ހުޅުމާލޭގެ މަގުތަކުގައި ހިނގާބިނގާވެ އުޅޭ މީހުންނަށް ޚާއްޞަކޮށްފައިވާ ދުވާރުތަކުގައި ޕާކްކޮށްފައިވާ އުޅަނދުތައް ޓޯކުރުމުގެ މަސައްކަތް ފުލުހުން ފަށައިފިއެވެ.

ފުލުހުން ބުނީ ޓޯކުރަން ފަށާފައި މިވަނީ ޕޭވްމަންޓު މަތީގައި ޕާކު ކުރުމަކީ ގާނޫނާއި ހިލާފު ކަމެއްކަން ހަނދާން ކޮށްދިނުމަށް ފަހު ކަމަށެވެ.

Advertisement

ފުލުހުން ބުނީ އެއްގަމު ދަތުރުފަތުރުގެ ޤާނޫނުގައި ބުނާ ގޮތުން ފައިމަގުގައި ހިނގުމަށް ޚާއްޞަ ޕޭވްމަންޓްތަކުގައި ދުއްވޭނީ ވަކި ބާވަތްތަކެއްގެ އެއްޗިއްސެވެ. އެއީ ކުޑަކުދިންގެ ޕްރޭމާއި ނުކުޅެދުންތެރިކަން ހުންނަ މީހުން ބޭނުންކުރާ ފުރޮޅުލީ ގޮނޑި އެވެ.

ޕޭވްމަންޓްތަކުގައި ޕާކުކުރުމުގެ އިތުރުން މަގުތަކުގެ ދެ ފަޅީގައި ޕާކުކޮށް ދަތުރުފަތުރަށް ދަތިވުމުގެ މައްސަލަ ވަނީ ކުރިމަތިވެފައި އެވެ. އަދި ފްލެޓް އިމާރާތްތަކުގެ ދެމެދުގައި މީހުން ހިނގަން ޚާއްޞަކޮށްފައި އޮންނަ މަގުތަކުގައި ވެހިކަލް ދުއްވައި ޕާކުކުރުން ވެސް ވަނީ އާންމު ކަމަކަށް ވެފައެވެ.

ފުލުހުން ބުނީ ހިނގާ މީހުންނަށާއި މަގު ބޭނުންކުރާ މީހުންނަށް އުނދަގޫވާ ގޮތަށް ޕާކުކޮށްފައި ހުންނަ އުޅަނދުތައް ބައެއް ފަހަރު ފުލުހުން ޓޯ ކުރި ނަމަވެސް މައްސަލައިގައި އެދެވޭ ހައްލެއް ލިބިފައި ނުވާ ކަމަށެވެ.