އިންޑިއާގެ އުއްތަރް ޕްރަދޭޝްގެ ނޮއިޑާގައި މީހުން ދިރިއުޅޭ އިމާރާތެއްގައި އަލިފާން ރޯވެ ދެ މީހަކު މަރުވެއްޖެ އެވެ.

ރިޕޯޓުތައް ބުނާ ގޮތުން މި ހާދިސާ ހިނގާފައިވަނީ އިލެކްޓްރިކް ކާރެއް ޗާޖުކުރަމުން ދަނިކޮށް ކަރަންޓު ޝޯޓެއްވެ، އިމާރާތުގެ ދަށަށް ހަދާފައިވާ ޕާކިން ސަރަހައްދުގައި އަލިފާން ރޯވެގެންނެވެ. މި އަލިފާންގަނޑު ކުޑައިރުކޮޅެއްގެ ތެރޭގައި ކައިރީގައި ޕާކުކޮށްފައި ހުރި ޕެޓްރޯލް ވެހިކަލްތަކަށް ފެތުރި މުޅި އިމާރާތަށް ހުޅު ފެތުރެވެނެވެ.

Advertisement

ހަތަރު ފަންގިފިލާއަށް ހަދާފައިވާ އެ އިމާރާތުގައި 50 ހަކަށް އާއިލާ ދިރިއުޅެ އެވެ. ކޮންމެ ފަންގިފިލާއެއްގައި ދެކޮޓަރީގެ ފަސް އެޕާޓްމެންޓު ހުރެ އެވެ. 

އެންމެ ރައްކާތެރި ކަމާއި އެކު އިމާރާތުން ނެރުނު ނަމަވެސް އެ ސަަހައްދުގެ ފުލުހުން ބުނީ ދުމުގެ އަސަރުކޮށްގެން ދެ މީހަކަށް ހޮސްޕިޓަލުގައި ފަރުވާ ދޭން ޖެހުނު ކަމަށެވެ. މި ހާދިސާގައި މަރުވި ކަމަށްވަނީ އެ ދެމީހުންނެވެ.

މި ހާދިސާއާ ގުޅިގެން އުއްތަރް ޕްރަދޭޝްގެ ޗީފް މިނިސްޓަރު ޔޯގީ އަދިތުޔަނާތު ވަނީ ޒަހަމްވި މީހުންނާއި ހާލުގައި ޖެހުނު މީހުންނަށް އެހީތެރިކަން ފޯރުކޮށްދިނުމަށް އަންގަވާފައި އެވެ. އަދި އަލުން ދިރިއުޅުން ފަށައިގަތުމަށް ބޭނުންވާ ދާއިމީ އެހީތެރިކަން ފޯރުކޮށްދިނުމަށް އަންގަވާފައިވެ އެވެ.

މި އަލިފާނުގެ ހާދިސާ ހިނގަން މެދުވެރިވި ސީދާ ސަބަބު ދެނެގަތުމަށް ތަހުގީގު ކުރިއަށްދެއެވެ.