އިންޑިއާގެ އެޑިއުކޭޝަން މިނިސްޓަރު ދަރްމެންދްރަ ޕްރަދާންގެ އިސްތިއުފާއަށް ގޮވާލާ އެ ގައުމުގެ މީހަކު ބަނޑުހައި ހޫނުކަމުގެ ހަޅުތާލު ކުރަމުން އެބަދެ އެވެ.

މިނިސްޓަރުގެ އިސްތިއުފާއަށް ގޮވަމުން ދަނީ މިފަހަކުން އިންޑިއާގައި ކުރިއަރަށް ފެށި ކޮކްރޯޗް ޖަންތާ ޕާޓީ (ސީޖޭޕީ) ނަމަކަށް ކިޔާ އޮންލައިން ސެޓަޔަރިކަލް ހަރަކާތަކުންނެވެ. އެމީހުންގެ މުޒާހަރާއަކީ އިންޑިއާގެ ވެރިރަށް ދިއްލީގެ ތަޢުލީމީ ނިޒާމު އިޞްލާޙުކުރުމަށް ގޮވާލައި ފެށި މުޒާހަރާ އެކެވެ.

Advertisement

މި މުޒާހަރާގެ ތެރެއިން ބަނޑުހައި ހޫނުކަމުގެ ހަޅުތާލުފެށީ ސޮނަމް ވަންޗުކް ކިޔާ އެ ހަރަކާތުގައި އިސްކޮށް އުޅޭ މީހެވެ. އޭނާ ބަނޑުހައި ހޫނު ކަމުގެ ހަޅުތާލު ކުރާތާ އިއްޔެއަށް 16 ދުވަސްވެފައިވާއިރު ބަރުދަނުން 8.2 ކިލޯ ލުއިވެފައިވާ ކަމަށް ރިޕޯޓުތައް ބުނެ އެވެ.

އޭނާގެ ސިއްހީ ހާލަތާއި ގުޅޭގޮތުން ސުވާލު ކުރުމުން ބުނެފައިވަނީ ބޭރުފުށުން ބަލިކަށިކޮށް ފެނުނަސް ހަށިގަނޑުގެ އެތެރެއިން ވަރަށް ވަރުގަދަ ކަމަށެވެ.

ނަމަވެސް ވަންޗުކްގެ ސިއްޙީ ހާލަތު އެއް ދުވަހުން އަނެއް ދުވަހު ދަށަށް ދާތީ އޭނާއަށް ތާޢީދުކުރާ ފަރާތްތަކުގެ މެދުގައި ބޮޑު ކަންބޮޑުވުމެއް ވަނީ އުފެދިފައެވެ. އޭނާގެ ހާލަތަށް ރިޔާއަތްކޮށް އެތައް ހާސް ބަޔަކު ވަނީ ހަޅުތާލު ހުއްޓާލުމަށް ވަންޗުކަށް އިލްތިމާސްކޮށްފައި އެވެ.

އުމުރުން 59 އަހަރުގެ ވަންޗުކް ބުނީ ބަނޑުހައި ހޫނު ކަމުގެ ހަޅުތާލު ހުއްޓާ ނުލާނެ ކަމަށާއި ފެށި ކަމެއް ބުއްދިވެރި ނިމުމަކާއި ހަމައަށް ގެންދަން ޖެހޭނެ ކަމަށެވެ.

މި މުޒާހަރާތައް ފެށުނީ ޑޮކްޓަރުކަން ކިޔަވަން ބޭނުންވާ ދަރިވަރުންނަށް ބާއްވާ އިމްތިހާނުގެ ޓެސްޓު ޕޭޕަރު މިދިޔަ މެއި މަހު ލީކު ވުމާއި ގުޅިގެންނެވެ. ޕޭޕަރު ލީކުވުމުން އެޑިއުކޭޝަން މިނިސްޓަރީން ވަނީ އެ އިމްތިހާނު ކެންސަލް ކޮށްފައި އެވެ.

މުޒާހަރާ ކުރާ ފަރާތްތަކުން ބުނަނީ ސުވާލު ކަރުދާސް ލީކްވުމުގެ ފުރިހަމަ ޒިންމާ ޕްރަދާން ނަގައި މަޤާމުން އިސްތިޢުފާ ދޭން ޖެހޭ ކަމަށެވެ. ނަމަވެސް ޕްރަދާން އިސްތިޢުފާ ދިނުމަށް ދެކޮޅު ހައްދަވައި ސީޖޭޕީއާއި އެ ޕާޓީއަށް ތާޢީދުކުރާ ފަރާތްތައް ސިފަކުރައްވާފައި ވަނީ "ޤައުމުގެ ކުރިއެރުމަށް އިތުބާރު ނުކުރާ ބައިބައިކުރުވަން މަސައްކަތްކުރާ ފަރާތްތަކުގެ ބީ-ޓީމު" ގެ ގޮތުގައެވެ.