އަވައްޓެރި ސްރީލަންކާގައި ސައިކަލު ދުއްވާ މީޙުންނާއްި މަގު ހުރަސް ކުރާ މީހުންނަށް ހަދާފައިވާ ގާނޫނުތައް ހަރުކަށި ކުރަން އެ ގައުމުން ނިންމައިފި އެވެ.

ލަންކާ ފުލުހުންނާއި ހަވާލާދީ މީޑިއާގައި ރިޕޯޓުކޮށްފައިވާ ގޮތުގައި ކުރިޔަށް އޮތްތާ އެ ގައުމުގައި ހެޑް ފޯނާއި އިއާފޯނު ބޭނުން ކޮށްގެން ލަވަ އަޑު އަހަމުން ސައިކަލް ދުއްވާ އަދި މަގު ހުރަސް ކުރާ މީހުންނަށް ހަރުކަށި ފިޔަވަޅު އަޅާނެ އެވެ. މީގެ ތެރޭގައި ކަފި ހުރަހުން ހުރަސް ކުރާ މީހުންވެސް ހިމެނޭނެ އެވެ.

Advertisement

ފުލުހުން ބުނީ މި ފިޔަވަޅު އަޅަން ފަށަން ޖެހުނީ އެކްސިޑެންޓުތަކުގައި ފުރާނަ ގެއްލޭ މީހުން އިތުރު ވަމުންދާތީ ކަމަށެވެ.

ލަންކާ ފުލުހުންގެ ތަފާސް ހިސާބު ދައްކާގޮތުން މިއަހަރުގެ ފުރަތަމަ ހަ މަސް ތެރޭގައި ކޮންމެ ދުވަހު 10 އަށްވުރެ ގިނަ މީހުން ހެޑް ފޯނާއި އިއާފޯނު ބޭނުން ކޮށްގެން ލަވަ އަޑު އަހަމުން ސައިކަލް ދުއްވާ، މަގު ހުރަސް ކުރަނިކޮށް ހިނގި އެކްސިޑެންޓުތަކުގައި މަރުވެފައިވެ އެވެ. އެއީ 1،323 އެކްސިޑެންޓުގައި 1،389 މަރު ކަމަށް ފުލުހުން ބުނެފައިވެ އެވެ.

ލަންކާ ފުލުހުންގެ ޓްރެފިކް ކޮންޓްރޯލް އެންޑް ރޯޑް ސޭފްޓީގެ ޑިރެކްޓަރު ސީނިއާ ސުޕްރިޓެންޑެންޓު އޮފް ޕޮލިސް މަނޯޖް ރަނަގަލަ ވިދާޅުވީ އެފަދަ މީހުންނަށް މިހާރު ގާނޫނުގެ ތެރެއިން ދެމުންދަނީ ފުލުހުންގެ އިންޒާރު އެކަނި ކަމަށެވެ. އެކަމަކު ކުރިޔަށް އޮތްތާ އެފަދަ މީހުން ހުއްޓުވައި ކޯޓަށް ހާޒިރުކޮށް ފިޔަވަޅު އަޅާނެ ކަމަށެވެ.

އޭނާ ވިދާޅުވީ މި ނުބައި އާދަ އެންމެ ބޮޑީ ޒުވާން އުމުރުގެ މީހުންގެ މެދުގައި ކަމަށެވެ. ސައިކަލް ދުއްވާ ޒުވާނުން ކަނޑާއަޅާފައިވާ ސްޕީޑަށް ވުުރެ ބާރަށް ދުއްވުމާއި ޓްރެފިކް ގަވައިދާ ހިލާފުވުމަކީ އެކްސިޑެންޓުތައް ހިނގަން ދިމާވާ މައިގަނޑު ސަބަބު ކަމަށެވެ.