ހއ. ހޯރަފުށީގައި ހުންނަ ހާފްވޭހައުސްގައި ތިބި ކުދިންތަކެއް އެތަނުން ނުކުމެ އެ ރަށު މީހަކަށް ބޮޑެތި އަނިޔާތަކެއް ދީ ފަޅުގެއަކަށް އެއްލާލާފައި އޮއްވަ ފެނިއްޖެ އެވެ.

ފުލުހުންގެ މީޑިއާގައި ވިދާޅުވީ ހޯރަފުށީގައި ހުންނަ ކުޑަކުދިންގެ ވަގުތީ ރެސިޑެންޝަލް ޓްރީޓްމަންޓް ސެންޓަރުގައި ތިބި ތިން ކުދިން އެ މަރުކަޒުން ނުކުމެ ރަށު މީހަކަށް ހަމަލާދީ މާރާމާރީ ހިންގާފައިވާ ކަމަށް ތުހުމަތުކުރެވޭ ރިޕޯޓެއް ލިބިފައިވާ ކަމަށެވެ. އެ ހާދިސާ ހިނގާފައިވާ ގޮތް ދެނެގަތުމަށް ކަމާބެހޭ ދައުލަތުގެ އިދާރާތަކާ ގުޅިގެން މައްސަލަ ބަލަމުންދާ ކަމަށް ފުލުހުން މައުލޫމާތު ދެ އެވެ.

Advertisement

ނަމަވެސް އިތުރު ތަފްސީލެއް ހާމައެއް ނުކުރެއެވެ.

އާންމުވެފައިވާ ވީޑިއޯއިން ފެންނަގޮތުން ތިން ކުއްޖަކު ހާފްވޭހައުސްގެ ފާރުމަތީ ތިބެ ހުތުރު ބަހުން ވާހަކަ ދައްކައި ހުތުރު އިޝާރާތްތައް އާންމުންނާއި ދިމާއަށް ކުރެއެވެ. އަދި ރަށުގެ ގިނަ އަދަދެއްގެ މީހުންނާއި ފުލުހުން ވެސް އެ ސަރަހައްދުގައި ހަރަކާތްތެރިވިއެވެ.

އެހެން ވީޑިއޯއަކުން އަނިޔާވެފައި އޮތް މީހާ ނަގައިގެން ގެންދާތަން ފެނެ އެވެ.

ހާފްވޭ ހައުސް ހުންނަނީ ހޯރަފުށީ އަތިރިމައްޗާއި ވަރަށް ކައިރީގައި އެވެ. އެ ކުދިން އެމީހާއަށް ހަމަލާދިނީ މަސްބާނަން ހުއްޓައެވެ.

މައުލޫމާތު ލިބިފައިވާ ގޮތުގައި އުމުރުން 30 އަހަރުގެ އެމީހާއަށް ސީރިއަސް ޒަހަމްތަކެއް ވަނީ ލިބިފައި އެވެ. މިހާއަށް ހޯރަފުށީ ސިއްހީ މަރުކަޒުގައި ފަރުވާ ދިނުމަށް ފަހު މިހާރު ވަނީ ހއ. ދިއްދޫ އަތޮޅު ހޮސްޕިޓަލަށް ގެންގޮސްފައި އެވެ.

ހާފްވޭހައުސް ނުވަތަ ކުޑަކުދިންގެ ރެސިޑެންޝަލް ޓްރީޓްމަންޓް ސެންޓަރު ހުޅުވީ މިދިޔަ އަހަރުގެ ޖެނުއަރީ 30 ގައެވެ. ކުޑަކުދިންގެ ޖިނާއީ އަދުލުގެ ގާނޫނުގައިވާ ގޮތުން ކުށުގެ ވެށީގައި އުޅޭ ކުދިންނާއި ނުރައްކަލަށް ހުށަހެޅުމުގެ ފުރުސަތު އޮތް ކުދިން މަރުކަޒުކޮށް ފަރުވާ ދޭން ޖެހެއެވެ.