ގްރީސްގެ ތެސެލޮނީކީން ޖަރުމަނުވިލާތުގެ މެމިންގެން އަށް ދަތުރުކުރި ރަޔަންއެއާގެ މަތިންދާބޯޓެއްގެ ކުޑަދޮރެއް ނެއްޓި ފަސިންޖަރަކު ބޯޓުން ބޭރަށް ދަމައިގެންފި އެވެ.

މި ހާދިސާއާއި ގުޅިގެން އެ ފްލައިޓު ވަނީ ކުއްލި ހާލަތުގައި އެނބުރި ތެސެލޮނީކީން އަށް ރައްކާތެރި ކަމާއި އެކު ޖައްސާފައި އެވެ.

Advertisement

ރިޕޯޓުތައް ބުނާގޮތުގައި މިއަދު ހެނދުނު ބޯޓު ނައްޓާލިތާ ކުޑައިރުކޮޅެއް ފަހުން ބާރު އަޑުފައްގަނޑަކާ އެކު ކުޑަދޮރުގެ ބިއްލޫރިގަނޑު ތެޅި އޮކްސިޖަން މާސްކުތައް ވެއްޓުނު ކަމަށް އޭގެން ދަތުރު ކުރި ފަސިންޖަރުން ބުނެފައިވެއެވެ. އެ ކުޑަދޮރު ތެޅުނީ ބޯޓުގެ އިންޖީނުން ވެއްޓުނު ބައެއް ޖެހިގެން ކަމަށް ބެލެވެއެވެ. ނަމަވެސް ރަޔަންއެއާ އިން މިކަމާ ބެހޭ ގޮތުން ވަކި އެއްޗެއް ބުނެފައެއް ނުވެއެވެ.

މި ހާދިސާގައި ކުޑަދޮރުން ބޭރަށް ދަމައިގަތީ އުމުރުން 60ގެ އަހަރުތައް ގުނަމުންދާ ސާބިއާއަށް ނިސްބަތްވާ ފިރިހެނެކެވެ. މި ހާދިސާގައި ދެމިނެޓެއް ހާއިރަށް އެމީހާގެ ބޯކޮޅުން ކޮނޑާއި ހަމައަށް ކޮޑަދޮރުން ބޭރަށް ނުކުތް ކަމަށާއި އެއްކޮށް ބޭރަށް ދަމައިނުގަތީ ސީތްބެލްޓް އަޅައިގެން އިނުމުން ކަމަށް އެހެން ފަސެންޖަރުން މީޑިއާގައި ބުނެފައިވެ އެވެ. އޭނާ ފްލައިޓު އެތެރެއަށް ވެއްދީ ދެން ތިބި ފަސެންޖަރުންގެ މަސައްކަތުންނެވެ.

ލޯކަލް މީޑިއާތަކަށް މައުލޫމާތު ދިން މީހުން ބުނެފައިވާ ގޮތުގައި 60 ގެ އަހަރުތައް ގުނަމުންދާ ސާބިއާގެ ރައްޔިތެއް ކަމަށް ބުނެވޭ އެ ފިރިހެން މީހާގެ ބޮލާއި ކޮނޑާ ހަމައަށް ކުޑަދޮރުން ބޭރަށް ނުކުމެފައި ހުރީ ދެތިން މިނެޓު ވަންދެންނެވެ. އެއަށް ފަހު ދެން ތިބި ފަސިންޖަރުން ވަނީ އޭނާ ފްލައިޓުގެ އެތެރެއަށް ވައްދާފައި އެވެ.

މި ހާދިސާ އާއި ގުޅިގެން އަނބުރާ ފްލައިޓު ޖެއްސުމަށް ފަހު ސިއްހީ އެހީތެރިކަން ފޯރުކޮށްދޭން ޖެހުނީ އެންމެ ފަސިންޖަރަކަށް ކަމަށް އެއާލައިނުން ބުނެފައިވެ އެވެ.

އެ މަތިންދާ ބޯޓަކީ 18 އަހަރުވެފައިވާ ބޯޓެކެވެ. ރަޔަން އެއާ އަކީ އަޔަލެންޑުގެ އެއާލައިނެކެވެ. މި ހާދިސާ އާއި ގުޅިގެން އަޔަލެންޑުގެ އެވިއޭޝަން އޮތޯރިޓީ (އައިއޭއޭ) އިން ބުނީ މި ހާދިސާ އެ އޮތޯރިޓީގެ ސަމާލުކަމަށް އައިސްފައިވާ ކަމަށާއި ގްރީސް އާއި މޯލްޓާގެ ސިވިލް އެވިއޭޝަން ޑައިރެކްޓޮރެޓުން ހިންގާ ތަހުގީގަށް ބޭނުންވާ އެހީތެރިކަން ފޯރުކޮށްދޭނެ ކަމަށެވެ.

2018 ވަނަ އަހަރު އެމެރިކާގެ ސައުތްވެސްޓް އެއާލައިންސްގެ ފްލައިޓެއްގައި ވެސް ހަލާކުވެފައިވާ އިންޖީނަކުން ބުރައިގެން ދިޔަ ބައިތަކެއް ޖެހި ކުޑަދޮރެއް ތެޅި ފަސިންޖަރަކު ބައެއް ބޭރަށް ދެމިގެން ގޮސް އެ ފަސިންޖަރު މަރުވެފައިވެއެވެ.