އިންޑިއާގެ މަދްޔަ ޕްރަދޭޝްގައި މީހަކު މަރާލި މައްސަލައެއްގައި 14 މީހުންގެ މައްޗަށް އުމުރު ދުވަހުގެ ޖަލު ޙުކުމް އިއްވި ފަނޑިޔާރު ތަބައްސުމް ޚާން އަށް ރޭޕާއި މަރުގެ އިންޒާރުދޭ މައްސަލަ ބޮޑެުވެއްޖެ އެވެ.

އެމީހުންގެ މައްޗަށް ފަނޑިޔާރު ހުކުމް އިއްވީ މިދިޔަ ޖޫން 12 ވަނަ ދުވަހު އެވެ. އެ ހުކުމް ކުރީ ނަޒީރު އަހުމަދު ކިޔާ މީހަކު މަރާލުމާއި މަރާލަން މަސައްކަތްކުރުމާއި ހަމަނުޖެހުން ހިންގުމާއި ގަދަކަމުން ހިފެހެއްޓުން ފަދަ ކުށްތައް އެ 14 މީހުންގެ މައްޗަށް ސާބިތުވެގެންނެވެ.

އެ މައްސަލައަކީ 2022 ވަނަ އަހަރު 50 އަހަރުގެ ނަޒީރާއި އޭނާގެ ދެ އެކުވެރިން ރޭގަނޑުގެ ވަގުތެއްގައި ގެރިތަކެއް އެއްގަމު އުޅަނދެއްގައި ގެންދަނިކޮށް، "ގައު ރަކްޝަކް" ނަމަކަށް ކިޔާ ގެރި ރައްކާތެރިކުރާ ބައެއްކަމަށް ބުނާ ބަޔަކު ފުރައްސާރަކުރި ހާދިސާއެކެވެ. އެ ހާދިސާގައި އެމީހުން ވަނީ ލަޓިބުރި ފަދަ ތަކެތިިން ނަޒީރުއާ އެކުވެރިންގެ ގައިގަ ތަޅާފައި އެވެ.

ނަޒީރު މަރުވީ ލިބުނު އަނިޔާތަކަށް ފަރުވާ ދެމުން ދަނިކޮށެވެ.

މައްސަލައިގަ ސަލާމަތްވި އޭނާގެ ދެ އެކުވެރިން ވަނީ ކޯޓުގައި އެ 14 މީހުންނާއި ދެކޮޅަށް ހެކިބަސް ދީފައި އެވެ. މި ހެކިބަހުން ދިފާއުވުމަށް އެ މީހުން ބުނެފައިވަނީ ނަޒީރާއި އެކުވެރިންނަށް ހަމަލާދިނީ ގެރީގެ ވަގުވިޔަފާރި ކުރަން އުޅުމުން ކަމަށެވެ.

މައްސަލައިގަ ހުކުމް އިއްވަމުން ފަނޑިޔާރު ތަބައްސުމް ވިދާޅުވެފައިވަނީ އެއީ ސާފު "މޮބް ލިންޗިން" ގެ ހާދިސާއެއް ކަމަށެވެ.

މި ހުކުމާއި ގުޅިގެން އޭނާއަށް ފުރައްސާރަ ކުރަމުންދާ މީހުން ބުނަމުންދަނީ ތަބައްސުމް އެ ހުކުމް އިއްވީ މުސްލިމެއްގެ ދިފާއުގައި މުސްލިމް ފަނޑިޔާރަކަށް ވާތީ ކަމަށެވެ. ޢާންމު ގޮތެއްގައި ޙުކުމްތަކަށް ފާޑުކިޔުން އަމާޒުވިޔަސް ތަބައްސުމަށް އަމާޒުވި ޙަމަލާތައް ބިނާވެފައިވަނީ އޭނާގެ ޤާނޫނީ ދަލީލުތަކަށްވުރެ ބޮޑަށް އޭނާގެ ދީނަށެވެ.

ކުށް ސާބިތުވި 14 މީހުންގެ އާއިލާއިން ވަނީ ހުކުމް ކުރުމުން އެމީހުން ޖަލަށް ގެންދަން ފުލުހުން މަސައްކަތް ކުރި ވަގުތު ހުރަސް އަޅާފައި އެވެ.

މި ހުކުމާއި ގުޅިގެން ތަބައްސުމް އާއި ދެކޮޅު މީހުން ވަނީ 10 ދުވަސް ތެރޭގައި އެމީހުން ދޫކޮށްނުލައިފި ނަމަ ގައުމު ފުރާ ލޭ އޮހޮރުވުމަކަށް ދާނެ ކަމަށް ބުނެފައި އެވެ. އަދި އެމީހުން ފަނޑިޔާރަށް މަރުގެ އިންޒާރު ދެމުންދަނީ ފާޅުކަން ބޮޑުގޮތެއްގައި ކާކުކަން އެނގޭ ގޮތަށެވެ.

އެމީހުން ބުނެފައިވާ ގޮތުގައި ގެރި ސަލާމަތް ކުރަން މަސައްކަތް ކުރި މީހުންގެ ހައްގުގައި ތެދުވުމަކީ ކޮންމެހެން ކުރަން ޖެހޭނެ ކަމެއް ކަމަށެވެ. މީގެ އިތުރުން ގެރީގެ ހިމާޔަތުގައި ހައްދުފަހަނަ އަޅާފައިވާ މީހުން ދަނީ މުޒާހަރާތައްވެސް ބާއްވަމުންނެވެ.

ފުރައްސާރަ ކުރުންތައް އިތުރުވެފައިވާތީ ބޮޑެތި ޖުޑިޝަރީ ޖަމާޢަތްތަކުން ތަބައްސުމަށް ތާޢީދު ހޯއްދަވައި އޭނާއަށް ފުލުހުންގެ ރައްކާތެރިކަން ދީފައިވެއެވެ. އަދި ބާ އެސޯސިއޭޝަނުން ވަނީ ފަނޑިިޔާރުން ކުރާ ހުކުމަކީ ދީނާ ގުޅޭ ހުކުމެއް ނޫން ކަމަށާޢި ހުކުމް ބިނާވަނީ ހެއްކާއި ގަރީނާގެ މައްޗަށް ކަމަށް ބުނެފައި އެވެ.