ބަންގްލަދޭޝްގެ ކުރީގެ ބޮޑުވަޒީރު ޝެއިހް ހަސީނާ އެނބުރި ގައުމަށް ވަޑައިގެންނަވާނީ މިއަހަރުގެ ޑިސެމްބަރު މަހު ކަން ހާމަ ކުރައްވައިފި އެވެ.

މީގެ ކުރިން ހަސީނާ ވަނީ މިއަހަރު ނިމުމުގެ ކުރިން އެނބުރި ގައުމަށް ވަޑައިގެންނަވާނެ ކަަމަށް ވިދާޅުވެފައި އެވެ. އޭރު ވިދާޅުވީ ގައުމަށް ވަޑައިގެންނެވުމަށް ބަންގްލަދޭޝް ސަރުކާރަށް ހުރަސް ނޭޅޭނެ ކަމަށާއި ހުރަސް އަޅައިފި ނަމަ އެއީ މިނިވަންކަމަށް ދެވޭ ހަމަލާއެއް ކަމަށެވެ.

އޭގެ ފަހުން އިއްޔެ ހަސީނާ ވަނީ އިންޑިއާގައި އަރުވާލެއްވިގެން ހުންނަވާތާ ދެ އަހަރަށް ފަހު ގައުމަށް ވަޑައިގެންނަވާނީ ޑިސެމްބަރުގައިކަން ހާމަ ކުރައްވާ، ގޮސް އަމަލު ކުރައްވާނެ ގޮތްވެސް ހާމަކޮށްފައި އެވެ. ހަސީނާ ވިދާޅުވީ އޭނާގެ އަވާމީ ލީގުގެ އިސް ލީޑަރުންނާއި އެކު ޤައުމަށް އެނބުރި ވަޑައިގެން ކޯޓަށް ހާޒިރުވެވަޑައިގަންނަވާނެ ކަމަށެވެ.

ރޮއިޓާސް އަށް ދެއްވި ޚާއްޞަ ފޯނު އިންޓަވިއުއެއްގައި އުމުރުފުޅުން 78 އަހަރުގެ ހަސީނާ ވިދާޅުވީ އެނބުރި ވަޑައިގެންނެވުމުން ހައްޔަރުކޮށްފާނެ ކަމަށާއި އެކަމަނާ އަވަހާރަކޮށްލުންވެސް އެކަށީގެންވާ ކަމަށެވެ. އެހެންނަމަވެސް ދާން ޖެހޭ ކަމަށާއި ޕާޓީގެ ލީޑަރުންނާއި މެމްބަރުންނަށް އޭނާ ގައުމުން ބޭރުގައި ހުންނަވާތީ ބޮޑެތި އަނިޔާތައް ދެމުންދާ ކަމަށެވެ.

އޭނާ މަރާލަން ބަންގްލަދޭޝް ސަރުކާރުން ބޭނުންނަމަ ނުވަތަ ގައުމަށް ވަޑައިގެންނެވުމުން މަރު އަތުވެއްޖެ ނަމަ ބޭނުންވަނީ އެކަމަނާގެ މައިންބަފައިން ވަޅުލެވިފައިވާ އެ ބޭފުޅުންގެ ލޭ އޮހޮރުވާލެވުނު ތަނުގައި މަރުވާން ކަމަށްވެސް ވިދާޅުވި އެވެ.

ހަސީނާ އާއި އެކު އެނބުރި ގައުމަށް ވަޑައިގެންނަވާ ބޭފުޅުންގެ ތެރޭގައި ކުރީގެ ހޯމް މިނިސްޓަރު އަސަދުއްޒަމާން ޚާން ކަމާލް ހިމެނިވަޑައިގަންނަވައެވެ. ހަސީނާ ވިދާޅުވީ އެނބުރި ވަޑައިގެންނަވާނީ ބޭރުގެ އެއްވެސް ގައުމެއްގެ އެހީތެރިކަމާއި ނުލާ ކަމަށެވެ. 

ހަސީނާ ވިދާޅުވީ ބަންގްލަދޭޝްގެ 300 ޕާލިމެންޓަރީ ދާއިރާގެ ތެރެއިން 125 ދާއިރާއެއް ހިމެނޭ ގޮތަށް އޮންލައިން ބައްދަލުވުންތައް ބާއްވައި އަވާމީ ލީގު އަލުން ތަރުތީބުކުރުމުގެ މަސައްކަތް ކުރައްވަމުން ގެންދަވާ ކަމަށެވެ. އަދި ހަސީނާގެ މައްޗަށް ހުކުމް ކޮށްފައި އޮތަސް އަވާމީ ލީގު ހުއްޓުވައިގެން ނުވާނެ ކަމަށާއި އެކަން ކުރާނީ ރައްޔިތުން ކަމަށް ވިދާޅުވި އެވެ.

ހަސީނާގެ ވާހަކަފުޅާއި ގުޅިގެން ބަންގްލަދޭޝް ސަރުކާރާއި އިންޑިއާގެ ޚާރިޖީ ވުޒާރާ އިން ހަސީނާގެ ވާހަކަފުޅުތަކާ ގުޅޭ ގޮތުން އެއްޗެއް ބުނެފައެއް ނުވެއެވެ.

2024 ވަނަ އަހަރު ދަރިވަރުންގެ މުޒާހަރާއެއް ހުއްޓުވަން ބޮޑެތި ފިޔަވަޅުތައް އެޅުއްވުމަށް އެންގެވި ކަމުގެ ތުހުމަތުގައި ބަންގްލަދޭޝްގެ ހަނގުރާމައިގެ ޖަރީމާތަކާ ބެހޭ ކޯޓުން މިދިޔަ ނޮވެމްބަރު މަހު ހަސީނާގެ މައްޗަށް ޣައިރު ހާޒިރުގައި މަރުގެ ޙުކުމް އިއްވައި އަވާމީ ލީގު ޕާޓީ ވަނީ މަނާކޮށްފައެވެ. އެ ތުހުމަތުތައް ހަސީނާ ދޮގުކުރައްވައެވެ.

އެ ހަމަނުޖެހުންތަކުގައި 1400 އާ ހަމައަށް މީހުން މަރުވި ކަމަށް އދ.ގެ ރިޕޯޓެއްގައި ބުނެފައިވެއެވެ.