އުރީދޫ މޯލްޑިވްސް އާއި ފިޝަރީޒް މިނިސްޓްރީ ގުޅިގެން ބާއްވާ އުރީދޫ މަސްރޭސް 2026 އަންނަ މަހުގެ ހަތްވަނަ ދުވަހު ކ. މާފުށީގައި ބާއްވަން ނިންމައިފިއެވެ.

މުބާރާތުގައި ބައިވެރިވުމަށް ރަޖިސްޓްރޭޝަން ހުޅުވާލީ އިއްޔެ އެވެ. އުރީދޫން ބުނީ ރެޖިސްޓްރީ ކުރުމުގެ ފުރުސަތު މިމަހުގެ 21 ވަނަ ދުވަހުގެ ރޭ 23:59  އާހަމައަށް އޮންނެ އެވެ.

Advertisement

ރެޖިސްޓާ ކުރުމަށް 12 މީހުންގެ ޓީމެއް ބޭނުންވާނެ ކަމަށާއި ފޯމު އޮންލައިންކޮށްވެސް ފުރިހަމަކުރެވޭނެ ކަމަށް އެ ކުންފުނިން ބުނެފައިވެއެވެ.

މިފަހަރުގެ މުބާރާތުގައި ވެސް ޖުމުލަ 43000 ރުފިޔާގެ ފައިސާގެ އިނާމު ދިނުމަށް ވަނީ ހަމަޖެހިފައެވެ. ޗެމްޕިއަން ޓީމަށް 25000 ރުފިޔާ، ދެވަނަ ޓީމަށް 10000 ރުފިޔާ އަދި ތިންވަނަ ޓީމަށް 5000 ރުފިޔާ ދިނުމަށް ވަނީ ހަމަޖެހިފައެވެ.

މީގެ އިތުރުން އެންމެ މޮޅު އަންހެން މަސްވެރިޔާއަށާއި އެންމެ މޮޅު ފިރިހެން މަސްވެރިޔާއަށާއި އެންމެ ބަރު މަސް ބާނާ ފަރާތަށް ވެސް 1000 ރުފިޔާގެ އިނާމު ދިނުމަށް ވަނީ ހަމަޖެހިފައެވެ.

އުރީދޫ މަސްރޭހަކީ ހަމައެކަނި މުބާރާތެއްގެ ގޮތުގައި ނުބަލައި ފެށުނީއްސުރެ ވެސް މަސްވެރިކަމުގެ އުފާވެރިކަމުގެ ތެރެއިން އެއްބައިވަންތަކަމުގެ ރޫހު އާލާކުރުވައި މުޖުތަމައުތަކުގެ ހިތްތަކުން ޖާގަ ހޯދާފައިވާ ހަރަކާތެއް ކަމަށް އުރީދޫން ބުނެފައިވެއެވެ.

މުބާރާތުގައި އެންމެ ގިނަވެގެން 20 ޓީމަށް ވާދަކުރެވޭނެ ކަމަށާއި 20 ޓީމަށްވުރެ ގިނައިން ރެޖިސްޓާވެއްޖެ ނަމަ ފުރަތަމަ ރަޖިސްޓްރޭޝަން ފުރިހަމަކޮށް ފައިސާ ދައްކާ 20 ޓީމަށް ފުރުސަތު ދޭނެ ކަމަށް ވެސް އުރީދޫން ބުނެފައިވެއެވެ.

އުރީދޫ މަސްރޭހުގައި ސަރުކާރުގެ މުއައްސަސާތަކާއި ކޯޕަރޭޓް ކުންފުނިތަކާއި އާންމުން ބައިވެރިވުމަށް އުރީދޫ މޯލްޑިވްސް އިން ވަނީ ހުޅުވާލާފައި އެވެ.