ޤަޠަރުގެ ކުރީގެ އަމީރު، ޝެއިހް ޙަމަދު ބިން ޚަލީފާ އާލް ޘާނީ އަވަހާރަވުމުގެ ހިތާމައިގައި، އެއް ދުވަހަށް ދިވެހި ދިދަ ބައިދަނޑިއަށް ތިރިކޮށްފި އެވެ.

ރައީސް އޮފީހުން ބުނީ ބައިދަނޑިއަށް ދިދަ ތިރިކޮށްފައި ހުންނާނީ މިއަދު މެންދުރު 12:00 ން މާދަމާ މެންދުރު 12:00 އަށެވެ. މިގޮތަށް ނިންމެވީ ރައީސް ޑރ، މުހައްމަދު މުއިއްޒު ކަމަށް އެ އޮފީހުން މައުލޫމާތުދެ އެވެ.

Advertisement

މިގޮތަށް ހަމަޖެއްސެވީ، ދިވެހިރާއްޖެއާއި ޤަޠަރާދެމެދު ޒަމާނުއްސުރެ އުފެދިފައިވާ ގާތް ރަޙުމަތްތެރިކަމުގެ ގުޅުމަށް ބަލައި އެވެ. އަދި ޝައިޚް ޙަމަދު ބިން ޚަލީފާ އާލް ޘާނީ، ޤަޠަރުގެ އަމީރު ކަމުގެ މަގާމުގައި ހުންނެވިއިރު، ރާއްޖެއާމެދު ބެހެއްޓެވި ގާތްކަމާއި، ރާއްޖޭގެ ތަރައްޤީއަށާއި ކުރިއެރުމަށް ވެދެއްވި ދީލަތި އެހީތެރިކަމާއި އެއްބާރުލެއްވުމުގެ އަގު ވަޒަންކުރެއްވުގެ ގޮތުން ކަމުގައި ރައީސުލްޖުމްހޫރިއްޔާ ވިދާޅުވިއެވެ.

ގަތަރުގެ ކުރީގެ އަމީރު ރަސްމީ އިއްޒަތުގައި ފަސްދާނުލާފައި ވަނީ އިއްޔެ ރަސްމީ ޢިއްޒަތުގައެވެ. އެމަނިކުފާނު އަވަހާރަވުމާއި ގުޅިގެން ޤަޠަރުގައި ބާއްވާ ރަސްމީ ހިތާމަފާޅުކުރުމުގެ ރަސްމިއްޔާތުގައި ބައިވެރިވެވަޑައިގެންނެވުމަށް ރައީސް ޑރ. މުޢިއްޒު އެގައުމަށް މިއަދު ހެނދުނު ވަނީ ފުރާވަޑައިގަންނަވައިފައެވެ.

ޝައިޚް ހަމަދަކީ 1995 އިން 2013 އަށް ގަތަރު ހިންގެވި ބޭފުޅާއެވެ. ހަކަތައިގެ ގޮތުން މުއްސަނދި މި ޤައުމުގެ ބޮޑެތި އުއްމީދުތަކުގެ މައިގަނޑު ބާނީއަކީ ވެސް އެމަނިކުފާނެވެ.

އެމަނިކުފާނުގެ ވެރިކަމުގެ ދައުރުގައި ގަތަރުން އިޤުތިޞާދީ އިޖުތިމާޢީ އަދި ސަގާފީ ތަރައްޤީ ފެނިފައިވެއެވެ. މި ތަރައްޤީގެ ސަބަބުން ބައިނަލްއަޤުވާމީ މުޖުތަމަޢުގައި ގަތަރުގެ ދަރަޖަ އިތުރަށް ވަރުގަދަވެފައިވެއެވެ.