ސްޕެއިންގެ ގައުމީ ފުޓުބޯޅަ ޓީމުގެ ޒުވާން އެޓޭކަރު ލަމީން ޔަމާލްއަށް މިއަހަރު ލިބޭނެ އެންމެ ރަނގަޅު އުފަންދުވަހުގެ ހަދިޔާއަކަށް ވާނީ މިރޭ ވޯލްޑް ކަޕް ސެމީ ފައިނަލްގައި ފްރާންސް ބަލި ކުރެވުން ކަމަށް އޭނާ ބުނެފި އެވެ.

ވޯލްޑް ކަޕް ފުޓުބޯޅަ މުބާރާތުގައި ސްޕެއިން އާއި ފްރާންސް ބައްދަލު ކުރާ ސެމީ ފައިނަލް މެޗު އޮންނާނީ މިރޭ ރާއްޖޭ ގަޑީން 12:00 ގައި އެވެ. އެ މެޗަށް ދެ ޓީމުވެސް ވަރަށް ބޮޑަށް ތައްޔާޜުވެފައިވާ ކަމަށް އިއްޔެ ބޭއްވި ނޫސްވެރިންގެ ބައްދަލުވުންތަކުގައި މެމްބަރުން ވަނީ ބުނެފައި އެވެ.

Advertisement

އެ ބައްދަލުވުންތަކުގެ ތެރޭގައި ނޫސްވެރިއަކު ވަނީ ފްރާންސާއި ދެކޮޅަށް ނުކުންނަށް ޖެހޭތީ ބިރުގަނޭތޯ ޔަމާލް އާއި ސުވާލުކޮށްފައި އެވެ. މި ސުވާލުގެ ޖަވާބުގައި ޒުވާން ކުޅުންތެރިޔާ ބުނީ އެއްވެސް ވަރަކަށް ބިރުގަނެ ޖެހިލުން ނުވާ ކަމަށެވެ.

ޔަމާލް ބުނީ އެމީހުންނަކީ ޔޫރަޕްގެ ޗެމްޕިއަނުން ކަމަށެވެ. އަދި މިއީ ފުޓުބޯޅަ މެޗެއް ކަމަށާއި ބިރު ގަންނަން ޖެހޭ ކަމެއް ނެތް ކަމަށެވެ.

ޔަމާލް ބުނީ އޭނާގެ އުފަން ދުވަހު ފުޓުބޯޅަ މުބާރާތުގައި އުޅެން ޖެހުމުން އަދި އެއްވެސް ހަދިޔާއެއް ނުލިބޭ ކަމަށެވެ. އެހެން ކަމުން މިއަހަރު އުފަންދުވަހު ލިބޭނެ އެންމެ ރަނގަޅު ހަދިޔާ އަކީ މިރޭ ފަރާންސް ބަލިކޮށް ފައިނަލުން ޖާގަ ލިބުން ކަމަށެވެ.

ޔަމާލްގެ އުފަން ދުވަހަކީ ޖުލައި 13 އެވެ. މިއަހަރު އޭނާއަށް ފުރުނީ 19 އަހަރެވެ.

މި މުބާރާތުގައި ޔަމާލް އަށް އަދި ޖެހުނީ އެންމެ ގޯލެކެވެ. އޭނާ އުންމީދު ކުރަނީ މިރޭގެ މެޗުގައި ފްރާންސާއި ދެކޮޅަށް ގޯލެއް ޖެހުން ކަމަށްވިޔަސް މެޗުގައި އޭނާގެ އަމާޒަކީ އަމިއްލައަށް ގޯލު ޖަހަން މަސައްކަތް ކުރުމަށްވުރެ ގުޅިގެން މަސައްކަތްކޮށް މޮޅުވުން ކަމަށް ބުންޏެވެ.

ސްޕެއިން ސެމީ ފައިނަލަށް ދަތުރުކުރީ ކުއާޓާ ފައިނަލްގައި 2-1 ން ބެލްޖިއަމް ބަލިކޮށްގެންނެވެ.