އިސްރާއީލުގެ ސިފައިން ހިސޯރުކޮށްފައިވާ ފަލަސްތީނުގެ ހުޅަނގު އައްސޭރީގެ ރާމަﷲގެ ހުޅަނގުން އޮންނަ ޗެކްޕޮއިންޓެއްގައި ހޮސްޕިޓަލަށް ގެންދިޔަ ނުދީ ހުރަސްއެޅުމުގެ ސަބަބުން ފަލަސްޠީނުގެ ހަތަރު މަހުގެ ތުއްތު ފިރިހެން ކުއްޖެއް ނިޔާވެއްޖެ އެވެ.

ރާމަﷲ އާއި އަލް-ބީރާގެ ގަވަރުނަރު ލައިލާ ޣައްނާމް ވިދާޅުވީ އެ ކުއްޖާގެ ޙާލަތު ސީރިއަސްވެފައި ވަނިކޮށް އެއް ގަޑިއިރަށް ވުރެ ގިނައިރު ހޮސްޕިޓަލަށް ގެންދިޔަ ނުދީ އިސްރާއީލު ސިފައިން ހިފެހެއްޓި ކަމަށެވެ. ޗެކްޕޮއިންޓު ހުރަސްކުރަން މަސައްކަތްކުރި ފަލަސްޠީނު ރައްޔިތުންނާ ދިމާއަށް އިސްރާއީލު ސިފައިން ކަރުނަ ގޭސް ޖެހި ކަމަށް ވެސް ޣައްނާމް ވިދާޅުވި އެވެ.

Advertisement

އޭނާ ވިދާޅުވީ އެ ޢާއިލާގެ ހަމައެކަނި ފިރިހެން ދަރިފުޅު އަޙްމަދަށް ދިމާވި ކަންތައްތަކަކީ "އިންސާނިއްޔަތުގެ ޟަމީރުގައި ޖެހޭ ލައްގަނޑެއް" ކަމަށާއި މިއީ ފަލަސްޠީނު ރައްޔިތުންގެ ދަތުރުފަތުރާއި ޞިއްޙީ ފަރުވާ ހޯދުމުގެ ޙައްޤަށް ހުރަސްއެޅުމުގެ އިސްރާއީލުގެ ސިޔާސަތުގެ ބައެއް ކަމަށެވެ.

މި ހާދިސާ ހިނގި ދުވަހު ރާމަﷲ ކައިރީގައި އޮންނަ ޤަލަންދިޔާ ރެފިއުޖީ ކޭމްޕުގައި އިސްރާއީލު ސިފައިން ބަޑި ޖަހައި 16 އަހަރުގެ ފަލަސްޠީނު ފިރިހެން ކުއްޖެއް ޝަހީދުކޮށްލައިފައިވެއެވެ. ފަލަސްޠީނުގެ ޞިއްޙަތާ ބެހޭ ވުޒާރާއިން ބުނީ އެ ހާދިސާގައި 14 އަހަރުގެ އިތުރު ދެ ކުއްޖެއްގެ ފައިގެ ތިރީ ބަޔަށް ބަޑީގެ އުންޑައިން ޒަޚަމްވެފައިވާ ކަމަށެވެ.

ފަލަސްޠީނުގެ ޞިއްޙަތާ ބެހޭ ވުޒާރާގެ ތަފާސް ހިސާބުތައް ދައްކާ ގޮތުން 2023 ވަނަ އަހަރުގެ އޮކްޓޫބަރުގައި ޣައްޒާ ހަނގުރާމަ ފެށި ފަހުން ހުޅަނގު އައްސޭރީގައި އިސްރާއީލު ސިފައިންނާއި ވެރިން މަދުވެގެން 1087 ފަލަސްޠީނު ރައްޔިތުން ޝަހީދުކޮށްލައިފައިވެއެވެ.

ޣައްޒާގައި އޮކްޓޫބަރުން ފެށިގެން އަމަލުކުރަމުން އައި "ހަމަލާ ހުއްޓާލުމުގެ އެއްބަސްވުމާ" އިސްރާއީލު ސިފައިން ޚިލާފުވެ 1066 މީހުން ޝަހީދުކޮށް 3445 މީހުން ޒަޚަމްކޮށްލައިފައިވާ ކަމަށް ޣައްޒާގެ ޞިއްޙަތާ ބެހޭ ވުޒާރާއިން ބުންޏެވެ. އިސްރާއީލުގެ ނަސްލު ނެތިކޮށްލުމުގެ ހަނގުރާމައިގައި މިހާތަނަށް ޖުމްލަ 73090 މީހުން ޝަހީދުވެ 173550 މީހުން ޒަޚަމްވެފައިވާ ކަމަށް އެ ވުޒާރާއިން ހާމަކޮށްފައިވެއެވެ.