މަރުގެ އިންޒާރުތަކާ އެކު ދެކުނު ކޮރެއާގެ ކޯޗު ހޮންގް އާއި ޓީމު އެނބުރި ދިއުން ބިރުވެރި ކަމަކަށް ވެއްޖެ އެވެ.

މިހާރު ކުރިޔަށްދާ ފީފާ ވޯލްޑް ކަޕް 2026 ގެ ނޮކްއައުޓް ބުރަށް ނުގޮސް ކޮރެއާ ކެޓުމުން އެކަމުގެ ޒިންމާ ނަގައި ދެކުނު ކޮރެއާގެ ޤައުމީ ފުޓުބޯޅަ ޓީމުގެ ކޯޗު ހޮންގް މިއޮންގް-ބޯ ވަނީ އިސްތިއުފާ ދީފައި އެވެ. އަދި ޓީމު އެނބުރި މިއަދު ވަނީ ކޮރެއާއަށް ގޮސްފައި އެވެ.

Advertisement

ފުޓުބޯޅަ ޓީމު މާ އަވަހަށް ބަލިވުމުން ކޮރެއާގެ މަޝްރަހު ވަރަށް ބޮޑަށް ހޫނުވެފައިވާއިރު އެންމެ ބޮޑަށް ފާޑު ކިޔުން އަމާޒުވެފައިވަނީ ކޯޗަށެވެ. އޮންލައިންކޮށް އޭނާއަށް ވަކިން ގިނަ ބަޔަކު މަރުގެ އިންޒާރު ދެމުންދާއިރު ޓީމުގައި ހިމެނޭ މަޝްހޫރު ކުޅުންތެރިންނަށް ދަނީ ނަފުރަތުގެ މެސެޖުތައް ފޮނުވަމުންނެވެ.

މަޝްހޫރު ބޮޑެތި ރެސްޓޯރެންޓުތަކުން އެމީހުންނަށް ކެއުމުގެ ފުރުސަތު ނުދޭން ނިންމުން ފަދަ ނަފުރަތުގެ ހައްދު ފަހަނަ އަޅާފައިވާ ނިންމުންތައް ކޮރެއާ ރައްޔިތުން ދަނީ ހާމަ ކުރަމުންނެވެ. މި އިންޒާރު ތަކާއި އެކު ކޮރެއާ ފުޓުބޯޅަ އިދާރާއިން ވަނީ ޓީމަށް މަރުހަބާ ކިޔުމަށް އިންޗޮން އިންޓަނޭޝަނަލް އެއާޕޯޓުގައި އެއްވެސް ހަރަކާތެއް ނޯންނާނެކަން އިއުލާނު ކޮށްފައި އެވެ.

އަދި ޓީމަށް ސެކިއުރިޓީ ފޯރުކޮށްދޭން އެދިފައިވާ ކަމަށް ކޮރެއާ ފުލުހުން ބުނެފައިވެ އެވެ.

ކޮރެއާ ފުލުހުން ބުނެފައިވާ ގޮތުގައި ޓީމުގެ ސެކިއުރިޓީއަށް އެއާޕޯޓުގައި 150 އަށްވުރެ ގިނަ ފުލުހުން ހަރަކާތްތެރިވާނެ އެވެ. ޓީމާއި ޢާންމު ފަސިންޖަރުން ބޭނުންކުރާ މަގުތައް ވަކިކޮށް، އެއްޗެހި އުކުމާއި ހަމަލާ ދިނުން ފަދަ ޣައިރުޤާނޫނީ ޢަމަލުތަކާ މެދު ހަރުކަށި ފިޔަވަޅު އަޅާނެ ކަމަށް ފުލުހުން ބުނެފައިވެއެވެ.

ރިޕޯޓުތައް ބުނާގޮތުގައި ކުރިން ކޯޗާއި ހުރިހާ ކުޅުންތެރިން އެކުގައި ގައުމަށް ދިއުމަށް ހަމަޖެހިފައި ވީނަމަވެސް އިންޒާރުތަކާއި އެކު ދަތުރު ޝެޑީއުލަށް ބަދަލު ގެނެސްފައިވެ އެވެ. ކުޅުންތެރިން އެނބުރި ގައުމަށް ދާނީ އެކި ގްރޫޕުތަކަށް ބެހިގެންނެވެ.

ކޮރެއާ ވޯލްޑް ކަޕުން ކެޓުމާއި ގުޅިގެން އެ މައްސަލަ ތަހުގީގު ކުރަން އެ ގައުމުގެ ރައީސްވެސް ވަނީ އަންގަވާފައި އެވެ.

ކޮރެއާ ވޯލްޑް ކަޕުން ކެޓީ މިދިޔަ ހޮނިހިރު ދުވަހު އުޒްބެކިސްތާން ޑިމޮކްރެޓިކް ރިޕަބްލިކް އޮފް ކޮންގޯ އަތުން 3-1 އިން ބަލިވުމާ އެކު ކޮރެއާއަށް ރައުންޑް އޮފް 32 އަށް ދެވޭނެ ހުރިހާ ފުރުޞަތެއް ގެއްލުމުންނެވެ.