އެއް ދުވަސް ވެފައި ހުންނަ ކާއެއްޗެހި ފްރިޖުން ނަގައިގެން ހޫނުކޮށްލަިގެން ކެއުމަކީ ވަގުތު ސަލާމަތްކޮށްދޭ އިސްރާފުވުން މަދުކޮށްދޭ ފަސޭހަ ކަމެކެވެ.

ނަމަވެސް ބާކީވާ ކާއެއްޗެހި ހޫނުކުރާ ގޮތާ މެދު ސަމާލުނުވެއްޖެ ނަމަ ސީރިއަސް ސިއްޙީ މައްސަލަތައް ކުރިމަތިވެދާނެ ކަމަށް އިންޑިއާގެ ކާބޯތަކެތީގެ ރައްކާތެރިކަމާ ބެހޭ އިދާރާ (އެފްއެސްއެސްއޭއައި) މި ފަހުން ކުރި ދިރާސާއަކަށް ފަހު ބުނެފައިވެއެވެ.

Advertisement

އެ ދިރާސާގައި ބުނެފައިވާ ގޮތުގައި ގިނަ މީހުންނަށް ހެދޭ ފުރަތަމަ ގޯހަކީ އަލަށް ކެއްކި ކާނާއާއި ކުރިން ބާކީވެފައި ހުރި ކާނާ އެއްކޮށްލުމެވެ. މި ދެ ބާވަތުގެ ފިނިހޫނުމިނާއި ތާޒާކަން ތަފާތުވާތީ ވަކިވަކިން ހޫނުކުރުމަށް ފަހު އެއްކުރުން މުހިންމެވެ.

ދެވަނައަށް ހެދޭ ގޯހަކީ ކައްކާފައި ހުންނަ އެއްޗެހި ތަކުރާރުކޮށް ހޫނުކުރުމެވެ.

ކޮންމެ ފަހަރަކު ކާނާ ފްރިޖުން ނެރެ ހޫނުކޮށް ފިނިކޮށް އަނެއްކާ ރައްކާކުރާ ވަރަކަށް ބެކްޓީރިއާ އާލާވާ ފިނިހޫނުމިނުގައި، ކާނާ ހޭދަކުރާ ވަގުތު ގިނަވެއެވެ. އެހެންކަމުން ކާން ބޭނުންވާ މިންވަރު އެކަނި ހޫނުކޮށް ބާކީ ބައި ފްރިޖުގައި ބެހެއްޓުމަށް އިރުޝާދު ދީފައިވެއެވެ.

ހޫނުކުރާއިރު ކާނާ ރަނގަޅަށް އެއްކޮށް އެއްވަރަކަށް ހޫނުކުރުމަށް ވެސް ސަމާލުކަން ދޭން ޖެހެއެވެ. ޚާއްޞަކޮށް މައިކްރޯވޭވް ބޭނުންކުރާ ނަމަ ބައެއް ބައިތައް ވަރަށް ހޫނުވާއިރު އެތެރެ ފިނިކޮށް ހުރެދާނެ ކަމަށާއި ފިނި ބައިތަކުގައި ބެކްޓީރިއާ ދިރިހުރެދާނެ ކަމަށް ބުނެފައިވެއެވެ. އަދި ފްރީޒްކޮށްފައި ހުންނަ ކާނާ ސީދާ އުނދުން މައްޗަށް ނުވަތަ މައިކްރޯވޭވަށް ލުމުގެ ބަދަލުގައި ފުރަތަމަ ރަނގަޅަށް ޑީފްރޮސްޓް ކުރުމަށް ފަހު ހޫނުކުރުމަށް ވެސް ލަފާ ދީފައިވެއެވެ.

ރަނގަޅަށް ހޫނުނުކުރެވޭ ކާނާ ބެލުމުން ރީތިކޮށް ފެނިދާނެ އެވެ. ވަސް ވެސް ރަނގަޅުވެދާނެއެވެ.

ނަމަވެސް ނުރައްކާތެރި ބެކްޓީރިއާ ހުރެދާނެ ކަމަށާއި ތަޣައްޔަރުވެފައިވާ ކާނާ ކެއުމުގެ ސަބަބުން ބަނޑުގައި ރިއްސުމާއި މޭ ނުބައިކުރުމާއި ހޮޑުލެވުމާއި ބޭރަށް ހިންގުމާއި ހުން ފެތުރުން ފަދަ ކަންކަން ކުރިމަތި ވުމަކީ އާންމުކޮށް ވާކަންކަން ކަމަށް ބުނެފައިވެ އެވެ.