ސްކޫލްތައް އޭސީ ކުރުމަށް ރައީސް ޑރ. މުހައްމަދު މުއިއްޒު އިއުލާނު ކުރެއްވި "ކޫލް ސްކޫލް" ޕްރޮޖެންޓު ދެވަނަ ޓާމު ފެށެންވާއިރަށް ނިންމާލެވޭނެ ކަމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވެއްޖެ އެވެ.

މިނިސްޓަރު މިހެން ވިދާޅުވީ މިއަދު އޮތް ރައްޔިތުންގެ މަޖިލީހުގެ ޖަލްސާގައި ވާހަކަ ދައްކަވަމުންނެވެ. ސްކޫލްތައް އޭސީކުރުމާއި ގުޅޭގޮތުން މިނިސްޓަރާއި ސުވާލު ކުރެއްވީ ހިތަދޫ މެދު ދާއިރާގެ މެންބަރު އަހުމަދު އަޒާން އެވެ.

Advertisement

މިނިސްޓަރު ވިދާޅުވީ އެ ކޫލް ސްކޫލް ޕްރޮޖެކްޓްގެ 61 ޕަސެންޓް ނިމިފައިވާ ކަމަށެވެ. އޭނާ ވިދާޅުވީ ހުރިހާ ސްކޫލަކަށް ބޭނުންވާ އޭސީތައް ސްކޫލްތަކަށް ގެންގޮސްފައިވާ ކަމަށެވެ.

ރާއްޖޭގެ 217 ސްކޫލެއް އޭސީ ކުރުމުގެ މަސައްކަތް ދަނީ ކުރަމުންނެވެ. މިނިސްޓަރު ވިދާޅުވީ ބާކީ ހުރި ސްކޫލްތަކުގެ ކަރަންޓުގެ ވިއުގަ އަޕްގްރޭޑްކޮށް މަސައްކަތް ނިންމާލުމަށް މަސައްކަތް ކުރަމުންދާ ކަމަށެވެ.

މިނިސްޓަރު ވިދާޅުވީ ރާއްޖޭގެ ބައެއް ސްކޫލުތަކަށް 30 އަހަރަށްވުރެ ގިނަ ދުވަސްވެފައިވާ ކަމަށާއި އެ ތަންތާނގައި ހުރީ ސިންގަލް ފޭސް ކަރަންޓު ކަމުން ގޮންޖެހުންތައް ހުރި ކަމަށެވެ. އެހެންނަމަވެސް އަމާޒަކީ ދެވަނަ ޓާމުގެ ކިޔެވުން ފެށުމުގެ ކުރިން ގިނަ ސްކޫލުތަކުގެ މަސައްކަތް ނިންމާލުން ކަމަށް ވެސް މިނިސްޓަރު ވިދާޅުވިއެވެ.

ސަރުކާރު ހުރިހާ ސްކޫލެއްގެ ކްލާސްރޫމުތަކާއި ހޯލްތައް ދެ އަހަރު ތެރޭ އޭސީކުރުމަށް ކޫލް ސްކޫލް ޕްރޮޖެކްޓް އިފްތިތާހުކުރީ 2024 ވަނަ އަހަރުގެ ޖޫން މަހުއެވެ. މިއަހަރުގެ ދިރާސީ އަހަރު ފެށުމުގެ ކުރިން ހުރިހާ ސްކޫލެއްގައި އޭސީ ހަރުކޮށް ބޭނުން ކުރަން ފަށާނެ ކަމަށް ކުރިން ބުނެފައިވެ އެވެ.

އެ ޕްރޮޖެކްޓް ހިންގުމަށް ފެނަކައާ އެކު ސޮއިކޮށް 54 މިލިއަން ރުފިޔާއަށް އެ ކުންފުންޏާ ވަނީ ހަވާލުކޮށްފައެވެ.