ކެންސަރަށް ފަރުވާ ކުރުމަށް ބޭނުންކުރާ "ޑަޒަލެކްސް" ނަމަކަށް ކިޔާ އިޖެކްޝަންގެ ފޭކް ބެޗުތައް ރާއްޖޭގެ އެއްވެސް ފާމަސީއެއްގައި ނުހުންނާނެ ކަމަށާއި ވިއްކާފައިވެސް ނުވާ ކަމަށް ހެލްތް މިނިސްޓްރީން ބުނެފި އެވެ.

އެ އިންޖެކްޝަންގެ ފޭކު ބެޗެއް ބޭނުން ކުރަމުންދާކަން ދުނިޔޭގެ ސިއްހަތު ޖަމިއްޔާގެ ސަމާލު ކަމަށް ގެނައީ ހެލްތް މިނިސްޓްރީންނެވެ. ރާއްޖޭގެ އިތުރުން މެކްސިކޯއިން މި ބެޗުގެ އިޖެކްޝަންތައް ފެނިގެން ޑަބްލިއުއެޗްއޯއިން ވަނީ އެލާޓު ނެރެފައި އެވެ.

Advertisement

ހެލްތް މިނިސްޓްރީގެ މީޑިއާ އޮފިޝަލް މީޑިއާގައި ވިދާޅުވީ އެ ފޭކް އިންޖެކްޝަނަކީ ރާއްޖެއިން ބޭރަށް ކެންސަރުގެ ފަރުވާއަށް ދިޔަ މީހެއްގެ ބޭސް ސިޓީއަކަށް ގެނައި އެއްޗެއް ކަމަށެވެ. އޭނާ ވިދާޅުވީ ފޭކު އިންޖެކްޝަނެއްކަން އެނގުނީ އެ ޖެހުމުގެ ކުރިން ޑޮކްޓަރަށް ދެއްކުމުގެ މަރުހަލާގައި އެކަން ފާހަގަވެގެން ޓެސްޓުކުރުމުން ކަމަށެވެ.

މީޑިއާ އޮފިޝަލް ވަނީ އެ ބަލިމީހާގެ ގަޔަށް އެ އިންޖެކްޝަން ޖަހައިފަ ނުވާކަން ޔަގީން ކޮށްދެއްވާފައި އެވެ. މިފަދަ މައްސަލައެއް އަމިއްލަ އިސްނެގުމަށް ޑަބްލިއުއެޗްއޯއަށް ރިޕޯޓު ކުރުމަކީ ރާއްޖޭގެ މޮނިޓަރިން ވަރުގަދަކަން އަންގައިދޭ ކަމަށާއި އެކަމާ ދިވެހިން ފަހުރުވެރިވާން ޖެހޭ ކަަމަށް އޮފިޝަލް ވިދާޅުވި އެވެ.

"ޑާޒަލެކްސް" އަކީ ކަށީގެ މަދު (ބޯންމެރޯ) ގެ ކެންސަރުގެ ބާވަތެއް ކަމަށްވާ "މަލްޓިޕަލް މައިލޯމާ" އާއި ލޭގެ ބައްޔެއް ކަމަށްވާ "އެމިލޮއިޑޯސިސް" އަށް ފަރުވާ ކުރުމަށް ބޭނުންކުރާ އިންޖެކްޝަނެކެވެ.

މިކަމާއި ގުޅިގެން ޑަބްލިއުއެޗްއޯއިން ނެރުނު އެލާޓުގައި ވަނީ ސިއްހީ އުފެއްދުންތަކެއްގެ ނަމުގައި އޮޅުވާލައިގެން ބާޒާރަށް ނެރެފައިވާ އެ ބެޗްތަކުގެ ނަމްބަރުތައް އާންމުކޮށްފައި އެވެ. އަދި އެ ބޭސް އުފައްދާ ކުންފުނި ކަމަށްވާ ޖޭންސެންއާ ހަވާލާދީ ޑަބްލިއުއެޗްއޯއިން ބުނީ ގޮތުގައި MYS7381 އަދި STV1K01 ނަމްބަރު ޖަހާފައިވާ އެ ބޭހުގެ ބެޗްތަކަކީ ސައްހަ ބެޗްތަކެއް ނޫނެވެ.