N/A
ރޯދަމަހާ ދިމާކޮށް ކާބޯތަކެތި އިމްޕޯޓް ކުރުމަށް
އެހީތެރިވެދިނުމުގެ ގޮތުން، ބޭންކުތަކަށް ދޫކުރާ ޑޮލަރުގެ މިންވަރު
އިތުރުކޮށްފައިވާ ކަމަށް މަރުކަޒީ ބޭންކު، މޯލްޑިވްސް މަނިޓަރީ އޮތޯރިޓީ
(އެމްއެމްއޭ) އިން ހާމަކޮށްފިއެވެ.
އެމްއެމްއޭ އިން ބުނީ، މިއަދުން ފެށިގެން ކުރިއަށް އޮތް
ތިން ހަފްތާގެ މުއްދަތަށް އަމަލުކުރާ ހާއްސަ އުސޫލެއްގެ ދަށުން، ބޭންކުތަކަށް
އާންމު އުސޫލުން ވިއްކާ ޑޮލަރުގެ މިންވަރު 32 ޕަސެންޓް އިތުރުކޮށްފައިވާ ކަމަށެވެ. މިއީ
ރޯދަމަހުގެ ތެރޭގައި އަސާސީ ކާބޯތަކެތި އެތެރެ ކުރުމަށް ބޭނުންވާ ބޭރު ފައިސާ
ހޯދުމަށް ކުރާ ޑިމާންޑު ބޮޑުވާތީ، އެކަމަށް ލުޔެއް ހޯދައިދިނުމުގެ ގޮތުން އެޅި
ފިޔަވަޅެއް ކަމަށް އެ އޮތޯރިޓީން މައުލޫމާތުދެއެވެ.
އެމްއެމްއޭ އިން އިތުރަށް ބުނީ، ބޭރު ފައިސާ އިތުރަށް
ދޫކުރުމުގެ ސަބަބުން މުދާ އެތެރެކުރާ ފަރާތްތަކަށް ބޭރުގެ ސަޕްލަޔަރުންނަށް ފައިސާ
ދެއްކުމުގައި ބޮޑެތި ފަސޭހަތަކެއް ލިބިގެންދާނެ ކަމަށެވެ. މީގެ ސަބަބުން
ވިޔަފާރިވެރިންނަށް މުދާ ގެނައުމުގައި ދިމާވާ މާލީ ދަތިތަކަށް ހައްލެއް
ލިބޭނެއެވެ.
އާންމުކޮށް ކާބޯތަކެތި ބޭނުންކުރާ މިންވަރު އިތުރުވާ މި
ދަނޑިވަޅުގައި، މުދާ އެތެރެކުރުމުގެ ނިޒާމަށް ކުރިމަތިވާ ތާށިކަން ކުޑަވެގެންދާނެ
ކަމަށް އެމްއެމްއޭ އިން ގަބޫލުކުރެއެވެ. އަދި މި ފިޔަވަޅުގެ ސަބަބުން ރާއްޖޭގެ
ބާޒާރުގައި އަސާސީ މުދާ މެދުނުކެނޑި ލިބެން ހުރުމަށް މަގުފަހިވެގެންދާނެ
ކަމަށްވެސް މަރުކަޒީ ބޭންކުން ބުނެފައިވެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް