އިންޑިއާގެ ހުޅަނގު ބެންގާލްގެ ބާރުއިޕޫރުގައި ކުޑަ އަންހެން ކުއްޖަކު ރޭޕްކޮށް އެއްލާލި މައްސަލައިގެ ތުހުމަތުގައި ހައްޔަރުޔު ކުރި މީހެއްގެ ގަޔަށް ފުލުހުން ބަޑި ޖަހައި މަރާލައިފި އެވެ.

ރޭޕް ކުރުމަށް ފަހު ސޫރިޔަޕޫރް ހާޓް ސަރަހައްދުގެ ފެންގަނޑަކަށް އެއްލާލާފައި އޮތީ އުމުރުން 12 އަހަރުގެ އަންހެން ކުއްޖެކެވެ. އެކުއްޖާ ގެއްލުނީ ކައިރި ފިހާރައަކަށް އެއްޗެއް ގަންނަން ދިޔަގޮތަށެވެ.

Advertisement

އާއިލާ އާއި ފުލުހުން އަދި އާންމުން ގުޅިގެން ކުއްޖާ ހޯދަމުން ދަނިކޮށް ފެންގަނޑު ތެރެއިން ފެނުނު އިރު އެ ކުއްޖާ އޮތީ ފުރާނަ ސަލާމަތް ނުކުރެވޭ ހާލަތުގައި އެވެ. ކުއްޖާ މަރުވީ ފެންގަނޑުން ނެގި ފަހުންނެވެ.

ރޭޕް ކުރުމުގެ ސަބަބުން ކުއްޖާގެ ހަށިގަނޑަށް ބޮޑެތި އަނިޔާތައް ލިބިފައިވާއިރު ބަނޑާއި ފުއްޕާމޭގައި ފެނުގެ އަސަރު ވަރަށް ބޮޑަށް ހުއްޓެވެ. ޕޯސްޓްމޯޓަމް ރިޕޯޓުގައި ބުނެފައިވާ ގޮތުގައި ކުއްޖާ މަރުވީ ގަންބާލުމުގެ ސަބަބުން ފެންބޮވިގެންނެވެ.

މި މައްސަލައިގަ އެ ސަރަހައްދުގެ މީހުން ރެއިލް ސްޓޭޝަން ތަކާއި ބަސްތައް ހުއްޓުވައި މަގުތައް ބަންދުކޮށް ތުހުމަތުވާ މީހުން ހައްޔަރު ކުރުމަށް ފުލުހުންނަށް ގޮވާލާ އެއްވުންތައް ބާއްވާފައި އެވެ. ފުލުހުންނަށް މައްސަލައިގެ ތުހުމަތުގައި މިހާތަނަށް ހައްޔަރު ކުރެވުނީ އެކަކެވެ.

ރިޕޯޓުތައް ބުނާގޮތުގައި އެމީހާ ފުލުހުންގެ ބަޑީގެ ހަމަލާގައި މަރުވީ ހާދިސާ ހިނގިތަނަށް ގެންގޮސް ކަންހިނގިގޮތް ކުޅުވަން އުޅުމުގެ ތެރޭގައު ފުލުހެއްގެ ހަތިޔާރު ފޭރިގަނެ ފިލަން މަސައްކަތް ކުރުމުންނެވެ. ބަޑި ޖެހުމުން ލިބުނު ޒަހަމްތަކަށް އެމީހާ ފަރުވާ ދޭން ހޮސްޕިޓަލަށް ގެންދިޔަ އިރުވެސް އޮތީ މަރުވެފައި ކަމަށް ރިޕޯޓުތައް ބުނެ އެވެ.

ފުލުހުން ތުހުމަތުކުރާ ގޮތުގައި ތުހުމަތުކުރެވޭ އެކަކު އެ ކުޑަކުއްޖާ ގެންދިޔައީ އެހެން ދެ ތުހުމަތުކުރެވޭ މީހުން ތިބި ޖިފުޓިއަކަށެވެ. އެ ކުއްޖާ ރޭޕް ކޮށް އަނިޔާ ދިނީ އެތަނުގައި ކަަމަށް ބެލެވޭ ކަމަށް ފުލުހުން ބުނެފައިވެ އެވެ.