މިދިޔަ ހަފްތާގައި މާލެ ސަރަހައްދުން 40 އަށްވުރެ ގިނަ މީހުންނަށް ހިމަބިހި ޖެހިއްޖެ އެވެ.

ހެލްތް ޕްރޮޓެކްޝަން އެޖެންސީ، އެޗްޕީއޭއިން އާންމުކޮށްފައިވާ ތަފާސް ހިސާބު ދައްކާގޮތުން މިދިޔަ ހަފްތާގައި އިތުރު44 މީހަކު ހިމަބިއްސަށް ޕޮސިޓިވް ވެފައިވެ އެވެ. އޭގެ ކުރީ ހަފްތާގައި ބަލިޖެހިފައިވަނީ ދެ މީހުންނަށެވެ.

Advertisement

އިތުރަށް ޖެހުނު މީހުންނާއި އެކު މާލެއިން ހިމަބިހި ޖެހުނު މީހުންގެ އަދަދު ވަނީ 66 އަށް އަރާފައި އެވެ. މީގެ ތެރޭގައި 13 މީހުންނަށް މިހާރުވެސް ދަނީ ފަރުވާ ދެމުންނެވެ.

ހިމަބިހި ޖެހުނު މީހުންގެ ތެރޭގައި ގިނައީ 18 އަހަރުން މަތީގެ މީހުންނެވެ. އަދި ބަލި ޖެހުނު މީހުންނާއި ގުޅުން ހުރި މީހުންގެ ގޮތުގައި 258 މީހުން ފާހަގަ ކުރެވިފައިވާ ކަމަށް ތަފާސް ހިސާބުތަކުން ދައްކަ އެވެ.

ހިމަބިހި ޖެހުމުން ރައްކާތެރިވުމަށް ހުން އައިސް، ރަތް ބިހިތަކެއް ނަގައިފި ނަމަ ލަސްނުކޮށް ސިއްހީ ފަރުވާ ހޯދަން ޖެހެ އެވެ. ހިމަބިއްސަށް ޝައްކުވެގެން ޓެސްޓު ހަދައިފި ނަމަ ނަތީޖާ ލިބެންދެން އެކަހެރިވުމަށް އެޗްޕީއޭއިން އިލްތިމާސް ކުރެ އެވެ.

ހިމަބިހި ފެތުރުން އިތުރުވެފައިވާތީ އެޗްޕީއޭއިން ވަނީ އެމްއާރު ވެކްސިން ދިނުމުގެ ޕްރޮގްރާމެއްވެސް ފަށާފައި އެވެ. މި ޕްރޮގްރާމް ކުރިޔަށް ގެންދަން ނިންމާފައިވަނީ ދެ ފިޔަވައްސަކަށް ބަހާލައިގެންނެވެ.

މިމަހުގެ 28-30 ގެ ނިޔަލަށް ކުރިޔަށް ގެންދަނީ 18 އަހަރުން ދަށުގެ ކުދިންނާއި ސިއްހީ ހިދުމަތްތެރިންނަށް ވެކްސިން ދިނުމުގެ ޕްރޮގްރާމެވެ. މީގެ ދެވަނަ ފިޔަވަހި ފަށާނެ ދުވަހެއް އަދި އިއުލާނެއް ނުކުރެ އެވެ.