ބޭންކް އޮފް މޯލްޑިވްސް (ބީއެމްއެލް)ގެ އިތުރު ހަތް ބްރާންޗެއްގެ ޚިދުމަތް މިއަދު ފަށައިފިއެވެ.

މާލޭގައި މިއަދު ހެނދުނު ބޭއްވި ޚާއްޞަ ރަސްމިއްޔާތެއްގައި މި ބްރާންޗުތައް ރަސްމީކޮށް ހުޅުވައިދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ. 

Advertisement

އަލަށް ޚިދުމަތް ފެށި ބްރާންޗުތައް ހުންނަނީ ހއ. ހޯރަފުށި ށ. ކަނޑިތީމު ރ. އަލިފުށި ޅ. ހިންނަވަރު އދ. މާމިގިލި ގއ. ގެމަނަފުށި އަދި ލ. މާވަށުގައެވެ.

މި ބްރާންޗުތަކާއެކު ބީއެމްއެލްއިން ރާއްޖޭގެ 20 އަތޮޅުގައި ހިންގާ ބްރާންޗުތަކުގެ ޖުމްލަ އަދަދު 55 އަށް އެރީއެވެ. މީގެ ތެރެއިން 17 ބްރާންޗަކީ ފާއިތުވި ދެ އަހަރު ދުވަހުގެ ތެރޭގައި ހުޅުވި ބްރާންޗުތަކެއް ކަމަށާއި މިއީ ބޭންކިން ޚިދުމަތްތައް ރައްޔިތުންނާ ގާތުން ފޯރުކޮށްދިނުމަށް ބޭންކުން ކުރަމުންދާ ދެމެހެއްޓެނިވި އިންވެސްޓްމަންޓްތައް ދައްކުވައިދޭ ކަމެއް ކަމަށް ބީއެމްއެލްއިން ބުނެއެވެ.

ރަސްމިއްޔާތުގައި ބޭންކުގެ ސީއީއޯ އަދި މެނޭޖިން ޑައިރެކްޓަރ މުޙައްމަދު ޝަރީފް ވިދާޅުވީ ބީއެމްއެލްއަށް ލިބޭ ކުރިއެރުން އިންވެސްޓް ކުރަނީ މުޖުތަމަޢުއަށް ބޭންކުގެ ޚިދުމަތްތައް ފުޅާކުރުމަށް ކަމަށެވެ.

ޝަރީފް ވިދާޅުވީ ބޭންކަށް ލިބޭ މާލީ ކުރިއެރުމުގެ ސަބަބުން މުޅި ރާއްޖެއަށް ފެތުރިފައިވާ ބޭންކުގެ ވިއުގައަށް އިންވެސްޓްކޮށް ކޮންމެ ދިވެއްސަކާ ގާތުން ބޭންކިން ޚިދުމަތް ފޯރުކޮށްދިނުމުގެ ފުރުސަތު ލިބިގެންދާނެ ކަމަށެވެ.އަދި މީގެ ސަބަބުން ފަރުދުންނާއި ވިޔަފާރިތަކަށް ބޭނުންވާ މާލީ ހިދުމަތްތައް ފަސޭހަކަމާއެކު ލިބި އެފަރާތްތަކުގެ ކުރިއެރުމަށް މަގުފަހިވެގެންދާނެ ކަމަށް ޝަރީފް ވިދާޅުވިއެވެ.

ރާއްޖޭގެ އެންމެ ބޮޑު މާލީ އިދާރާގެ ހައިސިއްޔަތުން ބީއެމްއެލްއިން ދަނީ ރާއްޖޭގެ އެންމެ ބޮޑު ބޭންކިން ވިއުގަ ހިންގަމުންނެވެ. މި ވިއުގައިގައި 20 އަތޮޅުގައި ހުރި 55 ބްރާންޗާއި 340 އޭޓީއެމްގެ އިތުރުން ޒަމާނީ ޑިޖިޓަލް ބޭންކިން ވަސީލަތްތައް ހިމެނެއެވެ.

އައު އީޖާދުތަކާއި ޚިދުމަތްތައް ފުޅާކުރުމުގެ ޒަރީއާއިން މުޖުތަމަޢުތަކަށް އެހީތެރިކަން ފޯރުކޮށްދިނުމުގައި ދެމިއޮންނާނެ ކަމަށް ބީއެމްއެލްއިން ބުނެފައިވެއެވެ.