އެމެރިކާގެ އަސްކަރީ ހަމަލާގައި އަވަހާރަކޮށްލި އީރާނުގެ ކުރީގެ ރޫހީ ލީޑަރު އާޔަތުﷲ އަލީ ޙާމަނާއީ ފަސްދާނު ލައިފި އެވެ.

ޚާމަނާއީ ފަސްދާނު ލާފައި ވަނީ އަވަހާރަކޮށްލިތާ 132 ދުވަސް ފަހުން އޭނާގެ އުފަން ރަށް ކަމަށްވާ އީރާންގެ މަޝްހަދުގައި މިއަދު އެވެ. އޭނާ ފަސްދާނުލީ ގަބުރުސްތާނަކީ އީރާނުގެ ޝީޢީ މުސްލިމުންގެ އެންމެ މުޤައްދަސް ބިނާ ކަމުގައިވާ އިމާމް ރިޟާގެ ޒިޔާރަތެވެ.

Advertisement

އީރާނުގެ ދައުލަތުގެ މީޑިއާއިން ރިޕޯޓުކުރި ގޮތުގައި ފަސްދާނުލުމުގެ ރަސްމިއްޔާތު ބޭއްވީ ސިއްރު ކުޑަ ރަސްމިއްޔާތެއްގެ ގޮތުގައި ނަމަވެސް އެއް ހަފުތާ ވަންދެން ބޭއްވި ޢާންމު ތަޢުޒިޔާ ހަރަކާތްތަކުގައި 15 މިލިއަނަށް ވުރެ ގިނަ މީހުން ބައިވެރިވެފައިވެއެވެ. އީރާނުގެ ތަފާސް ހިސާބުތައް ބުނާ ގޮތުން އެ ޢަދަދު އެއަށް ވުރެ ދެ ގުނަ އިތުރުވެދާނެއެވެ.

ޖަނާޒާގެ ހަރަކާތްތަކުން ފާހަގަ ނުކުރެވޭ އެއް ބޭފުޅެއް ހުންނެވިއެވެ. އެއީ ޚާމަނައީގެ ދަރިކަލުން އަދި ސުޕްރީމް ލީޑަރުގެ މަޤާމާ ހަވާލުވެވަޑައިގެންނެވި މުޖުތަބާ އަލީ ޚާމަނާއީއެވެ. ފެބްރުއަރީ 28 ގެ ހަމަލައަށް ފަހު މުޖުތަބާ ޢާންމުންގެ ކުރިމައްޗަށް ވަޑައިގެންފައެއް ނުވެއެވެ.

ރަސްމީ ޖަނާޒާ ފެށުނީ މިދިޔަ ހޮނިހިރު ދުވަހު ތެހެރާނުގެ ގްރޭންޑް މުޞައްލާގައި ޚާމަނައީގެ ޖަނާޒާ ބެހެއްޓުމާ ހަމައިންނެވެ. އީރާނުގެ ސަރަޙައްދީ ބައިވެރިން ކަމުގައިވާ ޣައްޒާގެ ޙަމާސް އާއި އިސްލާމިކް ޖިހާދު ލުބުނާނުގެ ޙިޒްބުﷲ އަދި ޔަމަނުގެ ޙޫޘީންގެ ވަފުދުތައް މި ރަސްމިއްޔާތުގައި ބައިވެރިވިއެވެ.

ޚާމަނާއީގެ ޖަނާޒާ ކުރިޔަށް ދިޔަ އިރު އާންމުން އެއްވެފައި --

ހޯމަ ދުވަހު ވެރިރަށް ތެހެރާނުގެ މަގުތަކުގައި 10 ކިލޯމީޓަރުގެ ޖަނާޒާ ހިނގާލުމެއް ބާއްވައި ޖަނާޒާ ގެންދެވުނީ އާޒާދީ ސްކޮޔާއަށެވެ. މި ހިނގާލުމުގައި މަދުވެގެން 12 މިލިއަން މީހުން ބައިވެރިވެފައިވެއެވެ.

ޚާމަނައީގެ ޖަނާޒާ ފުރަތަމަ ތާވަލުކުރެވުނީ މާރިޗު މަހު ނަމަވެސް ހަނގުރާމައިގެ ސަބަބުން ފަސްކުރީ ކަމަށް ރިޕޯޓުތައް ބުނެ އެވެ.