އަތޮޅު ކައުންސިލްތައް އުވާލާފައިވަނިކޮށް ހދ. އަތޮޅުގެ ހުރިހާ ރަށެއް ބައިވެރިވެގެން ތަރައްޤީގެ މަސައްކަތް ކުރަން ޚާއްޞަ ބޯޑެއް އެކުލަވާލަން ފެށި މަސައްކަތް ހުއްޓާލުމަށް ލޯކަލް ގަވަރުމަންޓް އޮތޯރިޓީ (އެލްޖީއޭ) އިން އަންގައިފިއެވެ.

އެލްޖީއޭ އިން ކުޅުދުއްފުށީ މޭޔަރު މުޙައްމަދު ޢާތިފަށް ފޮނުއްވި ސިޓީގައި ބުނެފައިވަނީ އަތޮޅު ކައުންސިލްތައް އުވާލައި އެ އިދާރާތަކުގެ މަސްއޫލިއްޔަތުތައް އެލްޖީއޭއާ ހަވާލުކޮށްފައިވާތީ މުޅި އިދާރީ ދާއިރާގެ ތަރައްޤީއަށް ކުރަންޖެހޭ ކަންކަން ކުރުމަކީ އެ އޮތޯރިޓީގެ މަސްއޫލިއްޔަތެއް ކަމަށެވެ.

Advertisement

އެހެންކަމުން އަތޮޅުގެ ހުރިހާ ރަށެއް ހިމެނޭ ގޮތަށް ބޯޑެއް އެކުލަވާލުމަކީ ކުރެވޭނެ ކަމެއް ކަމަށް ޤަބޫލު ނުކުރާ ކަމަށް އެ އޮތޯރިޓީން ބުނެފައިވެއެވެ.

އެލްޖީއޭ އިން ދެކޭ ގޮތުގައި އެ ގޮތަށް މަސައްކަތް ކުރުމަކީ އަތޮޅު ކައުންސިލްތައް އުވާލުމަށް ލާމަރުކަޒީ ޤާނޫނަށް ގެނައި އިޞްލާޙުގެ މަފްހޫމާ ފުށުއަރާ ކަމެކެވެ. އެ އޮތޯރިޓީން ވަނީ ބޯޑު އެކުލަވާލަން ކުރަމުންދާ މަސައްކަތް ހުއްޓާލުމަށާއި އެ ނިންމުމަށް ވާޞިލުވި ޤާނޫނީ ސްޓޭންޑަކީ ކޮބައިކަން ސާފުކޮށްދިނުމަށް އަންގައިފައެވެ.

މި ބޯޑު އެކުލަވާލުމަށް އިސް ނެންގެވީ ކުޅުދުއްފުށީ ސިޓީގެ މޭޔަރު މުޙައްމަދު ޢާތިފެވެ. އެ މަސައްކަތަށް ތާއީދު ހޯއްދެވުމަށް މޭޔަރު ވަނީ ހދ. އަތޮޅުގެ ރަށްރަށުގެ ކައުންސިލްތަކުގެ ރައީސުންނާ އެކު ބައްދަލުވުމެއް ބާއްވަވައިފައެވެ.