަނުގެ ތެރޭގައި މާލޭ ސިޓީ ހޯލާއި ލޮނުޒިޔާރަތް ޕާކު ހިމެނެ އެވެ. އޭގެ ތެރެއިން އާންމުންގެ މެދުގައި އެންމެ މަގުބޫލު ތަނަކީ ލޮނުޒިޔާރަތް ޕާކެވެ.

މިދެނަތަކީވެސް މިހާރު ކުލި ދައްކައިގެން ހަފްލާތައް ބާއްވަން ދޫކުރާ ތަންތަނެވެ.

މާލޭގައި ކައިވެނި ކުރާ  ފަރާތްތަކުން ކައިވެނީގެ ހަފްލާ ބޭއްވުމަށް ތަން ކުއްޔަށް ހިފުމަށް ބޮޑު ހޭދައެއް ކުރަން ޖެހެ އެވެ. ސިޓީ ކައުންސިލްގެ މި ނިންމުމަކީ މާލީގޮތުން އާންމުންނަށް ލިބޭނެ ލޔެކެވެ.

މި ނިންމުމަކީ މޭޔަރު އާދަމް އާޒިމްގެ އިތުރުން ބައެއް ކައުންސިލަރުން ކެމްޕެއިންގެ ތެރޭގައި ޒުވާނުންނަށް ވެވަޑައިގެންނެވި މުހިންމު ވަޢުދެއް ފުއްދުމަށް ކުރެވުނު ކަމެއް ކަމަށްވެއެވެ.