ސަޢޫދީ ޢަރަބިއްޔާގެ އާންމުން ދިރިއުޅޭ ސަރަހައްދުތަކަށް އަމާޒުކޮށް ފޮނުވަމުންދާ ބެލިސްޓިކް މިސައިލް ހަމަލާތައް ދިވެހި ސަރުކާރުން ކުށްވެރިކޮށްފިއެވެ.

ސައުދީއަށް އަމާޒުކޮށް ހަމަލާތައް ދިނީ ޔަމަނުގައި ވަކިވެ ގަތުމަށް މަސައްކަތް ކުރާ ހޫތީ ޖަމާއަތުންނެވެ. އެމީހުން ސައުދީއަށް ދޭ ހަމަލާތައް އަލުން ފަށާފައި މިވަނީ ހޫތީންގެ ބާރުގެ ދަށުގައި އޮތް އެއާޕޯޓަކަށް ދިން ވައިގެ ހަމަލާތަކަށް ސައޫދީން އެހީތެރިވެދީފައިވާ ކަމަށް ބުނެ ރައްދުގައި އެވެ.

Advertisement

ފޮރިން މިނިސްޓްރީން މިރޭ ނެރުނު ބަޔާނެއްގައި ބުނީ މި ހަމަލާތަކަކީ ސަޢޫދީ ޢަރަބިއްޔާގެ ސިޔާދަތާއި ބިމުގެ އިޚްތިޞާޞަށް ފާޅުކަން ބޮޑު ގޮތެއްގައި އަރައިގަތުމެއް ކަމަށެވެ. މިއީ ސަރަޙައްދީ ސަލާމަތާއި ހަމަޖެހުމަށް ބޮޑު ނުރައްކަލެއް ކުރިމަތިކުރުވާ ކަމެއް ކަމަށް ބުނެފައިވެ އެވެ.

މީގެ އިތުރުން ސަޢޫދީ ސަރުކާރާއި އެ ޤައުމުގެ އަޚުވަންތަ ރައްޔިތުންނާ އެކު ދިވެހި ސަރުކާރުން ފުރިހަމައަށް އެއްބައިވަންތަކަން ފާޅުކުރާ ކަމަށް ބަޔާނުގައި ބުންޏެވެ. ސަޢޫދީގެ ސިޔާދަތާއި ސަލާމަތާއި ބިމުގެ އިޚްތިޞާޞް ރައްކާތެރިކުރުމަށް ކުރާ ހުރިހާ މަސައްކަތްތަކަކަށް ދިވެހި ސަރުކާރުގެ ފުރިހަމަ ތާއީދު އޮތްކަން ހާމަކޮށްފައިވެއެވެ.

ދިވެހި ސަރުކާރުން ނެރުނު ބަޔާނުގައި ސަރަޙައްދުގައި ފަހަކަށް އައިސް ހޯދިފައިވާ ކުރިއެރުންތައް ދެމެހެއްޓުމަށާއި އަލުން ނުތަނަވަސްކަން އުފެދުން ހުއްޓުވުމަށާއި ސަރަޙައްދުގެ ސުލްޙައާއި ސަލާމަތާއި ހަމަޖެހުން ދެމެހެއްޓުމަށްޓަކައި ވާހަކަދެއްކުމާއި ޑިޕްލޮމަސީ ކުރިއަށް ގެންދިއުމުގެ މުހިންމުކަން ތަކުރާރުކޮށް ބަޔާންކޮށްފައިވެއެވެ.

ހޫތީން ސައުދީއަށް އަލުން ހަމަލާ ދޭން ފަށާފައި މިވަނީ ހަތަރު އަހަރު ފަހުންނެވެ. މީގެ ކުރިން ހަމަލާ ބަދަލު ކުރުން ހުއްޓާލީ އެއްބަސްވުމެއްގެ ދަށުން ކަމަށްވާއިރު ސައުދީން އެއާޕޯޓަށް ހަމަލާދޭން އެހީވުމުން އެއްބަސްވުން ބާތިލުވީ ކަމަށް ހޫތީން ބުނެ އެވެ.

ސައުދީ ތާއިދު ކުރަނީ ޔަމަނުގެ ވެރިކަމަށެވެ. އެހެންވެ ހޫތީން ޔަމަނު ސަރުކާރާއި ދެކޮޅަށް ދޭ ހަމަލާތަކުން އެ ގައުމުރު ރައްކާތެރި ކުރަން ސައުދީން ޔަމަނު ސަރުކާރަށް އެހީތެރިކަން ފޯރުކޮށްދެ އެވެ.